Jantar Mantar Protest Case: జైలు నుంచి విడుదలైన మరుసటి రోజే షాక్.. సౌరవ్ దాస్, ఆశుతోష్ రంకలకు సమన్లు!

Jantar Mantar Protest Case: ఢిల్లీలోని జంతర్ మంతర్ వద్ద అనుమతి లేకుండా నిరసన తెలిపిన కేసులో సీజేపీ నేతలు సౌరవ్ దాస్, ఆశుతోష్ రంకా, అజింక్య షిండేలకు ఢిల్లీ పోలీసులు తాజాగా సమన్లు జారీ చేశారు. గురువారం మధ్యాహ్నం 12 గంటలకు రాజౌరీ గార్డెన్‌లోని క్రైమ్ బ్రాంచ్ కార్యాలయంలో విచారణకు హాజరుకావాలని ఆదేశించారు. వారం రోజుల పాటు జ్యుడీషియల్ కస్టడీలో ఉండి బుధవారమే విడుదలైన దాస్, రంకాలకు వెంటనే మళ్లీ సమన్లు రావడం రాజకీయ వర్గాల్లో తీవ్ర కలకలం రేపింది.

అక్టోబరు 13న జంతర్ మంతర్ పరిసరాల్లోకి అనుమతి లేకుండా ప్రవేశించి నిరసన తెలిపినందుకు పోలీసులు దాస్, రంకా, షిండేలతో పాటు మరో 11 మందిని అదుపులోకి తీసుకున్న విషయం తెలిసిందే. అప్పట్లో షిండే బెయిల్ బాండ్‌పై విడుదల కాగా, దాస్, రంకా మాత్రం వారం రోజుల పాటు జ్యుడీషియల్ కస్టడీలో ఉన్నారు. ఈ కేసు తీవ్రతను పరిగణనలోకి తీసుకుని ఢిల్లీ పోలీసులు కేసు దర్యాప్తును ఈ వారంలో క్రైమ్ బ్రాంచ్‌కు బదిలీ చేశారు.

ఓటరు జాబితాల ప్రత్యేక సమగ్ర సవరణ (SIR) ప్రక్రియలో భారీగా అక్రమాలు జరుగుతున్నాయంటూ సీజేపీ నేతలు ఈ నిరసన చేపట్టారు. ఈ ఆందోళన సందర్భంగా ప్రధాన ఎన్నికల కమిషనర్ జ్ఞానేశ్ కుమార్‌కు వ్యతిరేకంగా భారీ ఎత్తున నినాదాలు చేశారు.

ప్రత్యేక ఎగ్జిక్యూటివ్ మేజిస్ట్రేట్ రీతూ రాజ్ ఆదేశాలతో బుధవారం దాస్, రంకా జైలు నుంచి విడుదలయ్యారు. విచారణ పూర్తయ్యే వరకు ఒక్కొక్కరు రూ. 50,000 చొప్పున వ్యక్తిగత బాండ్, ష్యూరిటీ బాండ్‌ను సమర్పించారు. శాంతిభద్రతలకు భంగం కలిగించబోమని, చట్టప్రకారం జంతర్ మంతర్ అధికారిక నిరసన ప్రదేశంగా గుర్తింపు పొందే వరకు అక్కడ ఎలాంటి ఆందోళనలకు పిలుపునివ్వబోమని సీజేపీ నేతలు లిఖితపూర్వకంగా హామీ ఇచ్చారు.