Police Violence : NEET నిరసనలపై సుప్రీం సీరియస్.. పోలీసులపై హై పవర్ కమిటీ

Police Violence : ఢిల్లీలోని జంతర్ మంతర్ సహా దేశవ్యాప్తంగా నీట్ (NEET) పేపర్ లీకేజీకి వ్యతిరేకంగా జరిగిన విద్యార్థుల నిరసనల సందర్భంగా చోటుచేసుకున్న హింసాత్మక ఘటనలు, పోలీసుల మితిమీరిన బలప్రయోగంపై విచారణ జరిపేందుకు సుప్రీంకోర్టు ఒక ఉన్నతాధికార కమిటీ (High-Powered Committee - HPC)ని ఏర్పాటు చేసింది. సుప్రీంకోర్టు మాజీ న్యాయమూర్తి జస్టిస్ ఆర్. సుభాష్ రెడ్డి నాయకత్వంలో పనిచేసే ఈ ప్యానెల్‌లో పంజాబ్, హర్యానా హైకోర్టు మాజీ చీఫ్ జస్టిస్ రవి శంకర్ ఝా, ఢిల్లీ హైకోర్టు మాజీ న్యాయమూర్తి జస్టిస్ శాలిందర్ కౌర్, సీబీఐ మాజీ డైరెక్టర్ రిషి కుమార్ శుక్లా, మేఘాలయ మాజీ డీజీపీ ఎల్.ఆర్. బిష్ణోయ్ సభ్యులుగా ఉన్నారు. నిరసనకారులు జరిపిన హింసతో పాటు, పోలీసులు ప్రయోగించిన బలప్రయోగం చట్టబద్ధమైనదేనా, పరిస్థితికి తగ్గట్టుగానే ఉందా అనే కోణాల్లో ఈ కమిటీ సమగ్రంగా పరిశీలించనుంది.

జంతర్ మంతర్ రణరంగం.. లాఠీచార్జ్, పెల్లెట్ గన్స్ ప్రయోగం

జూలై 20న పార్లమెంట్ వర్షాకాల సమావేశాల తొలిరోజే "కాక్రోచ్ జనతా పార్టీ" (CJP) ఆధ్వర్యంలో చేపట్టిన "సంసద్ చలో" ర్యాలీ తీవ్ర హింసాత్మకంగా మారింది. శాంతియుతంగా ప్రారంభమైన విద్యార్థుల ప్రదర్శన క్రమంగా ఉద్రిక్తంగా మారడంతో నిరసనకారులు బారికేడ్లను బద్దలు కొట్టేందుకు యత్నించారు. దీంతో వారిని అదుపు చేయడానికి పోలీసులు లాఠీచార్జ్, టియర్ గ్యాస్ ప్రయోగించడమే కాకుండా, కొన్నిచోట్ల పెల్లెట్ గన్స్ కూడా ఉపయోగించారు. ఈ ఘటనపై పార్లమెంట్ స్ట్రీట్, కన్నాట్ ప్లేస్ పోలీస్ స్టేషన్లలో పలు ఎఫ్‌ఐఆర్‌లు నమోదవగా, కొంతమంది నిరసనకారులపై హత్యాయత్నం, ప్రభుత్వ ఆస్తుల విధ్వంసం వంటి తీవ్రమైన చట్టపరమైన కేసులు నమోదు చేశారు.

విచారణ నిరంతరం.. సుప్రీంకోర్టుకు నివేదికలు

ఈ హై పవర్ కమిటీ విచారణ ప్రక్రియ ఒక్కసారితో ముగిసిపోయేది కాదని, ఇది నిరంతరం కొనసాగుతుందని సుప్రీంకోర్టు స్పష్టం చేసింది. ఈ ప్యానెల్ క్రమం తప్పకుండా పరిస్థితులను సమీక్షిస్తూ, నిర్ణీత వ్యవధిలో తన మధ్యంతర నివేదికలను కోర్టుకు సమర్పిస్తుంది. దాని ఆధారంగా అత్యున్నత న్యాయస్థానం అవసరమైన తదుపరి ఆదేశాలను, చట్టపరమైన చర్యలను ఎప్పటికప్పుడు తీసుకోనుంది.

హై పవర్ కమిటీ ప్రధానంగా పరిశీలించే అంశాలు

విచారణ ప్రక్రియలో ప్యానెల్ ప్రధానంగా మహిళా విద్యార్థులపై జరిగిన హింస, వేధింపులు , లైంగిక వేధింపుల ఆరోపణలకు అత్యంత ప్రాధాన్యత ఇస్తుంది. దీనితో పాటు విద్యార్థులకు తీవ్ర గాయాలు కావడంపై విచారించి, హెచ్చరికలు లేకుండా పెల్లెట్ గన్స్, ఎలక్ట్రిక్ బెత్తాలు, లాఠీచార్జ్, టియర్ గ్యాస్ ప్రయోగించిన పోలీసు అధికారుల శ్రేణి (Chain of command) ఎవరు, అందులో నిబంధనల ఉల్లంఘన జరిగిందా అని నిర్ధారిస్తుంది. ముఖ్యంగా పంప్-యాక్షన్ తుపాకుల నుంచి వచ్చే లోహపు పెల్లెట్ల వాడకాన్ని శాశ్వతంగా నిషేధించాల్సిన అవసరం ఉందో లేదో కూడా సమీక్షిస్తుంది.

అంతేకాకుండా, అరెస్టులు లేదా బలప్రయోగం సమయంలో పోలీసులు క్రమశిక్షణతో యూనిఫాం, గుర్తింపు కార్డులు (నేమ్‌ప్లేట్లు) ధరించారో లేదో కమిటీ తనిఖీ చేస్తుంది. నిరసనకారులపై పోలీసులు జరిపిన నిఘా విధానాలు పౌరుల వ్యక్తిగత గోప్యత, శాంతియుతంగా నిరసన తెలిపే రాజ్యాంగ హక్కులను ఉల్లంఘించాయా లేదా అనే కోణాన్ని కూడా పరిశీలిస్తుంది. చివరిగా, ఈ ఘర్షణల్లో తీవ్రంగా గాయపడిన పోలీసులు , నిరసనకారులు ఇరువర్గాలకూ మధ్యంతర పరిహారం అందించే అంశాన్ని కూడా కమిటీ మూల్యాంకనం చేయనుంది.