Miyazaki Mango: లక్షల విలువైన మామిడి పండ్లు.. కంటిమీద కునుకు లేకుండా తోటలోనే కాపలా కాస్తున్న రైతు!

Miyazaki Mango: సాధారణంగా వేసవి కాలం వస్తే మార్కెట్లో రకరకాల మామిడి పండ్లు దర్శనమిస్తాయి. వాటి ధర కిలో వంద నుంచి రెండు వందల రూపాయల వరకు ఉంటుంది. కానీ, ఒడిశాలోని ఓ మారుమూల గ్రామానికి చెందిన రైతు పండించిన మామిడి పండు ధర తెలిస్తే ఎవరైనా ముక్కున వేలేసుకోవాల్సిందే. ఎందుకంటే ఆ మామిడి రకం కిలో ధర అంతర్జాతీయ మార్కెట్లో అక్షరాలా రూ.3 లక్షల వరకు పలుకుతుంది! ప్రపంచంలోనే అత్యంత ఖరీదైన జపాన్‌కు చెందిన 'మియాజాకి' (Miyazaki) మామిడిని పండించి ఒడిశాకు చెందిన ఓ సామాన్య రైతు ఇప్పుడు దేశవ్యాప్తంగా వార్తల్లో నిలిచాడు.

ఒడిశాలోని మల్కన్‌గిరి జిల్లా తమాస గ్రామానికి చెందిన దేబా పడియామి అనే రైతు ఈ అరుదైన ఘనత సాధించాడు. సుమారు నాలుగేళ్ల క్రితం ఓ సామాజిక కార్యకర్త ఇచ్చిన చిన్న మొక్కను ఆయన ఎంతో శ్రద్ధగా నాటారు. ఎన్నో క్లిష్టమైన వాతావరణ పరిస్థితులను తట్టుకుని, ఏళ్ల తరబడి ఓపికతో సంరక్షించిన తర్వాత ఆ చెట్టు ఇప్పుడు తొలిసారిగా ఫలాలను ఇచ్చింది.

లక్షల రూపాయల విలువైన పంట చేతికి వచ్చినప్పటికీ, ఆ రైతుకు ఆనందం కంటే ఆందోళనే ఎక్కువగా ఉంది. దొంగలు పడతారనే భయంతో దేబా పడియామి కంటిమీద కునుకు లేకుండా గడుపుతున్నాడు. "పండ్లు దొంగతనం అవుతాయేమోనని భయంగా ఉంది. అందుకే రాత్రుళ్లు ఇంట పడుకోకుండా తోటలోనే చెట్టు కిందే నిద్రిస్తూ కాపలా కాస్తున్నాను" అని ఆయన పీటీఐ (PTI) కథనంలో ఆవేదన వ్యక్తం చేశారు.

అంతేకాదు, ప్రపంచంలోనే అత్యంత ఖరీదైన పండును పండించినప్పటికీ, దానికి ఎంత ధర అడగాలో, ఎక్కడ అమ్మాలో కూడా ఆ అమాయక రైతుకు తెలియడం లేదు. మియాజాకి వంటి లగ్జరీ పండ్లకు ప్రత్యేక ప్యాకేజింగ్, రవాణా సౌకర్యాలు అవసరం కాబట్టి, తనకు ప్రభుత్వం, వ్యవసాయ నిపుణులు సహాయం చేయాలని ఆయన కోరుతున్నారు.

మియాజాకి మామిడి ఎందుకంత ప్రత్యేకం?

సాధారణ మామిడి పండ్లు పసుపు రంగులో ఉంటే.. ఈ మియాజాకి మామిడి పండినప్పుడు ముదురు ఎరుపు రంగులోకి మారి నిగనిగలాడుతూ ఉంటుంది. దీని ఆకారం, రంగు కారణంగా వీటిని 'డైనోసార్ గుడ్లు' అని కూడా పిలుస్తారు.

ఒక్కో పండు దాదాపు 350 గ్రాముల కంటే ఎక్కువ బరువు ఉంటుంది. ఇందులో కనీసం 15 శాతం చక్కెర కంటెంట్ ఉండటంతో ఇది విపరీతమైన తీపిని కలిగి ఉంటుంది.

జపాన్‌లో అత్యుత్తమ రంగు, తీపి, ఆకారం ఉన్న ఈ పండ్లను ఎంపిక చేసి వాటిని 'ఎగ్స్ ఆఫ్ ది సన్' (సూర్యుడి గుడ్లు) అనే ప్రీమియం టైటిల్‌తో పిలుస్తారు.