PM Modi: ప్రపంచ వేదికపై భారత్ మార్క్.. ఇండోనేసియాకు బ్రహ్మోస్, అస్త్ర క్షిపణుల సరఫరా!

PM Modi: 'ఆపరేషన్‌ సిందూర్‌' సమయంలో శత్రుదేశం పాకిస్థాన్‌ను వణికించిన భారత సూపర్‌ సోనిక్‌ క్రూయిజ్ క్షిపణి ‘బ్రహ్మోస్‌’ (BrahMos) వైపు ప్రపంచ దేశాలు క్యూ కడుతున్నాయి. ఫిలిప్పీన్స్ తర్వాత తాజాగా ఆగ్నేయాసియా దేశమైన ఇండోనేసియా సైతం ఈ క్షిపణుల కోసం భారత్‌తో భారీ రక్షణ ఒప్పందం కుదుర్చుకుంది. ప్రధానమంత్రి నరేంద్ర మోదీ ఇండోనేసియా పర్యటనలో ఈ చారిత్రాత్మక మైలురాయి చోటుచేసుకుంది. బ్రహ్మోస్‌తో పాటు భారత్ స్వదేశీ పరిజ్ఞానంతో రూపొందించిన ఎయిర్-టు-ఎయిర్ ‘అస్త్ర’ (Astra) క్షిపణుల సరఫరా కోసం ఇరు దేశాల మధ్య అధికారిక ఒప్పందం (డీల్) కుదిరింది.

మూడు దేశాల అధికారిక పర్యటనలో భాగంగా ఇండోనేసియా చేరుకున్న ప్రధాని నరేంద్ర మోదీ.. మంగళవారం ఆ దేశ అధ్యక్షుడు ప్రబోవో సుబియాంతోతో జకార్తాలో విస్తృతస్థాయి ద్వైపాక్షిక చర్చలు జరిపారు. ఈ భేటీ సందర్భంగా రక్షణ, వ్యూహాత్మక రంగాలు సహా మొత్తం 7 కీలక రంగాలలో పరస్పర సహకారం కోసం ఇరు దేశాల ప్రతినిధులు ఒప్పందాలపై సంతకాలు చేశారు. క్రిటికల్ మినరల్స్, అడ్వాన్స్‌డ్ టెక్నాలజీ, ఆహార భద్రత, సముద్ర జలాల భద్రత (మెరైన్ సెక్యూరిటీ), ఔషధాలు (ఫార్మా), డిజిటల్ గవర్నెన్స్, మిలిటరీ రంగాల్లో ఈ భాగస్వామ్యం కుదిరింది.

భారత్-ఇండోనేసియా ఒప్పందాల ముఖ్యాంశాలు:

ఇండో-పసిఫిక్ ప్రాంతంలో జకార్తా భద్రతా, రక్షణ సామర్థ్యాన్ని గణనీయంగా పెంచేందుకు ఇండోనేసియా సైన్యానికి బ్రహ్మోస్ క్షిపణులను అందించేందుకు భారత్ అంగీకరించింది. అలాగే 'ఆపరేషన్ సిందూర్'లో భారత్ అస్త్ర క్షిపణుల సమర్థతను చూసి ముగ్ధులైన ఇండోనేసియా రక్షణ శాఖ వీటి కొనుగోలుకు డీల్ కుదుర్చుకుంది.

మలక్కా జలసంధికి అత్యంత సమీపంలో ఉండే ఇండోనేసియాలోని 'సబాంగ్ పోర్ట్' (Sabang Port)ను ఉమ్మడిగా నిర్మించేందుకు ఇరు దేశాలు అంగీకరించాయి. హిందూ మహాసముద్రంలో చైనా దూకుడుకు అడ్డుకట్ట వేసేందుకు ఈ పోర్ట్ భారత్‌కు వ్యూహాత్మకంగా ఎంతో కీలకం కానుంది.

గ్లోబల్ సప్లై చైన్‌ను బలోపేతం చేసేలా ఇండోనేసియాలోని స్టీల్, నికెల్, రేర్ ఎర్త్ మ్యాగ్నెట్స్ తయారీ పరిశ్రమలలో భారత్ భారీగా పెట్టుబడులు పెట్టనుంది.

ఇండోనేసియా ఎన్నికల అవసరాల కోసం ఎలక్ట్రానిక్ ఓటింగ్ యంత్రాల (EVM) తయారీకి భారత్ అత్యాధునిక సాంకేతిక సాయం అందించనుంది.

ప్రధాని మోదీకి అత్యున్నత పౌర పురస్కారం 'బింటాంగ్ ఆదిపూర్ణ':

రెండు దేశాల మధ్య సంబంధాలను సరికొత్త శిఖరాలకు తీసుకెళ్లినందుకు గానూ.. ప్రధాని నరేంద్ర మోదీని ఇండోనేసియా ప్రభుత్వం తమ దేశ అత్యున్నత పౌర పురస్కారంతో గౌరవించింది. ‘బింటాంగ్ ఆదిపూర్ణ రిపబ్లిక్ ఆఫ్ ఇండోనేసియా’ (Bintang Adipurna) అవార్డును ఆ దేశ అధ్యక్షుడు ప్రబోవో సుబియాంతో స్వయంగా ప్రధాని మోదీకి తొడిగి సత్కరించారు. ఈ గౌరవం 140 కోట్ల మంది భారత ప్రజలకు దక్కిన గౌరవమని ప్రధాని మోదీ ట్విట్టర్ (ఎక్స్) వేదికగా హర్షం వ్యక్తం చేశారు.