Petrol Price: పెట్రోల్ ధరల పెంపు తప్పదు.. ఈ వ్యాఖ్య‌లు చేసింది ఎవ‌రో తెలుసా?

Petrol Price: పశ్చిమాసియాలో కొనసాగుతున్న యుద్ధ వాతావరణం భారత్‌ ఆర్థిక వ్యవస్థపై కూడా ప్రభావం చూపే అవకాశం ఉందని రిజర్వ్‌ బ్యాంక్‌ ఆఫ్‌ ఇండియా గవర్నర్ సంజ‌య్ మ‌ల్హోత్రా హెచ్చ‌రించారు. స్విట్జర్లాండ్‌లో నిర్వహించిన అంతర్జాతీయ ఆర్థిక సమావేశంలో ఆయన ఈ అంశంపై కీలక వ్యాఖ్యలు చేశారు.

భారత్‌పై పశ్చిమాసియా ఉద్రిక్తతల ప్రభావం

ఇరాన్‌ సహా పశ్చిమాసియా ప్రాంతంలో నెలకొన్న ఉద్రిక్త పరిస్థితులు ప్రపంచ చమురు మార్కెట్‌ను అస్థిరంగా మారుస్తున్నాయని ఆర్‌బీఐ గవర్నర్‌ తెలిపారు. భారత్‌ పెద్ద మొత్తంలో ముడి చమురును దిగుమతి చేసుకుంటున్నందున సరఫరాలో చిన్న అంతరాయం వచ్చినా దేశీయ మార్కెట్‌పై ప్రభావం పడే అవకాశముందని చెప్పారు.

ప్రస్తుతం చమురు ధరల పెరుగుదల ప్రభావాన్ని తగ్గించేందుకు కేంద్ర ప్రభుత్వం కొన్ని పన్నుల్లో తగ్గింపులు చేసినట్లు ఆయన గుర్తుచేశారు. చమురు కంపెనీలు కూడా కొంతవరకు నష్టాలను భరిస్తూ ధరలను నియంత్రిస్తున్నాయని పేర్కొన్నారు. అయితే ఈ పరిస్థితి దీర్ఘకాలం కొనసాగడం కష్టమని స్పష్టం చేశారు.

ఇంధన ధరలు పెరిగితే ద్రవ్యోల్బణం తప్పదా?

పెట్రోల్‌, డీజిల్‌ ధరలు పెరగడం అంటే కేవలం వాహనదారులపై మాత్రమే భారం పడటం కాదు. దేశవ్యాప్తంగా సరుకు రవాణా ఖర్చులు పెరిగి అన్ని వస్తువుల ధరలపై ప్రభావం చూపుతుందని ఆర్థిక నిపుణులు చెబుతున్నారు.

ఆర్‌బీఐ గవర్నర్‌ కూడా ఇదే అంశాన్ని ప్రస్తావించారు. చమురు ధరలు పెరిగితే రవాణా, ఉత్పత్తి వ్యయాలు అధికమై ద్రవ్యోల్బణం పెరిగే ప్రమాదం ఉందన్నారు. ముఖ్యంగా ఆహార వస్తువులు, నిత్యావసరాల ధరలు ప్రభావితమయ్యే అవకాశం ఉందని పేర్కొన్నారు.

ఇంధన వినియోగంపై మోదీ సూచనలు

ఇంధన వినియోగాన్ని తగ్గించాల్సిన అవసరం ఉందని ఇటీవల హైద‌రాబాద్‌లో జ‌రిగిన స‌భ‌లో ప్రధాని న‌రేంద్ర మోదీ కూడా ప్రజలకు సూచించిన విష‌యం తెలిసిందే. సాధ్యమైనంత వరకు వ్యక్తిగత వాహనాల వినియోగాన్ని తగ్గించి ప్రజా రవాణా సేవలను ఉపయోగించాలని కోరారు. అదే సమయంలో బంగారం కొనుగోళ్లను కూడా కొంతకాలం వాయిదా వేసుకోవాలని ప్రజలకు పిలుపునిచ్చారు. దేశ విదేశీ మారక నిల్వలపై ఒత్తిడి తగ్గించడమే ఈ సూచనల వెనుక ఉద్దేశమని ఆర్థిక వర్గాలు భావిస్తున్నాయి.

బంగారం సుంకాల పెంపు..

కేంద్ర ప్రభుత్వం బంగారం దిగుమతులపై కస్టమ్స్‌ సుంకాన్ని 6 శాతం నుంచి 15 శాతానికి పెంచింది. ఈ నిర్ణయం తర్వాత దేశంలో బంగారం ధరలు ఒక్కసారిగా పెరిగాయి. ఇప్పటికే మార్కెట్‌లో ఇంధన ధరల పెంపుపై చర్చ జరుగుతున్న సమయంలో ఆర్‌బీఐ గవర్నర్‌ చేసిన వ్యాఖ్యలు మరింత ప్రాధాన్యం సంతరించుకున్నాయి. పశ్చిమాసియా పరిస్థితులు మరింత విషమిస్తే త్వరలోనే పెట్రోల్‌, డీజిల్‌ ధరల్లో మార్పులు కనిపించే అవకాశం ఉందన్న అంచనాలు పెరుగుతున్నాయి.