India: సౌదీలో చిక్కుకున్న భారతీయ ఉమ్రా యాత్రికులు.. రంగంలోకి కేంద్రం!

India: ఉమ్రా యాత్ర నిమిత్తం సౌదీ అరేబియాకు వెళ్లిన వందలాది మంది భారతీయ యాత్రికులు స్వదేశానికి తిరిగి రాలేక తీవ్ర అవస్థలు పడుతున్నారు. మధ్యప్రాచ్యంలో నెలకొన్న తీవ్ర ఉద్రిక్తతలు, భద్రతా కారణాల దృష్ట్యా పలు అంతర్జాతీయ విమాన సర్వీసులు తాత్కాలికంగా రద్దు కావడమే ఇందుకు కారణం. ప్రస్తుతం కర్ణాటకకు చెందిన 600 మందికి పైగా, కశ్మీర్‌కు చెందిన మరో 36 మంది యాత్రికులు మక్కా, మదీనాలలో చిక్కుకుపోయి అగమ్యగోచర స్థితిలో కొట్టుమిట్టాడుతున్నారు.

విదేశాంగ మంత్రికి డీకే శివకుమార్ లేఖ

కర్ణాటక యాత్రికుల దయనీయ స్థితిపై ఆ రాష్ట్ర ఉప ముఖ్యమంత్రి డీకే శివకుమార్ తక్షణమే స్పందించారు. సౌదీలో చిక్కుకున్న యాత్రికులను సురక్షితంగా భారతదేశానికి రప్పించేందుకు తగిన చర్యలు తీసుకోవాలని కోరుతూ కేంద్ర విదేశాంగ శాఖ మంత్రి ఎస్. జైశంకర్‌కు శుక్రవారం లేఖ రాశారు. బాధితుల్లో వృద్ధులు, మహిళలు, చిన్నపిల్లలు అధిక సంఖ్యలో ఉన్నారని లేఖలో పేర్కొన్నారు. యాత్రికుల వద్ద ఉన్న డబ్బులు నిండుకున్నాయని, వారు బస చేసిన హోటళ్ల నిర్వాహకులు గదులను ఖాళీ చేయాలని తీవ్ర ఒత్తిడి తెస్తున్నారని ఆవేదన వ్యక్తం చేశారు. స్థానిక స్వచ్ఛంద సంస్థలు అందిస్తున్న సాయం ఏమాత్రం సరిపోవడం లేదని, సౌదీలోని భారత రాయబార కార్యాలయం ద్వారా సంప్రదింపులు జరిపి, అవసరమైతే ప్రత్యేక విమానాలను ఏర్పాటు చేసి వారిని రప్పించాలని విజ్ఞప్తి చేశారు.

టికెట్ల ధరలు రూ.లక్షకు పైనే.. మందులు లేక వృద్ధుల అవస్థలు

ఇదే తరహాలో శ్రీనగర్ నుంచి సెప్టెంబర్ 25న ఉమ్రా యాత్రకు వెళ్లిన 50 మంది కశ్మీరీ యాత్రికుల బృందంలో 36 మంది ఇంకా సౌదీలోనే ఉండిపోయారు. అక్టోబర్ 13న వారు తిరుగుప్రయాణం కావాల్సిన ఇండిగో విమానం హఠాత్తుగా రద్దు కావడంతో ఈ సమస్య తలెత్తింది. దుబాయ్ లేదా ఇతర ప్రత్యామ్నాయ మార్గాల ద్వారా భారత్‌కు వచ్చే విమాన టికెట్ల ధరలు ఒక్కొక్కరికి రూ. లక్ష దాటిపోవడంతో వాటిని కొనుగోలు చేయలేక బాధితులు తీవ్ర ఇబ్బందులు పడుతున్నారు. రోజువారీ ఆహారం, నివాసం కోసం అప్పులు చేయాల్సి వస్తోందని, వృద్ధులకు అవసరమైన అత్యవసర మందులు కూడా అందుబాటులో లేక ప్రాణభయంతో ఆందోళన చెందుతున్నామని బాధితులు వాపోతున్నారు.

కేంద్రం, జమ్మూకశ్మీర్ ప్రభుత్వాల స్పందన.. హెల్ప్‌లైన్ నంబర్ల ఏర్పాటు

ఈ సున్నితమైన అంశంపై జమ్మూకశ్మీర్ ప్రభుత్వం సైతం కేంద్ర విదేశాంగ శాఖతో నిరంతరం సంప్రదింపులు జరుపుతోంది. మరోవైపు, ఈ పరిస్థితిపై కేంద్ర మైనారిటీ వ్యవహారాల శాఖ మంత్రి కిరణ్ రిజిజు స్పందిస్తూ.. సౌదీలో ఉన్న భారతీయ యాత్రికులకు అవసరమైన పూర్తి సహాయ సహకారాలు అందిస్తున్నామని భరోసా ఇచ్చారు. అత్యవసర సహాయం కోసం రియాద్‌లోని భారత రాయబార కార్యాలయం, జెడ్డాలోని కాన్సులేట్ జనరల్ హెల్ప్‌లైన్ నంబర్లను పంచుకున్నారు. మధ్యప్రాచ్య ప్రాంతంలో ఉద్రిక్తతలు రోజురోజుకూ పెరుగుతుండటంతో పలు అంతర్జాతీయ విమానయాన సంస్థలు తమ సర్వీసులను రద్దు చేయడంతో భారతీయ యాత్రికుల తిరుగుప్రయాణంపై అనిశ్చితి నెలకొంది.