PM Modi: ప్ర‌ధాని వీడియోల వివాదం నేప‌థ్యంలో.. మెటా ఇండియా హెడ్‌పై కేసు న‌మోదు

PM Modi: ప్రధాని నరేంద్ర మోదీకి సంబంధించిన కృత్రిమ మేథ‌ (AI) ఆధారిత వీడియోలు, అభ్యంతరకర పోస్టులు సోషల్ మీడియా వేదికల్లో వైరల్ కావడం దేశవ్యాప్తంగా చర్చనీయాంశమైంది. ఈ వ్యవహారంపై హైదరాబాద్ సైబర్ క్రైమ్ పోలీసులు కీలక చర్యలు చేపట్టారు. మెటా ఇండియా అధిపతి అరుణ్ శ్రీనివాస్‌తో పాటు పలు సోషల్ మీడియా ఖాతాల నిర్వాహకులపై కేసు నమోదు చేసి దర్యాప్తు ప్రారంభించారు.

బీజేపీ కార్యకర్తల ఫిర్యాదుతో కేసు నమోదు

ఫేస్‌బుక్, ఇన్‌స్టాగ్రామ్ వంటి మెటా ఆధ్వర్యంలోని సోషల్ మీడియా వేదికల్లో ప్రధాని మోదీని లక్ష్యంగా చేసుకుని నకిలీ వీడియోలు, అభ్యంతరకర కంటెంట్ ప్రచారం జరుగుతోందని భాజపా కార్యకర్తలు హైదరాబాద్ సైబర్ క్రైమ్ పోలీసులకు ఫిర్యాదు చేశారు. ఈ ఫిర్యాదు ఆధారంగా పోలీసులు ఎఫ్‌ఐఆర్ నమోదు చేసి విచారణ చేపట్టారు.

AI వీడియోలపై దర్యాప్తు ముమ్మరం

పోలీసులు ప్రస్తుతం వైరల్ అయిన వీడియోలు, పోస్టులు ఏ సోషల్ మీడియా ఖాతాల నుంచి అప్లోడ్ అయ్యాయో గుర్తించే పనిలో ఉన్నారు. ముఖ్యంగా AI సాంకేతికతతో రూపొందించిన వీడియోలు ఎలా వ్యాప్తి చెందాయనే అంశంపై సాంకేతిక ఆధారాలు సేకరిస్తున్నారు. అవసరమైతే సంబంధిత సోషల్ మీడియా సంస్థల నుంచి వివరాలు కూడా కోరనున్నట్లు తెలుస్తోంది.

నీట్ నిరసనల తర్వాత వైరల్ అయిన పోస్టులు

నీట్ ప్రశ్నపత్రం లీక్ ఘటనకు వ్యతిరేకంగా ఢిల్లీలో జరిగిన నిరసనల సమయంలో ప్రధాని మోదీకి సంబంధించిన పలు తప్పుడు వార్తలు, AI ఆధారిత వీడియోలు సోషల్ మీడియాలో విస్తృతంగా షేర్ అయ్యాయి. కేంద్ర ప్రభుత్వం అప్పట్లోనే వాటిని ఖండిస్తూ ప్రజలు తప్పుడు ప్రచారాన్ని నమ్మవద్దని స్పష్టం చేసింది. అయినప్పటికీ అలాంటి కంటెంట్ మళ్లీ వైరల్ కావడంతో ఈ అంశం మరోసారి తెరపైకి వచ్చింది.

మెటాపై కేంద్రం ఇప్పటికే అసంతృప్తి

ఇటీవల ప్రధాని నరేంద్ర మోదీ సోషల్ మీడియాలో షేర్ చేసిన సెల్ఫీ వీడియో కొంతసేపు డిలీట్ చేసిన‌ ఘటన కూడా వివాదానికి దారితీసింది. దీనిపై స్పందించిన మెటా, అది సాంకేతిక లోపం వల్ల జరిగిన పొరపాటేనని వివరణ ఇచ్చి క్షమాపణలు తెలిపింది. అయితే ఆ వివరణతో సంతృప్తి చెందని కేంద్ర ప్రభుత్వం సంస్థకు సమన్లు జారీ చేసింది. ఈ వ్యవహారంపై మెటా ప్రతినిధులు కేంద్ర ఐటీ శాఖ అధికారులతో సమావేశమై వివరణ ఇవ్వనున్నట్లు సమాచారం.

కొనసాగుతోన్న ద‌ర్యాప్తు

ప్రస్తుతం హైదరాబాద్ సైబర్ క్రైమ్ పోలీసులు ఈ కేసును అన్ని కోణాల్లో దర్యాప్తు చేస్తున్నారు. వైరల్ వీడియోల అసలు సోర్స్‌, వాటిని ప్రచారం చేసిన అకౌంట్‌లు, AI వినియోగం జరిగిన విధానం వంటి అంశాలపై సాంకేతిక పరిశీలన కొనసాగుతోంది. దర్యాప్తు ఆధారంగా తదుపరి చర్యలు తీసుకునే అవకాశం ఉందని అధికారులు తెలిపారు.