PM Modi: ఎమ్మెల్సీ ఎన్నికల్లో కాంగ్రెస్‌కు షాక్.. మోదీ సెటైర్!

PM Modi: నాలుగు రాష్ట్రాల్లో 28 ఎమ్మెల్సీ స్థానాలకు జరిగిన ఎన్నికల ఫలితాలు కాంగ్రెస్ పార్టీకి నిరాశను మిగిల్చాయి. బీహార్, మహారాష్ట్ర, ఉత్తరప్రదేశ్, కర్ణాటక రాష్ట్రాల్లో జరిగిన ఈ ఎన్నికల్లో కాంగ్రెస్ ఒక్క స్థానాన్ని కూడా గెలుచుకోలేకపోయింది. ముఖ్యంగా కర్ణాటకలో కాంగ్రెస్ ప్రభుత్వం అధికారంలో ఉన్నప్పటికీ, నాలుగు ఎమ్మెల్సీ స్థానాలనూ బీజేపీ–జేడీయూ కూటమి కైవసం చేసుకుందని వచ్చిన ఫలితాలు రాజకీయంగా చర్చనీయాంశంగా మారాయి.

కాంగ్రెస్‌పై ప్రధాని మోదీ సెటైర్

ఎన్నికల ఫలితాల నేపథ్యంలో ప్రధాని నరేంద్ర మోదీ కాంగ్రెస్ పార్టీని ఉద్దేశిస్తూ సోషల్ మీడియాలో వ్యంగ్యంగా స్పందించారు. కాంగ్రెస్ ఎన్ని స్థానాలు గెలుచుకుందో ఊహించాలంటూ ఓ పోస్టు పెట్టారు. దానికి ఎమోజీని కూడా జోడించారు. ఈ ఎన్నికలు బ్యాలెట్ పేపర్ల ద్వారా జరగడాన్ని కూడా మోదీ తన వ్యాఖ్యల్లో ప్రస్తావించారు.

12 స్థానాల్లో పోటీ.. ఒక్కటీ దక్కలేదు

నాలుగు రాష్ట్రాల్లో కలిపి 28 ఎమ్మెల్సీ స్థానాలకు ఎన్నికలు జరగగా, కాంగ్రెస్ 12 స్థానాల్లో పోటీ చేసింది. అయితే ఒక్క చోట కూడా విజయం సాధించలేకపోయింది. గతంలో ఆ పార్టీకి నాలుగు ఎమ్మెల్సీ స్థానాలు ఉండగా, తాజా ఫలితాలతో వాటిని కూడా కోల్పోయినట్లు సమాచారం. ఎన్నికల్లో ఓటమి ఎదురైనప్పుడు కాంగ్రెస్ ఈవీఎంలపై విమర్శలు చేస్తోందన్న అంశాన్ని ప్రస్తావిస్తూ మోదీ బ్యాలెట్ పేపర్లతో జరిగిన ఎన్నికల్లోనూ ఆ పార్టీ గెలవలేకపోయిందనే భావనతో సెటైర్ వేశారు.

నాలుగు రాష్ట్రాల్లో ఎన్నికలు

ఈ ఎన్నికల్లో ఉత్తరప్రదేశ్‌లో 11, బీహార్‌లో 8, మహారాష్ట్రలో 5, కర్ణాటకలో 4 ఎమ్మెల్సీ స్థానాలకు పోటీ జరిగింది. ఈ రాష్ట్రాల్లో కాంగ్రెస్ ఖాతా తెరవకపోవడం, ముఖ్యంగా కర్ణాటకలోనూ విజయం సాధించలేకపోవడం రాజకీయ వర్గాల్లో చర్చకు దారితీసింది.