మేకెదాటు డ్యామ్‌పై కాంగ్రెస్‌లో చిచ్చు.. డీకే వర్సెస్ ఠాగూర్..

కావేరి నదిపై కర్ణాటక నిర్మించతలపెట్టిన 'మేకెదాటు' (Mekedatu) డ్యామ్ వివాదం ఇప్పుడు దక్షిణాది రాజకీయాల్లో పెను దుమారం రేపుతోంది. ఆసక్తికరంగా ఈ అంశం ఇప్పుడు 'కాంగ్రెస్ వర్సెస్ కాంగ్రెస్' పోరుగా మారింది. కర్ణాటకలో కాంగ్రెస్ పార్టీ అధికారంలో ఉండగా, తమిళనాడులో ముఖ్యమంత్రి విజయ్ నేతృత్వంలోని ప్రభుత్వంలో కాంగ్రెస్ భాగస్వామిగా ఉంది. ప్రధాని నరేంద్ర మోదీ సమక్షంలో కర్ణాటక ముఖ్యమంత్రి డీకే శివకుమార్ చేసిన వ్యాఖ్యలపై తమిళనాడు కాంగ్రెస్ అధ్యక్షుడు మాణికం ఠాగూర్ శనివారం తీవ్రస్థాయిలో విరుచుకుపడ్డారు. తమిళనాడు రైతుల ప్రయోజనాలకు విరుద్ధంగా శివకుమార్ మొండి వైఖరిని అవలంబిస్తున్నారని, ఆయన వ్యాఖ్యలు ఏమాత్రం ఆమోదయోగ్యం కావని ఠాగూర్ స్పష్టం చేశారు.

ప్రధాని సమక్షంలో డీకే శివకుమార్ వ్యాఖ్యలు.. రగిలిన వివాదం

శుక్రవారం మైసూరులో ప్రధాని నరేంద్ర మోదీ పాల్గొన్న కార్యక్రమంలో కర్ణాటక ముఖ్యమంత్రి డీకే శివకుమార్ మాట్లాడుతూ, మేకెదాటు ప్రాజెక్టుకు చట్టబద్ధమైన అనుమతులను వేగవంతం చేయాలని కేంద్రాన్ని కోరారు. "సర్, మీరు ఇప్పుడే కావేరి డ్యామ్‌ను చూశారు. కర్ణాటకలో మేకెదాటు నిర్మించి తీరాలని సుప్రీంకోర్టు స్పష్టమైన తీర్పు ఇచ్చింది, దీనిని ఎవరూ ఆపలేరు. మాకు చట్టపరంగా మీ సహాయం కావాలి" అని శివకుమార్ వ్యాఖ్యానించారు. ఈ వ్యాఖ్యలపై మాణికం ఠాగూర్ సోషల్ మీడియా వేదికగా తీవ్ర అభ్యంతరం వ్యక్తం చేశారు. సుప్రీంకోర్టు తీర్పును, కావేరి జల వివాదాల ట్రిబ్యునల్ తుది అవార్డును తుంగలో తొక్కేలా శివకుమార్ మాట్లాడుతున్నారని, దిగువ రాష్ట్రమైన తమిళనాడు అనుమతి లేకుండా ప్రాజెక్టుకు కేంద్రం అనుమతులు ఇవ్వడం చట్టవిరుద్ధమని ఠాగూర్ మండిపడ్డారు. మేకెదాటు వద్ద కర్ణాటక ఒక్క ఇటుక కూడా వేయకుండా అడ్డుకోవాల్సిన బాధ్యత కేంద్రంపై ఉందని, తమిళనాడు హక్కుల కోసం ఎంతకైనా పోరాడుతామని ఆయన తేల్చిచెప్పారు.

అసలు నిజాలు తెలియవు.. రావాలని శివకుమార్ కౌంటర్

తమ పార్టీ సహచరుడు మాణికం ఠాగూర్ చేసిన విమర్శలపై కర్ణాటక సీఎం డీకే శివకుమార్ ఘాటుగా స్పందించారు. మేకెదాటు డ్యామ్ నిర్మాణాన్ని ఎవరూ ఆపలేరని మరోసారి పునరుద్ఘాటించిన ఆయన, తమ రాష్ట్రాన్ని రక్షించుకోవడం ఠాగూర్ బాధ్యత అని, కానీ ఆయనకు పూర్తి వాస్తవాలు తెలియవని వ్యాఖ్యానించారు. ఠాగూర్ తన ప్రతినిధి బృందంతో కర్ణాటకకు వస్తే, తానే స్వయంగా డ్యామ్ ప్రాంతానికి తీసుకెళ్లి ఈ ప్రాజెక్టు వల్ల తమిళనాడుకు కూడా ఎలా మేలు జరుగుతుందో వివరిస్తానని శివకుమార్ పేర్కొన్నారు. బెంగళూరు తాగునీటి అవసరాలు , 400 మెగావాట్ల విద్యుత్ ఉత్పత్తి కోసం ప్రతిపాదించిన ఈ ప్రాజెక్టు వల్ల తమిళనాడు నీటి వాటాకు ఎలాంటి నష్టం ఉండదని కర్ణాటక భరోసా ఇస్తోంది.

తమిళనాడు రాజకీయాల్లో పెరిగిన వేడి.. స్టాలిన్ డిమాండ్

మరోవైపు, ఈ వివాదంపై తమిళనాడు ప్రతిపక్ష నేత, మాజీ ముఖ్యమంత్రి ఎంకే స్టాలిన్ కూడా స్పందిస్తూ రాష్ట్ర ప్రభుత్వంపై ఒత్తిడి పెంచారు. తమిళనాడుకు జీవన్మరణ సమస్య అయిన కావేరి జలాల విషయంలో ముఖ్యమంత్రి విజయ్ ప్రభుత్వం ఇకనైనా మౌనం వీడి తక్షణమే తగిన చర్యలు తీసుకోవాలని డిమాండ్ చేశారు. సవరించిన సమగ్ర ప్రాజెక్టు నివేదిక (DPR) సమర్పించేందుకు కర్ణాటక సిద్ధమవుతుండగా, తమిళనాడు ప్రభుత్వం మాత్రం ఈ ప్రాజెక్టును తీవ్రంగా వ్యతిరేకిస్తుండటంతో రెండు రాష్ట్రాల మధ్య నీటి రాజకీయాలు మరింత వేడెక్కాయి.