Mahatma Gandhi Marksheet : సోషల్ మీడియాలో మహాత్మా గాంధీ మార్కుల జాబితా వైరల్.!

Mahatma Gandhi Marksheet : నేటి విద్యా వ్యవస్థలో మార్కుల కోసం విద్యార్థులు, తల్లిదండ్రులు పడుతున్న తాపత్రయం అంతా ఇంతా కాదు. కేవలం అంకెలే జీవితాన్ని నిర్ణయిస్తాయనే భ్రమలో చాలా మంది తీవ్ర ఒత్తిడికి లోనవుతున్నారు. ఇలాంటి తరుణంలో జాతిపిత మహాత్మా గాంధీకి సంబంధించిన ఒక పాత పత్రం ఇప్పుడు సోషల్ మీడియాలో విపరీతంగా చక్కర్లు కొడుతోంది. అది మరేదో కాదు, 1887వ సంవత్సరానికి చెందిన గాంధీజీ పదో తరగతి (మెట్రిక్యులేషన్) మార్కుల జాబితా. ఈ మార్కుల షీట్ చూస్తే, విజయం సాధించడానికి కేవలం టాపర్ కావాల్సిన అవసరం లేదని, పట్టుదల ఉంటే ప్రపంచాన్నే మార్చవచ్చని అర్థమవుతుంది.

గాంధీజీ మార్కుల వెనుక అసలు కథ

ఈ వైరల్ అవుతున్న మార్కుల మెమో ప్రకారం, గాంధీజీ ఒక సాధారణ విద్యార్థిగా కనిపిస్తారు. ఆయన అప్పట్లో బాంబే యూనివర్సిటీ నిర్వహించిన పరీక్షలకు హాజరయ్యారు. ఈ జాబితాలో ఆయన సాధించిన మార్కులు.. ఇంగ్లీష్ భాషలో ఆయనకు 100 మార్కులకు గానూ 89 మార్కులు లభించాయి. గుజరాతీలో 45.5 మార్కులు సాధించారు. గణితం విషయానికి వస్తే ఆయనకు 59 మార్కులు వచ్చాయి.

చరిత్ర , ఇతర సబ్జెక్టులలో 54 మార్కులు లభించాయి.

మొత్తంగా 625 మార్కులకు గానూ ఆయన కేవలం 247.5 మార్కులు మాత్రమే సాధించారు. అంటే ఆయన ఒక సగటు మార్కులు పొందిన విద్యార్థి మాత్రమే. కానీ, ఆ అంకెలు ఆయనలోని మేధస్సును కానీ, దేశానికి ఆయన అందించబోయే నాయకత్వాన్ని కానీ ఏమాత్రం అంచనా వేయలేకపోయాయి.

విద్యార్థులకు ఒక గొప్ప పాఠం

ఈ మార్కుల జాబితా కేవలం ఒక పాత జ్ఞాపకం మాత్రమే కాదు, నేటి తరం విద్యార్థులకు ఒక అద్భుతమైన పాఠం. పరీక్షల్లో మార్కులు తక్కువ వచ్చినప్పుడు నిరాశలో మునిగిపోయే విద్యార్థులకు ఇది ఒక పెద్ద స్ఫూర్తి. విద్యాపరంగా గాంధీజీ టాపర్ కాకపోవచ్చు, కానీ తన నైతిక విలువలతో, సత్యం , అహింసా మార్గాలతో బ్రిటీష్ సామ్రాజ్యాన్ని గడగడలాడించి, భారతదేశానికి స్వాతంత్ర్యం తీసుకువచ్చారు. "మార్కులు కేవలం అంకెలు మాత్రమే, అవి మీ భవిష్యత్తును నిర్ణయించలేవు" అని ఈ పత్రం స్పష్టంగా చాటిచెబుతోంది.

నెటిజన్ల ప్రశంసలు

ఈ డాక్యుమెంట్‌ను చూసిన నెటిజన్లు ఫిదా అవుతున్నారు. "గొప్ప వ్యక్తులు ఎప్పుడూ పుస్తకాల్లోని మార్కుల కోసం కాకుండా, చరిత్ర సృష్టించే దిశగా అడుగులు వేస్తారు" అంటూ అనేక మంది కామెంట్స్ చేస్తున్నారు. విద్యార్థులు పరీక్షల సమయంలో ఒత్తిడికి గురికాకుండా ఉండటానికి గాంధీజీ జీవితం ఒక సరైన ఉదాహరణ. కాబట్టి, విద్యార్థులారా! మార్కులు ముఖ్యం కాదని కాదు, కానీ అవి తక్కువ వచ్చినంత మాత్రాన జీవితం అయిపోయినట్లు కాదు. గాంధీజీ సాధించిన మార్కులు తక్కువైనా, ఆయన సాధించిన విజయం హిమాలయమంత గొప్పది.