Tragedy : కొండచరియలు విరిగిపడి.. ఒకే కుటుంబంలో ముగ్గురు మృతి.!
Tragedy : కర్ణాటకలోని మంగళూరులో బుధవారం తెల్లవారుజామున ఒక ఘోర విషాదం చోటుచేసుకుంది. గత రాత్రి నుంచి కురుస్తున్న భారీ వర్షాల కారణంగా నాగోరి
Tragedy
Tragedy : కర్ణాటకలోని మంగళూరులో బుధవారం తెల్లవారుజామున ఒక ఘోర విషాదం చోటుచేసుకుంది. గత రాత్రి నుంచి కురుస్తున్న భారీ వర్షాల కారణంగా నాగోరి ప్రాంతంలో ఒక్కసారిగా కొండచరియలు విరిగిపడ్డాయి. ఈ ప్రమాదంలో కొండ కింద ఉన్న ఒక ఇల్లు పూర్తిగా మట్టి దిబ్బల కింద సమాధి అయిపోయింది. ఈ ఘోర ఉదంతంలో ఒకే కుటుంబానికి చెందిన ఇద్దరు చిన్న పిల్లలు సహా ముగ్గురు అక్కడికక్కడే ప్రాణాలు కోల్పోయారు.
నిద్రలోనే మింగేసిన మట్టి దిబ్బలు
బుధవారం తెల్లవారుజామున కుటుంబ సభ్యులంతా ప్రశాంతంగా నిద్రపోతున్న సమయంలో ఈ ప్రమాదం జరిగింది. భారీ వర్షం కారణంగా కొండపై ఉన్న భారీ మట్టి ఒక్కసారిగా ఇళ్లపైకి దూసుకువచ్చింది. దీంతో క్షణాల వ్యవధిలోనే ఆ ఇల్లు కుప్పకూలిపోయి, ఇంట్లో ఉన్న ఆరుగురు సభ్యులు మట్టి లోపల చిక్కుకుపోయారు. స్థానికులు ఇచ్చిన సమాచారంతో ఫైర్ సిబ్బంది, రెస్క్యూ టీమ్స్ , ఎన్డీఆర్ఎఫ్ (NDRF) బలగాలు వెంటనే రంగంలోకి దిగి సహాయక చర్యలు చేపట్టాయి.
ముగ్గురు మృతి.. ముగ్గురు సురక్షితం
చాలా గంటల పాటు శ్రమించి మట్టిని తొలగించిన రెస్క్యూ సిబ్బంది.. ముగ్గురి మృతదేహాలను బయటకు తీశారు. మృతులను శాంత (46), ఆమె ఎనిమిదేళ్ల కుమార్తె అనామిక, నాలుగేళ్ల కుమార్తె పరిగా గుర్తించారు. కాగా, ప్రాణాలతో పోరాడుతున్న మరో ముగ్గురిని (బాలకృష్ణ, అల్కా, అనుష) రెస్క్యూ టీమ్స్ సురక్షితంగా రక్షించాయి. వీరికి తీవ్ర గాయాలు కావడంతో తక్షణమే చికిత్స కోసం దగ్గరలోని ఆసుపత్రికి తరలించారు.
20 ఏళ్లుగా అక్కడే నివాసం
ఈ దురదృష్టకర కుటుంబం అసలు స్వస్థలం బిహార్ రాష్ట్రం. ఉపాధి కోసం సుమారు ఇరవై ఏళ్ల క్రితమే మంగళూరుకు వలస వచ్చి కంకనాడి ప్రాంతంలో స్థిరపడ్డారు. ఇన్నేళ్లుగా సాఫీగా సాగుతున్న వీరి జీవితాన్ని ఒక్క రాత్రి కురిసిన వర్షం పూర్తిగా అతలాకుతలం చేసింది. ప్రమాదం జరిగిన వెంటనే దక్షిణ కన్నడ డిప్యూటీ కమిషనర్ దర్శన్ ఘటనా స్థలాన్ని సందర్శించి సహాయక చర్యలను పర్యవేక్షించారు.
అధికారుల హై అలర్ట్
తీరప్రాంత జిల్లాల్లో ఇంకా భారీ వర్షాలు కురిసే అవకాశం ఉండటంతో జిల్లా యంత్రాంగం ప్రజలను అప్రమత్తం చేసింది. ముఖ్యంగా కొండ ప్రాంతాలు, కొండచరియలు విరిగిపడే అవకాశం ఉన్న చోట్ల నివసిస్తున్న ప్రజలు చాలా జాగ్రత్తగా ఉండాలని, అవసరమైతే సురక్షిత ప్రాంతాలకు వెళ్లాలని అధికారులు సూచించారు. అలాగే ప్రమాదం జరిగిన ప్రాంతం చుట్టుపక్కల ఇళ్లలో నివసించడం సురక్షితమేనా కాదా అనేదానిపై అధికారులు సర్వే ప్రారంభించారు.
G Krishna
అక్షరంతో మొదలైన ప్రయాణం.. అంకెల్లో చెప్పాలంటే పదేళ్ల అనుభవం..! 2015లో కెరీర్ స్టార్ట్ చేసి, ప్రింట్ మీడియా నుంచి డిజిటల్ విప్లవం వరకు అన్నిటినీ దగ్గరగా చూశాను. అంతర్జాతీయ పరిణామాల నుంచి దేశ రాజధాని రాజకీయాల వరకు, గల్లీ స్థాయి వార్తల నుంచి ఢిల్లీ స్థాయి విశ్లేషణల వరకు ప్రతి అంశాన్ని లోతుగా అధ్యయనం చేస్తూ కథనాలు అందించాను. టెక్నాలజీ స్పీడ్, బిజినెస్ లెక్కలైనా, ఆస్ట్రాలజీ విశ్లేషణ ఏదైనా.. నా నుంచి వచ్చే ప్రతి కథనం ప్రతి వార్త పాఠకుడికి ఇన్ఫర్మేషన్తో పాటు ఇంట్రెస్ట్ను కూడా అందిస్తుంది.