Monsoon Disappears: దేశంలో నిలిచిపోయిన రుతుపవనాలు.. ఖరీఫ్ సాగు వేళ రైతుల్లో ఆందోళన!

Monsoon Disappears: దేశవ్యాప్తంగా తొలకరి పలకరింపులతో ఆశాజనకంగా ప్రారంభమైన నైరుతి రుతుపవనాల ప్రయాణం ఒక్కసారిగా మందగించింది. కేరళను ముందస్తుగా తాకి, దక్షిణ, మధ్య భారత దేశంలోకి వేగంగా దూసుకువచ్చిన రుతుపవనాలు.. గత వారం రోజులుగా ఒకే చోట నిలిచిపోయాయి (Stalled). దీనివల్ల దేశంలోని మెజారిటీ రాష్ట్రాల్లో వర్షపాత లోటు (Rainfall Deficit) తీవ్రతరమవుతోంది. భారత వాతావరణ శాఖ (IMD) విడుదల చేసిన తాజా గణాంకాల ప్రకారం.. జూన్ 4 నుంచి జూన్ 16, 2026 మధ్య కాలంలో మధ్య భారతదేశం అత్యంత దారుణంగా దెబ్బతిని, ఏకంగా 65 శాతం వర్షపాత లోటును నమోదు చేసింది.

ఐఎండీ వెల్లడించిన తాజా మ్యాప్ ప్రకారం దేశంలోని వివిధ ప్రాంతాల్లో వర్షపాత వివరాలు ఇలా ఉన్నాయి.

మధ్య భారతదేశం (Central India): వ్యవసాయానికి అత్యంత కీలకమైన మధ్యప్రదేశ్, ఛత్తీస్‌గఢ్, మహారాష్ట్ర ప్రాంతాలు ఉన్న ఈ రీజన్‌లో సాధారణ వర్షపాతం 55.2 మిమీలు కురవాల్సి ఉండగా.. కేవలం 19.2 మిమీల వర్షం మాత్రమే పడింది. అంటే ఇక్కడ 65 శాతం లోటు ఏర్పడింది. ఇది ఖరీఫ్ సాగుపై తీవ్ర ప్రభావం చూపే అవకాశం ఉంది.

తూర్పు, ఈశాన్య భారతం (East & Northeast India): సాధారణంగా ఈ సమయంలో సమృద్ధిగా వర్షాలు పడే ఈ రీజన్‌లో 125.8 మిమీలకు గానూ కేవలం 77.5 మిమీల వర్షపాతం నమోదైంది (38 శాతం లోటు).

జాతీయ సగటు (National Level): దేశవ్యాప్తంగా జూన్ 16 నాటికి సగటున 59.7 మిమీల వర్షం కురవాల్సి ఉండగా.. 38.1 మిమీలు మాత్రమే నమోదైంది. దీనితో దేశం మొత్తం మీద 36 శాతం వర్షపాత లోటు ఉంది.

నార్త్ వెస్ట్ & సౌత్ పెనిన్సులా: వాయవ్య భారతదేశంలో సాధారణం (24.4 మిమీ) కంటే స్వల్పంగా 24.6 మిమీల వర్షం కురిసింది. అలాగే దక్షిణ ద్వీపకల్పంలో సాధారణం 69.1 మిమీలు కాగా, 59.4 మిమీల వర్షపాతం నమోదై సాధారణ స్థితికి దగ్గరగా ఉంది.

రుతుపవనాలు మందగించడానికి కారణాలు:

బంగాళాఖాతం, అరేబియా సముద్రం.. ఈ రెండు సముద్రాల్లోనూ రుతుపవనాలను దేశం లోపలికి లాగడానికి అవసరమైన బలమైన వాతావరణ వ్యవస్థలు (Strong Weather Systems / ద్రోణులు, అల్పపీడనాలు) ఏర్పడకపోవడమే ఈ నెమ్మదితనానికి కారణమని వాతావరణ నిపుణులు విశ్లేషిస్తున్నారు. శాటిలైట్ చిత్రాల ప్రకారం రుతుపవన వలయాల్లో మేఘాల సాంద్రత కూడా గణనీయంగా తగ్గింది.

పసిఫిక్ మహాసముద్రంలో బలపడుతున్న 'ఎల్ నినో' వాతావరణ మార్పుల వల్లనే రుతుపవనాల గమనం దెబ్బతిన్నట్లు నిపుణులు భావిస్తున్నారు. చరిత్ర ఆధారాలను పరిశీలిస్తే ఎల్ నినో ప్రభావం ఉన్న కాలంలో భారతదేశంలో రుతుపవనాలు బలహీనపడతాయి.

ఆశలన్నీ జూలై, ఆగస్టులపైనే:

రుతుపవనాల ప్రధాన కాలమైన జూలై, ఆగస్టు నెలలు ఇంకా ముందున్నందున, వాతావరణం మళ్లీ అనుకూలించి వర్షాలు పుంజుకుంటాయని నిపుణులు భావిస్తున్నారు. అయితే, త్వరలోనే రుతుపవనాల్లో కదలిక రాకపోతే.. అది దేశంలోని ప్రధాన జలాశయాల నీటి మట్టాలపై, తాగునీటి లభ్యతపై మరియు ఖరీఫ్ సాగు పనులపై తీవ్ర ప్రతికూల ప్రభావం చూపే ప్రమాదం ఉందని నిపుణులు హెచ్చరిస్తున్నారు.