NEET UG 2026 Re-Exam : నీట్ అభ్యర్థులకు మరో షాక్.. హాల్‌టికెట్ల డౌన్‌లోడ్‌లో కొత్త సమస్య..!

NEET UG 2026 Re-Exam : జూన్ 21, 2026న జరగనున్న 'నీట్ యూజీ' (NEET UG) పునఃపరీక్షకు సంబంధించిన అడ్మిట్ కార్డులను జాతీయ పరీక్షల ఏజెన్సీ (NTA) విడుదల చేసింది. అయితే, ఈ హాల్‌టికెట్లను డౌన్‌లోడ్ చేసుకునే క్రమంలో విద్యార్థులు తీవ్ర సాంకేతిక ఇబ్బందులను ఎదుర్కొంటున్నారు. అభ్యర్థుల బ్యాంకు ఖాతా వివరాలను ధృవీకరించే ప్రక్రియ పూర్తి కాకపోవడంతోనే అడ్మిట్ కార్డులు ఓపెన్ కావడం లేదని తెలుస్తోంది. ఇప్పటికే సుమారు 4 లక్షల మంది అభ్యర్థులు తమ కార్డులను డౌన్‌లోడ్ చేసుకున్నారని ఎన్‌టీఏ స్పష్టం చేసింది.

సర్వర్ సమస్యలపై విద్యార్థుల ఆందోళన

అడ్మిట్ కార్డుల డౌన్‌లోడ్‌లో ఎదురవుతున్న ఇబ్బందులపై విద్యార్థులు 'X' (ట్విట్టర్) వేదికగా ఆందోళన వ్యక్తం చేస్తున్నారు. తాము బ్యాంకు వివరాలను సరిగ్గా సమర్పించినప్పటికీ, సర్వర్ లోపం కారణంగా అవి అప్‌డేట్ కావడం లేదని అభ్యర్థులు చెబుతున్నారు. సమాచారాన్ని మళ్లీ మళ్లీ ఎంటర్ చేసినా కూడా పోర్టల్ అంగీకరించడం లేదని స్క్రీన్ షాట్లను షేర్ చేస్తున్నారు. దీనిపై ఎన్‌టీఏ స్పందిస్తూ.. కొంతమంది అభ్యర్థులు సర్వర్ సమస్యలు ఎదుర్కొంటున్న మాట నిజమేనని, తమ సాంకేతిక బృందం దీనిపై నిరంతరం పని చేస్తోందని తెలిపింది. విద్యార్థులంతా ఓపికగా ఉండాలని, సమస్యల పరిష్కారం కోసం హెల్ప్‌లైన్ నంబర్లను కూడా అందుబాటులోకి తెచ్చామని పేర్కొంది.

లాగిన్ అయ్యేముందు ఇవి సిద్ధం చేసుకోండి

వెబ్‌సైట్ ఓపెన్ చేసే ముందే అభ్యర్థులు కొన్ని ముఖ్యమైన వివరాలను దగ్గర పెట్టుకోవాలని ఎన్‌టీఏ సూచించింది. దీనివల్ల సమయం వృథా కాకుండా, పొరపాట్లు జరగకుండా చూసుకోవచ్చు. విద్యార్థులు తమ పూర్తి పేరు, బ్యాంక్ ఖాతా నంబర్, ఐఎఫ్‌ఎస్‌సీ (IFSC) కోడ్‌తో పాటు రద్దు చేసిన చెక్ (Cancelled Cheque) స్కాన్ కాపీని సిద్ధంగా ఉంచుకోవాలి.

ఫీజు రీఫండ్ కోసం బ్యాంక్ వివరాలను అప్‌డేట్ చేసే విధానం

• మొదట నీట్ అధికారిక వెబ్‌సైట్‌ను సందర్శించాలి.
• హోమ్‌పేజీలో కనిపించే “ఫీజు వాపసు ధృవీకరణ లింక్” (Fee Refund Verification Link) పై క్లిక్ చేయాలి.
• ఆ తర్వాత మీ అప్లికేషన్ నంబర్, పాస్‌వర్డ్ , క్యాప్చా కోడ్‌ను ఎంటర్ చేసి లాగిన్ అవ్వాలి.
• లాగిన్ అయిన వెంటనే ఫోన్‌కు వచ్చే ఓటీపీ (OTP) ఆధారిత టూ-ఫ్యాక్టర్ అథెంటికేషన్‌ను పూర్తి చేయాలి.
• ఇప్పుడు స్క్రీన్‌పై కనిపించే మీ బ్యాంక్ ఖాతా వివరాలను జాగ్రత్తగా తనిఖీ చేసి, తప్పులుంటే సరిదిద్ది సబ్మిట్ బటన్‌పై క్లిక్ చేయాలి.
• ఈ ప్రాసెస్ పూర్తయిన తర్వాత వెబ్‌సైట్‌లోని 'నీట్ యూజీ అడ్మిట్ కార్డ్ 2026' లింక్‌పై క్లిక్ చేసి, మీ రిజిస్ట్రేషన్ నంబర్, పాస్‌వర్డ్ సాయంతో హాల్‌టికెట్‌ను డౌన్‌లోడ్ చేసుకుని ప్రింట్ తీసుకోవచ్చు.

హెలికాప్టర్లలో ప్రశ్నపత్రాల తరలింపు!

ఎన్‌టీఏ షెడ్యూల్ ప్రకారం జూన్ 21న మధ్యాహ్నం 2:00 గంటల నుండి సాయంత్రం 5:15 గంటల వరకు (మొత్తం 3 గంటల 15 నిమిషాలు) ఈ పునఃపరీక్ష జరగనుంది. అయితే ఈసారి పేపర్ లీకేజీలకు తావులేకుండా భద్రతా కారణాల దృష్ట్యా ఎన్‌టీఏ కీలక నిర్ణయం తీసుకుంది. దేశవ్యాప్తంగా ఉన్న వివిధ పరీక్షా కేంద్రాలకు ప్రశ్నపత్రాలను రోడ్డు మార్గంలో కాకుండా, భారత వైమానిక దళానికి చెందిన 'MI-17' హెలికాప్టర్ల ద్వారా నేరుగా తరలించనున్నారు.