Odisha Spy Case : పాక్ ఏజెంట్లకు సమాచారం లీక్.. ఒడిశాలో ఏడుగురికి జైలు శిక్ష.. భారీగా జరిమానా

Odisha Spy Case : ఒడిశాలో దేశ భద్రతకు ముప్పు కలిగించేలా ప్రవర్తించిన ఏడుగురు వ్యక్తులకు కోర్టు కీలక శిక్ష విధించింది. పాకిస్థాన్ ఏజెంట్లతో చేతులు కలిపి, దేశ రహస్యాలను చేరవేసిన ఈ ముఠా గుట్టును ఒడిశా పోలీసులు రట్టు చేశారు. ఫేక్ ఐడీలతో సిమ్ కార్డులు సేకరించడం, ఓటీపీల ద్వారా మోసాలకు పాల్పడటం వంటి తీవ్రమైన ఆరోపణలు నిరూపితం కావడంతో న్యాయస్థానం ఈ సంచలన తీర్పును వెలువరించింది. పాకిస్థాన్ గూఢచారి సంస్థలకు రహస్య సమాచారాన్ని చేరవేసిన కేసులో ఒడిశాలోని భువనేశ్వర్ సబ్-డివిజనల్ జ్యుడిషియల్ మేజిస్ట్రేట్ (SDJM) కోర్టు బుధవారం తుది తీర్పు వెలువరించింది. ఈ కేసులో ఏడుగురు నిందితులకు మూడు సంవత్సరాల కఠిన కారాగార శిక్షతో పాటు, ఒక్కొక్కరికి రూ.32,000 జరిమానా విధించింది. దేశాంతర్గత భద్రతపై ప్రభావం చూపేలా వీరు ప్రవర్తించారని న్యాయస్థానం తీవ్రంగా పరిగణించింది.

నిందితుల వివరాలు

ఒడిశా స్పెషల్ టాస్క్ ఫోర్స్ (STF) తెలిపిన వివరాల ప్రకారం.. శిక్ష పడిన వారిలో జాజ్‌పూర్ ప్రాంతానికి చెందిన ప్రీతం కర్, సౌమ్యరంజన్ పట్నాయక్ ఉన్నారు. అలాగే నాయగఢ్ కు చెందిన పఠాని సామంత లెంక, సరోజ్ కుమార్ నాయక్, ప్రద్యుమ్న సాహు కూడా ఉన్నారు. వీరితో పాటు మహారాష్ట్రలోని పుణెకు చెందిన అభిజీత్ సంజయ్, అసోంలోని గువహటి నివాసి ఇక్బాల్ హుస్సేన్‌లను పోలీసులు గుర్తించారు. వీరంతా ఒక వ్యవస్థీకృత ముఠాగా ఏర్పడి నేరాలకు పాల్పడ్డారు.

నేరం జరిగిన తీరు

ఈ ముఠా ప్రధానంగా నకిలీ గుర్తింపు కార్డులను ఉపయోగించి పెద్ద ఎత్తున సిమ్ కార్డులను సేకరించేవారు. ఆ సిమ్ కార్డులను యాక్టివేట్ చేసి, వాటి ద్వారా వచ్చే వన్ టైమ్ పాస్‌వర్డ్‌లను (OTP) పాకిస్థాన్ లోని గూఢచారులకు షేర్ చేసేవారు. దీనివల్ల పాక్ ఏజెంట్లు భారతీయ సోషల్ మీడియా అకౌంట్లను, వాట్సాప్ వంటి ఇతర యాప్స్ ను సులభంగా యాక్సెస్ చేసే అవకాశం కలిగింది. దేశ భద్రతకు సంబంధించిన సున్నితమైన సమాచారాన్ని హ్యాకింగ్ ద్వారా తెలుసుకోవడానికి వీరు మార్గం సుగమం చేశారు.

సెర్చింగ్ లో దొరికిన సాక్ష్యాలు

ఎస్టీఎఫ్ పోలీసులు నిర్వహించిన దాడుల్లో నిందితుల నుంచి భారీగా ఎలక్ట్రానిక్ వస్తువులను స్వాధీనం చేసుకున్నారు. ఇందులో 19 ఖరీదైన మొబైల్ ఫోన్లు, 47 యాక్టివేట్ చేసిన సిమ్ కార్డులు, 61 ఏటీఎం కార్డులు, ఒక ల్యాప్‌టాప్ ఉన్నాయి. ఈ కేసు విచారణలో భాగంగా ఒడిశా పోలీసులు ఇంటర్పోల్ సహాయం కూడా కోరారు. అయితే పాకిస్థాన్ అధికారులు తమ వైపు నుంచి ఎటువంటి సమాచారాన్ని పంచుకోకపోవడంతో, ఉన్న సాక్ష్యాధారాల ఆధారంగానే పోలీసులు చార్జ్ షీట్ దాఖలు చేసి నేరాన్ని నిరూపించారు.