Medical Shops: మెడిసిన్ కావాలా? ఇప్పుడే కొనేసుకోండి.. రేపు దేశవ్యాప్తంగా మెడికల్ షాప్స్ బంద్..!

Medical Shops: దేశవ్యాప్తంగా రేపు (బుధవారం) మెడికల్ షాపులు పూర్తిగా మూతపడనున్నాయి. ఆన్‌లైన్ వేదికగా మందుల విక్రయాలు (Online Medicine Delivery) జరపడాన్ని నిరసిస్తూ దేశవ్యాప్త బంద్‌కు పిలుపునిచ్చారు. దీంతో రోగులు, సాధారణ ప్రజలు రేపటి మందుల అవసరాల కోసం ముందస్తుగా అప్రమత్తం కావాల్సిన పరిస్థితి ఏర్పడింది.

ఆల్ ఇండియా ఆర్గనైజేషన్ ఆఫ్ కెమిస్ట్స్ అండ్ డ్రగ్గిస్ట్స్ (AIOCD) ఈ ఒకరోజు దేశవ్యాప్త ఔషధ దుకాణాల బంద్‌కు అధికారికంగా పిలుపునిచ్చింది. ఈ నిర్ణయంతో దేశవ్యాప్తంగా ఉన్న సుమారు 12 లక్షలకు పైగా రిటైల్, హోల్‌సేల్ మెడికల్ షాపులు రేపు ఉదయం నుంచి రాత్రి వరకు తమ వ్యాపారాలను పూర్తిగా నిలిపివేయనున్నాయి. రెండు తెలుగు రాష్ట్రాలైన ఆంధ్రప్రదేశ్, తెలంగాణలలోని అన్ని ప్రధాన నగరాలు, జిల్లాల్లోని ఫార్మసీలు కూడా ఈ బంద్‌లో భాగస్వామ్యం కాబోతున్నాయి.

ఇటీవలి కాలంలో ఈ-ఫార్మసీలు (E-Pharmacies) మరియు కార్పొరేట్ సంస్థలు ఆన్‌లైన్ ద్వారా భారీ డిస్కౌంట్లతో మందుల హోమ్ డెలివరీని విస్తృతం చేశాయి. దీనివల్ల దేశవ్యాప్తంగా కోట్ల మంది ఆధారపడిన సాంప్రదాయ మెడికల్ షాపుల జీవనోపాధి దెబ్బతింటోందని కెమిస్ట్ అసోసియేషన్ ఆవేదన వ్యక్తం చేస్తోంది. ఆన్‌లైన్ మందుల విక్రయాల వల్ల నకిలీ ఔషధాల చొరబాటు పెరిగే ప్రమాదం ఉందని ఆరోపిస్తున్నారు.

డాక్టర్ ప్రిస్క్రిప్షన్ లేకుండానే కొన్ని రకాల మత్తు పదార్థాలు, తీవ్రమైన యాంటీబయాటిక్స్ దుర్వినియోగం అయ్యే అవకాశం ఉందని కూడా సంఘం హెచ్చరిస్తోంది. ఈ క్రమంలోనే ఆన్‌లైన్ ఔషధ డెలివరీ విధానాన్ని పూర్తిగా వ్యతిరేకిస్తూ కేంద్ర ప్రభుత్వంపై ఒత్తిడి తెచ్చేందుకు ఈ బంద్‌ను అస్త్రంగా ఎంచుకున్నారు.

దేశవ్యాప్తంగా 12 లక్షల షాపులు మూతపడనుండటంతో నిత్యం మందులు వాడే దీర్ఘకాలిక రోగులు (షుగర్, బీపీ, హార్ట్ పేషెంట్లు) తమకు కావలసిన ఔషధాలను ఇవాళే కొనుగోలు చేసుకోవాలని నిపుణులు సూచిస్తున్నారు. అయితే, అత్యవసర కేసుల దృష్ట్యా కేవలం పెద్ద ఆసుపత్రులకు అనుబంధంగా ఉండే ఇన్‌హౌస్ మెడికల్ షాపులు మాత్రమే అత్యవసర సేవల (Emergency Services) కింద అందుబాటులో ఉండే అవకాశం ఉంది.