24 గంటలకుపైగా అంతరాయం.. మళ్లీ అందుబాటులోకి మైక్రోసాఫ్ట్ సేవలు

ప్రపంచవ్యాప్తంగా కోట్లాది మంది వినియోగదారులను ఉక్కిరిబిక్కిరి చేసిన మైక్రోసాఫ్ట్ 365 (Microsoft 365) సాంకేతిక అంతరాయం ఎట్టకేలకు సమసిపోయింది. దాదాపు 24 గంటలకు పైగా Outlook, Teams , Copilot సేవలకు ఏర్పడిన ఆటంకాన్ని పూర్తిగా పరిష్కరించి, సేవలను సాధారణ స్థితికి తీసుకొచ్చినట్లు మైక్రోసాఫ్ట్ అధికారికంగా ప్రకటించింది. కనీసం 74 దేశాలపై ప్రభావం చూపిన ఈ భారీ సాంకేతిక వైఫల్యం కారణంగా ఆధునిక డిజిటల్ ప్రపంచం ఒక్కసారిగా పాతకాలపు కాగితపు రికార్డులు, ఫోన్ లైన్లు, ఫ్యాక్స్ మెషీన్ల వైపు మళ్లాల్సి వచ్చింది.

సాంకేతిక లోపమే కారణం.. సైబర్ దాడి కాదు

నవంబర్ 12వ తేదీన అమెరికాలోని వినియోగదారులు తమ మెయిల్‌బాక్స్‌లను తెరవలేకపోవడంతో ఈ సమస్య మొదలై, కొద్దిసేపటికే ప్రపంచమంతటా విస్తరించింది. గతంలో జరిగిన నెట్‌వర్క్ సామర్థ్య నవీకరణ (కెపాసిటీ అప్‌గ్రేడ్) సమయంలో తలెత్తిన సాంకేతిక లోపం, తాజా నెట్‌వర్క్ మార్పు వల్ల బయటపడిందని మైక్రోసాఫ్ట్ వివరించింది. ఈ ఘటన వెనుక ఎలాంటి సైబర్ దాడి గానీ, ఆర్టిఫిషియల్ ఇంటెలిజెన్స్ (AI) ప్రమేయం గానీ లేదని సంస్థ స్పష్టం చేస్తూ వినియోగదారులకు కలిగిన అసౌకర్యానికి తీవ్ర విచారం వ్యక్తం చేసింది.

24 గంటల పాటు ఇంజనీర్ల కసరత్తు.. 74 దేశాల్లో ఇబ్బందులు

పలు సర్వర్లు ఆకస్మికంగా ఆఫ్‌లైన్‌లోకి వెళ్లిపోవడంతో మిగిలిన సర్వర్లపై అధిక భారం పడి వ్యవస్థ కుప్పకూలింది. సర్వర్లను తిరిగి ఆన్‌లైన్‌లోకి తెచ్చిన వెంటనే, పేరుకుపోయిన లక్షలాది ఇమెయిల్‌ల 'బ్యాక్‌లాగ్' ఒక్కసారిగా వచ్చి పడటంతో వాటిని స్థిరంగా ఉంచడం ఇంజనీర్లకు పెను సవాలుగా మారింది. ట్రాఫిక్ నియంత్రణ, పాత కాన్ఫిగరేషన్లకు మార్చడం వంటి చర్యల ద్వారా నవంబర్ 13న ఆసియా పసిఫిక్, యూరప్, ఉత్తర అమెరికా ప్రాంతాల్లో దశలవారీగా సేవలను పునరుద్ధరించారు. ఈ అంతరాయం వల్ల భారత్‌లో ఇండిగో, ఆకాశ ఎయిర్ ఇమెయిల్ సేవలకు ఆటంకం కలగగా, యూకే ఆసుపత్రులు కాగితపు రికార్డులకు, జపాన్ కంపెనీలు ఫ్యాక్స్ మెషీన్లకు మారాయి. అయితే క్యూలో నిలిచిపోయిన మెయిల్స్ డెలివరీ సమయాన్ని చూపిస్తాయని, త్వరలోనే ఈ ఘటనపై పూర్తిస్థాయి సమీక్షా నివేదికను విడుదల చేస్తామని మైక్రోసాఫ్ట్ హామీ ఇచ్చింది.