High Court: ముఖ్యమంత్రులను విమర్శించే హక్కు ప్రజలకుంది.. హైకోర్టు సంచలన తీర్పు.. పోలీసులకు షాక్!

Madras High Court: ప్రభుత్వాలపై మరియు ముఖ్యమంత్రులపై ప్రజలు చేసే విమర్శలు, వ్యతిరేకత తెలిపే హక్కుపై మద్రాస్ హైకోర్టు అత్యంత కీలక వ్యాఖ్యలు చేసింది. ప్రజాస్వామ్యంలో ముఖ్యమంత్రులతో సహా ఉన్నత పదవుల్లో ఉన్న ఏ రాజకీయ నాయకుడైనా విమర్శలను స్వీకరించడానికి సిద్ధంగా ఉండాలని, వారిని ప్రశ్నించే మరియు విమర్శించే రాజ్యాంగబద్ధమైన హక్కు పౌరులకు ఉంటుందని స్పష్టం చేసింది.

అదే సమయంలో పౌరులకు ఉన్న అటువంటి ప్రాథమిక హక్కులను కాపాడాల్సిన బాధ్యత ప్రభుత్వానికి మరియు పోలీసులకు మాత్రమే ఉంటుందని తేల్చిచెప్పింది. డీఎంకే కౌన్సిలర్ సుధపై తమిళనాడు ముఖ్యమంత్రి సి. జోసెఫ్ విజయ్‌ను కించపరిచారనే ఆరోపణలతో నమోదైన కేసులో ఆమెకు ముందస్తు బెయిల్ మంజూరు చేస్తూ జస్టిస్ ఎన్. రమేశ్ నేతృత్వంలోని ధర్మాసనం ఈ చారిత్రాత్మక వ్యాఖ్యలు చేసింది.

ఈ సందర్భంగా ధర్మాసనం విచారణలో మాట్లాడుతూ.. ప్రజాస్వామ్య వ్యవస్థలో పాలకులను ప్రశ్నించడం, విమర్శించడం, వారి విధానాలను వ్యతిరేకించడం పౌరుల ప్రాథమిక హక్కు అని పేర్కొంది. రాజ్యాంగం కల్పించిన స్వేచ్ఛ ప్రకారం ప్రభుత్వాన్ని ప్రశంసించడంతో పాటు విమర్శించే పూర్తి హక్కు కూడా ప్రజలకు ఉంటుందని తెలిపింది. పాలన మారవచ్చు, ముఖ్యమంత్రులు మారవచ్చు, కానీ చట్టం ముందు అందరూ సమానమే అనే రాజ్యాంగ సూత్రం ఎప్పటికీ మారదని స్పష్టం చేసింది.

ఒక రాజకీయ నాయకుడి ప్రసంగం పాలకులను అవమానించేలా ఉన్నంత మాత్రాన దాన్ని వెంటనే నేరంగా పరిగణించలేమని, ప్రజల ప్రశ్నలకు సమాధానం చెప్పాల్సిన బాధ్యత ముఖ్యమంత్రితో సహా ప్రజా జీవితంలో ఉన్న నేతలందరికీ ఉంటుందని, పాలకులు ఎవరూ విమర్శలకు అతీతులు కారని కోర్టు వ్యాఖ్యానించింది.

పోలీసు వ్యవస్థ తీరుపై కూడా మద్రాస్ హైకోర్టు తీవ్ర ఆగ్రహం వ్యక్తం చేసింది. పోలీసులు కేవలం అధికారంలో ఉన్న పార్టీకి సేవ చేసేలా కాకుండా, నిరంతరం వ్యవస్థగా కొనసాగే రాష్ట్రానికి సేవలందించే అధికారులుగా నిష్పక్షపాతంగా వ్యవహరించాలని హితవు పలికింది. రాజకీయ కోపతాపాలు, విమర్శల ఆధారంగా కేసులు నమోదు చేయడం చట్టబద్ధం కాదని స్పష్టం చేస్తూ, కౌన్సిలర్ సుధకు షరతులతో కూడిన ముందస్తు బెయిల్ మంజూరు చేసింది. ఈ తీర్పు ప్రజాస్వామ్య స్వేచ్ఛకు మరియు భావప్రకటనా స్వేచ్ఛకు మరింత బలాన్ని చేకూర్చిందని న్యాయ నిపుణులు అభిప్రాయపడుతున్నారు.