PM Modi: చిప్స్ నుంచి షిప్స్ వరకు అన్ని రంగాల్లో భాగస్వామ్యం: దక్షిణ కొరియాతో భారత్ కీలక ఒప్పందాలు!

PM Modi: అంతర్జాతీయ వేదికపై భారత్ తన దౌత్య సంబంధాలను మరింత బలోపేతం చేసుకుంటోంది. ఇందులో భాగంగా దక్షిణ కొరియాతో పలు కీలక రంగాల్లో భాగస్వామ్యం కుదుర్చుకున్నట్లు ప్రధానమంత్రి నరేంద్ర మోదీ ప్రకటించారు. మూడు రోజుల భారత పర్యటనకు వచ్చిన దక్షిణ కొరియా అధ్యక్షుడు లీ జే మ్యూంగ్ సోమవారం ప్రధాని మోదీతో భేటీ అయ్యారు. ఇరుదేశాల ప్రతినిధుల సమక్షంలో పలు రంగాలకు సంబంధించిన అవగాహన ఒప్పందాలు (MoUs) జరిగాయి.

అన్ని రంగాల్లో సహకారం:

ఈ సందర్భంగా ఏర్పాటు చేసిన సంయుక్త మీడియా సమావేశంలో ప్రధాని మోదీ మాట్లాడుతూ, ఇరుదేశాల మధ్య బంధం సరికొత్త స్థాయికి చేరుకుందని హర్షం వ్యక్తం చేశారు. "చిప్స్ నుంచి షిప్స్ వరకు, టాలెంట్ నుంచి సాంకేతికత వరకు, అలాగే ఎంటర్‌టైన్‌మెంట్ నుంచి ఎనర్జీ వరకు.. ప్రతి రంగంలో ఉన్న అవకాశాలను అందిపుచ్చుకునేలా మేము ఒప్పందాలు చేసుకున్నాం" అని మోదీ వివరించారు.

$50 బిలియన్ డాలర్ల లక్ష్యం:

భారత్-దక్షిణ కొరియా మధ్య వాణిజ్య బంధాన్ని మరింత విస్తరించాలని ఇరుదేశాధినేతలు నిర్ణయించారు. పరస్పర వాణిజ్య ఒప్పందాల విలువను 2030 నాటికి 50 బిలియన్ డాలర్లకు చేర్చడమే లక్ష్యంగా ప్రణాళికలు రూపొందిస్తున్నట్లు ప్రధాని వెల్లడించారు. సెమీకండక్టర్లు, షిప్ బిల్డింగ్ మరియు గ్రీన్ ఎనర్జీ రంగాల్లో దక్షిణ కొరియా టెక్నాలజీ భారత్‌కు ఎంతో కీలకం కానుంది.

ఈ పర్యటనతో ఆసియా ప్రాంతంలో ఆర్థిక మరియు వ్యూహాత్మక సంబంధాలు మరింత బలపడతాయని విశ్లేషకులు భావిస్తున్నారు.