Fire Accident: ప్రారంభోత్సవానికి ముందే పెను ప్రమాదం.. రాజస్థాన్ HPCL ఆయిల్ రిఫైనరీలో భారీ అగ్నిప్రమాదం!

Fire Accident: రాజస్థాన్‌లోని బలోత్రా జిల్లా పచ్‌పద్రలో ఉన్న హెచ్‌పీసీఎల్ (HPCL) ఆయిల్ రిఫైనరీలో సోమవారం భారీ అగ్నిప్రమాదం సంభవించింది. పెట్రోల్ రిఫైనరీ యూనిట్‌లో ఒక్కసారిగా మంటలు చెలరేగడంతో ఆ ప్రాంతమంతా దట్టమైన పొగ అలుముకుంది. మంటలు భారీ ఎత్తున ఎగసిపడుతుండటంతో స్థానికులు తీవ్ర భయాందోళనకు గురవుతున్నారు.

యుద్ధ ప్రాతిపదికన సహాయక చర్యలు:

సమాచారం అందుకున్న వెంటనే అగ్నిమాపక సిబ్బంది 20 ఫైరింజన్లతో ఘటనా స్థలానికి చేరుకున్నారు. మంటలు ఇతర విభాగాలకు వ్యాపించకుండా అదుపు చేసేందుకు తీవ్రంగా శ్రమిస్తున్నారు. రిఫైనరీలో ఆయిల్ నిల్వలు ఉండటంతో మంటల తీవ్రత ఎక్కువగా ఉన్నట్లు తెలుస్తోంది.

రేపే ప్రారంభోత్సవం:

ఈ ప్రమాదం అధికారుల్లో తీవ్ర కలవరాన్ని రేపుతోంది. ఎందుకంటే, ఈ అత్యాధునిక రిఫైనరీని రేపు (మంగళవారం) ప్రధాని నరేంద్ర మోదీ చేతుల మీదుగా అధికారికంగా ప్రారంభించాల్సి ఉంది. ప్రారంభోత్సవానికి అన్ని ఏర్పాట్లు పూర్తయి, ప్రధాని పర్యటనకు సిద్ధమవుతున్న తరుణంలో ఈ అగ్నిప్రమాదం జరగడం గమనార్హం.

ఈ ప్రమాదానికి గల కారణాలు ఇంకా తెలియాల్సి ఉంది. షార్ట్ సర్క్యూట్ వల్ల ప్రమాదం జరిగిందా లేక మరేదైనా సాంకేతిక లోపం ఉందా అనే కోణంలో అధికారులు దర్యాప్తు చేస్తున్నారు. ప్రస్తుతానికి ప్రాణనష్టంపై ఎటువంటి అధికారిక సమాచారం అందలేదు.