Pahalgam: పహల్గాం రక్తసిక్తం..ఆ నెత్తుటి జ్ఞాపకానికి ఏడాది!

Pahalgam: పర్యాటక స్వర్గధామం.. మంచు దుప్పట్లు.. లిడ్డర్ నది గలగలలు.. ప్రకృతి ప్రేమికులకు పహల్గాం అంటే ఒక అందమైన కల. కానీ సరిగ్గా ఏడాది క్రితం, 2025 ఏప్రిల్ 22న, ఆ కల రక్తసిక్తమైంది. మానవత్వం ముసుగులో వచ్చిన మృగాళ్ల తుపాకీ గుళ్లకు పహల్గాం బైసరన్ వ్యాలీ విలవిలలాడింది. నేటితో ఆ దారుణానికి ఏడాది పూర్తవుతోంది. ఆనాటి గాయం ఇంకా పచ్చిగానే ఉన్నా, భారత్ చూపిన తెగువ మాత్రం ప్రపంచ చరిత్రలో నిలిచిపోయింది.

ఆ రోజున ఏం జరిగింది?

సరిగ్గా ఏడాది క్రితం ఇదే రోజున, సైనిక దుస్తుల్లో మారువేషంలో వచ్చిన లష్కరే తోయిబా, ది రెసిస్టెన్స్ ఫ్రంట్ ఉగ్రవాదులు ఒక్కసారిగా పర్యాటకులపై విరుచుకుపడ్డారు. అమాయక పర్యాటకులు ప్రకృతిని ఆస్వాదిస్తున్న వేళ, అకస్మాత్తుగా వినిపించిన తుపాకీ గర్జనలు ఆ వ్యాలీని శ్మశానంగా మార్చాయి. 25 మంది భారతీయులతో పాటు ఒక నేపాలీ పౌరుడుతో కలిపి మొత్తం 26 మంది మరణించారు.20 మందికి పైగా అమాయకులు జీవితాంతం మాయని గాయాలతో మిగిలారు.2008 ముంబయి దాడుల తర్వాత, దేశాన్ని ఇంతలా కలిచివేసిన ఘటన మరొకటి లేదు.

ఆపరేషన్ సిందూర్..

భారత్ ఈ పిరికిపంద చర్యను చూస్తూ ఊరుకోలేదు. మన సైన్యం చేపట్టిన ఆపరేషన్ సిందూర్ ఉగ్రవాద మూలాలను వణికించింది. సరిహద్దులు దాటి వచ్చి మన వారి ప్రాణాలు తీసిన వారికి, వారి గడ్డపైనే బుద్ధి చెప్పి, భారత సైన్యం తన పరాక్రమాన్ని చాటింది. ఉగ్రవాదంపై మన దేశం అనుసరిస్తున్న 'జీరో టాలరెన్స్' విధానం కేవలం మాటల్లో కాదు, చేతల్లో ఉంటుందని ప్రపంచానికి చాటిచెప్పిన సందర్భం అది.

నేడు స్మరణ.. ప్రపంచవ్యాప్త నిరసన

ఈ విషాద వార్షికోత్సవం సందర్భంగా పహల్గాం వాతావరణం ఉద్విగ్నంగా మారింది. లిడ్డర్ నది ఒడ్డున మరణించిన 26 మంది వీరుల పేర్లతో నిర్మించిన స్మారక చిహ్నం, వారి జ్ఞాపకాలను సజీవంగా ఉంచుతోంది. వాషింగ్టన్ డీసీలోని భారత రాయబార కార్యాలయంలో The Human Cost of Terrorism పేరుతో నిర్వహిస్తున్న ప్రదర్శన, పాకిస్తాన్ ఉగ్రవాద నీడను ఎండగడుతోంది. దేశవ్యాప్తంగా బాధితుల కుటుంబాలకు సంఘీభావంగా కొవ్వొత్తుల ప్రదర్శనలు మరియు ప్రత్యేక ప్రార్థనలు నిర్వహిస్తున్నారు.