Viral Video: ఇసుకనే పలకగా మార్చి అక్షరాలు నేర్పుతున్న కేరళ బామ్మ.. వైరల్ అవుతున్న ఆశాట్టి అమ్ముమ్మ వీడియో!

Viral Video: విద్యను అభ్యసించడానికి ఖరీదైన పుస్తకాలు, కాగితాలు లేదా డిజిటల్ డివైజ్‌లు మాత్రమే ఉండనవసరం లేదని, నేర్చుకోవాలనే తపన ఉంటే మన చుట్టూ ఉండే వస్తువులే గొప్ప బోధనా పరికరాలుగా మారతాయని నిరూపిస్తున్నారు కేరళకు చెందిన ఒక వృద్ధురాలు. ఇసుకను పలకగా, చిన్న కర్ర ముక్కను బలపంగా మార్చి చిన్నారులకు ఆడుతూ పాడుతూ అక్షరాలు నేర్పుతున్న ఆమె పాఠాలకు సంబంధించిన వీడియో ప్రస్తుతం సామాజిక మాధ్యమాల్లో వైరల్‌గా మారింది.

స్థానికంగా 'ఆశాట్టి అమ్ముమ్మ'గా పిలుచుకునే ఈ బామ్మ, తన ఇంటి ముందు చుట్టుపక్కల ఉండే చిన్నారులను కూర్చోబెట్టుకుని విద్యాబుద్ధులు నేర్పుతున్నారు. ఇటీవల 'మామ్ ఆఫ్ సఫాచి' (Mom of Safachi) అనే ఇన్‌స్టాగ్రామ్ ఐడీలో షేర్ చేసిన వీడియోలో.. ఆమె ముందుగా బకెట్‌లో ఉన్న ఇసుకను నేలపై క్రమబద్ధంగా పోసి, ఒక చిన్న కర్రతో దానిని సమతలంగా చదును చేసి పలకలా తయారుచేశారు.

ఆ తర్వాత అదే కర్రతో ఇసుక పలకపై అక్షరాలు రాస్తూ పిల్లలకు బిగ్గరగా చదివి వినిపిస్తున్నారు. కేవలం సాధారణ ప్రాథమిక అక్షరాలే కాకుండా, కష్టమైన ఇంగ్లీష్ కర్సివ్ లెటర్స్ కూడా ఎలా రాయాలో ఆమె సులువుగా నేర్పిస్తుండటం విశేషం.

బామ్మ రాస్తున్న అక్షరాలను పిల్లలు కూడా ఎంతో ఆసక్తిగా గమనిస్తూ తమ వేళ్లతో ఇసుకపై దిద్దుతూ ఉత్సాహంగా నేర్చుకుంటున్నారు. ఆధునిక యుగంలోనూ అందుబాటులో ఉన్న సహజసిద్ధమైన వస్తువులతోనే విద్యను ఎంత సృజనాత్మకంగా బోధించవచ్చో నిరూపించిన ఆశాట్టి అమ్ముమ్మ ఆలోచనను నెటిజన్లు వేనోళ్ల పొగుడుతున్నారు. ఆమె బోధనా పద్ధతి అద్భుతమని, భావితరాలకు నేర్పించే ఇలాంటి ఉపాధ్యాయులు సమాజానికి ఎంతో ఆదర్శమని సోషల్ మీడియాలో ప్రశంసల వర్షం కురిపిస్తున్నారు.