PM Modi: 40 ఏళ్ల నిరీక్షణకు ముగింపు పలకండి: మహిళా బిల్లుపై ప్రధాని మోదీ ట్వీట్

PM Modi: దేశ చరిత్రలో కీలక ఘట్టంగా భావిస్తున్న మహిళా రిజర్వేషన్ బిల్లు (నారీ శక్తి వందన్ అధినియమ్)తో పాటు 131వ రాజ్యాంగ సవరణ, డీలిమిటేషన్ బిల్లులపై నేడు లోక్‌సభలో ఓటింగ్ జరగనుంది. ఈ క్రమంలో ప్రధాని నరేంద్ర మోదీ ‘ఎక్స్‌’ (ట్విట్టర్) వేదికగా స్పందిస్తూ, పార్టీలన్నీ రాజకీయాలకు అతీతంగా ఈ బిల్లుకు మద్దతు తెలపాలని కోరారు.

నాలుగు దశాబ్దాల నిరీక్షణకు ముగింపు!

"మహిళా రిజర్వేషన్ బిల్లుపై దాదాపు 40 ఏళ్లుగా రాజకీయాలు జరిగాయి. కానీ, దేశ జనాభాలో సగభాగంగా ఉన్న మహిళలు తమ హక్కులను పొందే సమయం ఇప్పుడు ఆసన్నమైంది" అని ప్రధాని పేర్కొన్నారు. స్వాతంత్ర్యం వచ్చి ఇన్ని సంవత్సరాలైనా నిర్ణయాధికార ప్రక్రియలో మహిళలకు సరైన ప్రాతినిధ్యం లేకపోవడం సరికాదని ఆయన అభిప్రాయపడ్డారు. నిన్న రాత్రి ఒంటి గంట వరకు పార్లమెంట్‌లో సుదీర్ఘ చర్చ జరిగిందని, బిల్లులపై ఉన్న అన్ని అపోహలను ప్రభుత్వం స్పష్టంగా నివృత్తి చేసిందని గుర్తు చేశారు.

"కాసేపట్లో లోక్‌సభలో ఓటింగ్ జరగనుంది. అన్ని రాజకీయ పార్టీలు ఈ బిల్లును లోతుగా పరిశీలించి, మహిళా రిజర్వేషన్‌కు అనుకూలంగా ఓటు వేయాలని మనస్ఫూర్తిగా కోరుతున్నాను" అని ప్రధాని విన్నవించారు. రాజ్యాంగ సవరణ కావడంతో ఈ బిల్లు నెగ్గాలంటే సభ్యుల మెజారిటీ మద్దతు తప్పనిసరి. ఈ నేపథ్యంలో ప్రధాని పిలుపుకు విపక్షాల స్పందన ఎలా ఉంటుందనేది ఆసక్తికరంగా మారింది.