‘ఇది ఎన్నో ప్రాణాలు నిలబెడుతుంది’.. దగ్గు సిరప్‌లపై కేంద్ర నిర్ణయంపై వైద్యుల ప్రశంసలు!

Cough Syrup: భారతదేశంలో దగ్గు మందులు , ఇతర సిరప్ ఆధారిత ఔషధాల కొనుగోలుపై కేంద్ర ప్రభుత్వం సంచలన నిర్ణయం తీసుకుంది. ఇకపై ఎలాంటి సిరప్ మందులనైనా మెడికల్ షాపుల్లో నేరుగా ఓవర్-ది-కౌంటర్ పద్ధతిలో కొనుగోలు చేయడానికి వీల్లేదు. కచ్చితంగా రిజిస్టర్డ్ డాక్టర్ రాసిన ప్రిస్క్రిప్షన్ ఉంటేనే ఫార్మసీలు వీటిని విక్రయించాల్సి ఉంటుంది. ఈ మేరకు కేంద్ర ఆరోగ్య , కుటుంబ సంక్షేమ మంత్రిత్వ శాఖ అధికారిక నోటిఫికేషన్ విడుదల చేసింది.

డ్రగ్స్ రూల్స్ 'షెడ్యూల్ K' సవరణ.. తక్షణమే అమలులోకి!

కేంద్ర ప్రభుత్వం ‘డ్రగ్స్ (ఐదవ సవరణ) నిబంధనలు, రెండు వేల ఇరవై ఆరు’ ద్వారా పాత డ్రగ్స్ రూల్స్, పంతొమ్మిది వందల నలభై ఐదుకు కీలక సవరణలు చేసింది. జూన్ తొమ్మిది, రెండు వేల ఇరవై ఆరు తేదీతో ఉన్న ఈ సవరణ నోటిఫికేషన్‌ను కేంద్ర ప్రభుత్వం గెజెట్‌లో ప్రచురించింది. దీని ప్రకారం.. ‘షెడ్యూల్ K’ లోని సీరియల్ నంబర్ పదమూడు, ఐటమ్ నంబర్ ఏడు కింద ఉన్న మినహాయింపుల జాబితా నుండి ‘సిరప్‌లు’ అనే పదాన్ని పూర్తిగా తొలగించారు. ఇప్పటివరకు ఈ షెడ్యూల్ వల్ల సిరప్‌లను ప్రిస్క్రిప్షన్ లేకుండా సాధారణ గృహ వైద్య నివారణలుగా విక్రయించే వీలుండేది. తాజా నిర్ణయంతో ఆ మినహాయింపులు రద్దయి, సిరప్‌లపై కఠినమైన నియంత్రణ అమల్లోకి వచ్చింది.

కల్తీ సిరప్‌ల మరణాల నేపథ్యంలో కఠిన నిర్ణయం

రెండు వేల ఇరవై ఐదు అక్టోబర్‌లో మధ్యప్రదేశ్‌లోని ఛింద్వారా జిల్లాలో ‘కోల్డ్‌రిఫ్’ అనే కల్తీ దగ్గు మందు తాగి దాదాపు పద్నాలుగు మంది చిన్నపిల్లలు ప్రాణాలు కోల్పోయారు. ఈ సిరప్‌లో అనుమతించదగిన స్థాయి కంటే అత్యధికంగా, అంటే దాదాపు నలభై ఎనిమిది శాతం ‘డైఇథిలిన్ గ్లైకాల్’ (DEG) అనే ప్రమాదకరమైన ఇండస్ట్రియల్ సాల్వెంట్ కలిసినట్లు ల్యాబ్ పరీక్షల్లో తేలింది. అలాగే రాజస్థాన్‌లోనూ మరో మూడు మరణాలు సంభవించాయి. అంతకుముందు రెండు వేల ఇరవై రెండు, ఇరవై మూడుల్లో గాంబియా, ఉజ్బెకిస్తాన్, కెమరూన్ దేశాలలోనూ భారతీయ తయారీ దగ్గు మందుల వల్ల పలువురు పిల్లలు మరణించిన ఘటనలు అంతర్జాతీయంగా కలకలం రేపాయి. ఈ తీవ్రమైన ప్రజా ఆరోగ్య సంక్షోభాన్ని అరికట్టేందుకు కేంద్రం ఈ నిర్ణయం తీసుకుంది.

నిర్ణయాన్ని స్వాగతిస్తున్న వైద్య నిపుణులు

కేంద్ర ప్రభుత్వ తీసుకున్న ఈ కఠిన నిర్ణయాన్ని దేశవ్యాప్తంగా ఉన్న ప్రముఖ వైద్యులు, పీడియాట్రీషియన్లు (చిన్నపిల్లల వైద్యులు) ముక్తకంఠంతో స్వాగతిస్తున్నారు.

"దగ్గు మందులను డాక్టర్ పర్యవేక్షణ లేకుండా సొంతంగా వాడటం వల్ల అసలైన వ్యాధి నిర్ధారణ ఆలస్యం అవ్వడమే కాకుండా, మోతాదు లోపాలు , ప్రమాదకరమైన రియాక్షన్లు వచ్చే అవకాశం ఉంది. ముఖ్యంగా యువత, కౌమారదశలో ఉన్నవారు కొన్ని రకాల కోడైన్ కలిగిన సిరప్‌లను మత్తు కోసం దుర్వినియోగం చేస్తున్నారు. ప్రభుత్వ నిర్ణయం ప్రజారోగ్య రక్షణకు ఎంతో అవసరం."డాక్టర్ వివేక్ జైన్, సీనియర్ డైరెక్టర్, ఫోర్టిస్ హాస్పిటల్ (ఢిల్లీ).

హైదరాబాద్‌కు చెందిన ప్రముఖ పీడియాట్రీషియన్ డాక్టర్ శివరంజని సంతోష్ కూడా సాషల్ మీడియా ద్వారా కేంద్రానికి కృతజ్ఞతలు తెలిపారు. ఈ నిర్ణయం వల్ల సులభంగా నివారించదగిన అనారోగ్యాలు, అత్యవసర హాస్పిటల్ అడ్మిషన్ల నుండి వేలాది మంది పసిపిల్లల ప్రాణాలను కాపాడవచ్చని ఆమె పేర్కొన్నారు.

ముందస్తు సంప్రదింపుల తర్వాతే తుది నోటిఫికేషన్

ఈ నిబంధనను అకస్మాత్తుగా కాకుండా, అంతకుముందు రెండు వేల ఇరవై ఐదు డిసెంబర్ ఇరవై తొమ్మిదిన కేంద్రం ఒక డ్రాఫ్ట్ నోటిఫికేషన్‌ను విడుదల చేసింది. దీనిపై స్టేక్‌హోల్డర్స్ , సాధారణ ప్రజల నుండి ముప్పై రోజుల పాటు అభ్యంతరాలు, సలహాలను స్వీకరించింది. వాటన్నింటినీ క్షుణ్ణంగా పరిశీలించిన అనంతరం, దేశీయ అత్యున్నత సాంకేతిక సలహా మండలి ‘డ్రగ్స్ టెక్నికల్ అడ్వైజరీ బోర్డ్’ (DTAB) తో సంప్రదించి ఈ తుది గెజెట్ నోటిఫికేషన్‌ను జారీ చేసింది. దీని ప్రకారం బెనాడ్రిల్, గ్లైకోడిన్, గ్రిలింక్టస్, జెడెక్స్ వంటి ప్రముఖ బ్రాండ్ల సిరప్‌లను కొనాలన్నా ఇకపై డాక్టర్ చిట్టీ తప్పనిసరి.