Kapil Sahu: విజయ్ విక్టరీ వెనుక 'కపిల్ సాహూ'.. ఎవరీ వ్యూహకర్త?

Kapil Sahoo: తమిళనాడు అసెంబ్లీ ఎన్నికల ఫలితాల్లో దళపతి విజయ్ నేతృత్వంలోని 'తమిళగ వెట్రి కజగం' (TVK) సృష్టించిన సునామీ వెనుక ఒక యువ వ్యూహకర్త మేధస్సు దాగి ఉంది. దశాబ్దాల చరిత్ర ఉన్న డీఎంకే, అన్నా డీఎంకే వంటి దిగ్గజ పార్టీలను సైతం వెనక్కి నెట్టి టీవీకే అతిపెద్ద పార్టీగా అవతరించడం వెనుక కపిల్ సాహూ అనే పొలిటికల్ స్ట్రాటజిస్ట్ కీలక పాత్ర పోషించారు.

మధ్యప్రదేశ్ రాష్ట్రానికి చెందిన కపిల్ సాహూ గతంలో ప్రముఖ వ్యూహకర్త ప్రశాంత్ కిషోర్‌కు చెందిన ఐప్యాక్ (I-PAC)లో కీలక సభ్యుడిగా పనిచేశారు. అయితే పాత పద్ధతులు ప్రస్తుత రాజకీయాలకు సరిపోవని భావించిన ఆయన, రెండేళ్ల క్రితం 12 మంది సభ్యులతో కూడిన కోర్ టీమ్‌తో బయటకు వచ్చి సొంతంగా సంస్థను స్థాపించారు. ఇప్పటికే 9 రాష్ట్రాల్లో సేవలందించిన కపిల్, ఢిల్లీ అసెంబ్లీ ఎన్నికల్లో బీజేపీ విజయంలోనూ కీలక పాత్ర పోషించి తన సత్తా చాటారు.

2024లో ప్రశాంత్ కిషోర్ టీవీకే బాధ్యతల నుంచి తప్పుకున్నాక, కపిల్ సాహూ ఆ బాధ్యతలను భుజానికెత్తుకున్నారు. విజయ్ పార్టీని క్షేత్రస్థాయి నుంచి బలోపేతం చేయడంలో ఆయన టీమ్ అద్భుతమైన కృషి చేసింది.

డేటా అనాలిసిస్: నియోజకవర్గాల వారీగా బలాబలాలను అంచనా వేయడం.

అభ్యర్థుల ఎంపిక: గెలుపు గుర్రాలను గుర్తించి వారిని బరిలోకి దింపడం.

డిజిటల్ క్యాంపెయిన్: సోషల్ మీడియా వేదికగా యువతను ఆకర్షించేలా వ్యూహరచన.

ఎన్నికల ర్యాలీలు: విజయ్ సభలకు జనం విపరీతంగా వచ్చేలా పక్కా ప్లానింగ్.

75 ఏళ్ల చరిత్ర కలిగిన డీఎంకే, 52 ఏళ్ల చరిత్ర ఉన్న అన్నా డీఎంకేల ఓటు బ్యాంకును కేవలం రెండేళ్ల క్రితం పుట్టిన పార్టీ వైపు మళ్లించడం సామాన్యమైన విషయం కాదు. పక్కా వ్యూహాలతో కపిల్ సాహూ ఈ అసాధ్యాన్ని సుసాధ్యం చేశారు. దీంతో ప్రస్తుతం రాజకీయ వర్గాల్లో కపిల్ సాహూ పేరు మారుమోగిపోతోంది. తదుపరి ఎన్నికల్లో ఈ 'కొత్త చాణక్యుడి' సేవలు ఎవరికి దక్కుతాయన్నది ఇప్పుడు ఆసక్తికరంగా మారింది.