రైల్వే ఉద్యోగులకు పండగ బొనాంజా.. 78 రోజుల బోనస్‌కు ఓకే
పండుగల సీజన్ వేళ నాన్-గెజిటెడ్ రైల్వే ఉద్యోగుల కుటుంబాల్లో కేంద్ర ప్రభుత్వం సంతోషాల వెలుగులు నింపింది. బుధవారం నిర్వహించిన కేంద్ర మంత్రివర్గ..
Indian Railways Employees Bonus
పండుగల సీజన్ వేళ నాన్-గెజిటెడ్ రైల్వే ఉద్యోగుల కుటుంబాల్లో కేంద్ర ప్రభుత్వం సంతోషాల వెలుగులు నింపింది. బుధవారం నిర్వహించిన కేంద్ర మంత్రివర్గ సమావేశంలో ఉద్యోగుల సంక్షేమం దిశగా అత్యంత కీలక నిర్ణయం తీసుకుంది. దేశవ్యాప్తంగా ఉన్న సుమారు 11.40 లక్షలకు పైగా రైల్వే ఉద్యోగులకు 78 రోజుల వేతనానికి సమానమైన 'పనితీరు ఆధారిత బోనస్' (PLB) ఇచ్చేందుకు కేబినెట్ ఆమోదం తెలిపినట్లు కేంద్ర రైల్వే శాఖ మంత్రి అశ్విని వైష్ణవ్ అధికారికంగా ప్రకటించారు.
కష్టజీవులకు దసరా, దీపావళి కానుక
విలేకరుల సమావేశంలో కేంద్ర మంత్రి అశ్విని వైష్ణవ్ మాట్లాడుతూ.. రేయింబవళ్లు అవిశ్రాంతంగా శ్రమిస్తూ దేశ రవాణా వ్యవస్థను ముందుకు నడిపిస్తున్న రైల్వే కష్టజీవులకు ఈ బోనస్ ఒక దీపావళి కానుక అని అభివర్ణించారు. ప్రజలందరూ తమ కుటుంబాలతో కలిసి పండుగలు జరుపుకుంటున్న సమయంలో కూడా రైల్వే ఉద్యోగులు ట్రాక్‌లపై, ఇంజిన్లలో, వర్క్‌షాపులలో 24 గంటలూ విధి నిర్వహణలో నిమగ్నమై ఉంటారని ప్రశంసించారు. వారి నిరంతర కష్టానికి గుర్తింపుగానే ఈ బోనస్ ప్రకటిస్తున్నామని, దీని ద్వారా కేంద్ర ప్రభుత్వ ఖజానాపై సుమారు రూ. 2,009 కోట్ల మేర భారం పడుతుందని వెల్లడించారు.
ఒక్కొక్కరికి రూ. 17,951 బోనస్ లెక్కింపు
సాధారణంగా ప్రతి ఏటా దసరా, దుర్గా పూజ పండుగల సెలవులకు ముందే ఈ బోనస్ మొత్తాన్ని ఉద్యోగుల ఖాతాల్లో జమ చేస్తుంటారు. ప్రతి ఉద్యోగికి కనీస వేతనం రూ. 7,000 ప్రాతిపదికన 78 రోజుల పనిదినాలను లెక్కించి గరిష్టంగా రూ. 17,951ల చొప్పున ఈ పండగ కానుక అందనుంది. ట్రాక్ మెయింటెనర్లు, లోకో పైలట్లు, స్టేషన్ మాస్టర్లు, గార్డులు, టెక్నీషియన్లు , ఇతర గ్రూప్-సి, గ్రూప్-డి విభాగాలకు చెందిన నాన్-గెజిటెడ్ ఉద్యోగులందరికీ ఈ నిర్ణయం ద్వారా నేరుగా లబ్ధి చేకూరనుంది.
పరిమితి పెంపుపై రైల్వే యూనియన్ల డిమాండ్
మరోవైపు ఈ బోనస్ లెక్కింపునకు ప్రామాణికంగా తీసుకుంటున్న కనీస వేతన పరిమితిని పెంచాలని రైల్వే కార్మిక సంఘాలు డిమాండ్ చేస్తున్నాయి. ప్రస్తుతం అమలు చేస్తున్న రూ. 7,000 వేతన పరిమితి 2014-15 సంవత్సరం నాటిదని, గత 11 ఏళ్లుగా ఇందులో ఎలాంటి మార్పులు చేయలేదని ఐఆర్టీఎస్ఏ (IRTSA) తో సహా పలు ఉద్యోగ సంఘాలు గుర్తుచేస్తున్నాయి. ప్రస్తుత జీవన వ్యయానికి అనుగుణంగా కనీస వేతన పరిమితిని రూ. 7,000 నుంచి రూ. 18,000కు పెంచాలని, ఆ ప్రకారం లెక్కించి ప్రతి ఉద్యోగికి రూ. 46,184 చొప్పున బోనస్ అందించాలని యూనియన్ నాయకులు విజ్ఞప్తి చేస్తున్నారు.
G Krishna
అక్షరంతో మొదలైన ప్రయాణం.. అంకెల్లో చెప్పాలంటే పదేళ్ల అనుభవం..! 2015లో కెరీర్ స్టార్ట్ చేసి, ప్రింట్ మీడియా నుంచి డిజిటల్ విప్లవం వరకు అన్నిటినీ దగ్గరగా చూశాను. అంతర్జాతీయ పరిణామాల నుంచి దేశ రాజధాని రాజకీయాల వరకు, గల్లీ స్థాయి వార్తల నుంచి ఢిల్లీ స్థాయి విశ్లేషణల వరకు ప్రతి అంశాన్ని లోతుగా అధ్యయనం చేస్తూ కథనాలు అందించాను. టెక్నాలజీ స్పీడ్, బిజినెస్ లెక్కలైనా, ఆస్ట్రాలజీ విశ్లేషణ ఏదైనా.. నా నుంచి వచ్చే ప్రతి కథనం ప్రతి వార్త పాఠకుడికి ఇన్ఫర్మేషన్‌తో పాటు ఇంట్రెస్ట్‌ను కూడా అందిస్తుంది.
