PM Modi: డిసెంబర్‌లో అమెరికాలో ప్రధాని మోదీ పర్యటన?.. ట్రంప్‌తో కీలక భేటీకి రంగం సిద్ధం!

PM Modi: భారత ప్రధాని నరేంద్ర మోదీ డిసెంబర్‌లో అమెరికాలో పర్యటించే అవకాశాలు కనిపిస్తున్నాయి. డిసెంబర్ 14, 15 తేదీల్లో ట్రంప్ సర్కార్ ఫ్లోరిడాలో జీ20 సదస్సుకు ఆతిథ్యం ఇవ్వనున్న నేపథ్యంలో ఈ పర్యటన జరగనున్నట్లు తెలుస్తోంది. ఈ సదస్సు సందర్భంగా అమెరికా అధ్యక్షుడు డొనాల్డ్ ట్రంప్, ప్రధాని మోదీ మధ్య ద్వైపాక్షిక భేటీ జరిగే అవకాశం ఉందని సంబంధిత వర్గాలు వెల్లడించాయి. అయితే, దీనిపై భారత ప్రభుత్వం నుంచి అధికారిక ప్రకటన వెలువడాల్సి ఉంది.

రష్యా, ఇరాన్‌లపై ఆంక్షలు విధించేందుకు, వాటితో వాణిజ్యం కొనసాగిస్తున్న భారత్, చైనాలపై సుంకాల మోత మోగించేందుకు అమెరికా ప్రభుత్వం తీసుకువచ్చిన ‘ద లిండ్సే ఓ గ్రాహం శాంక్షనింగ్‌ రష్యా అండ్‌ ఇరాన్‌ బిల్లు’పై ఇటీవల ట్రంప్ సంతకం చేశారు. ఈ బిల్లు ప్రకారం అమెరికాకు భారత్ ఎగుమతి చేసే వస్తువులపై 100 శాతం వరకు సుంకాలు విధించే అధికారం అధ్యక్షుడికి దఖలు పడింది.

ఈ సుంకాల ముప్పు నేపథ్యంలో ప్రధాని పర్యటన ప్రాధాన్యత సంతరించుకుంది. మోదీ-ట్రంప్ మధ్య భేటీ జరిగే అవకాశాన్ని భారత్‌లోని అమెరికా రాయబారి సెర్గియోగోర్ ఇటీవల సూచనప్రాయంగా వెల్లడించారు. ఈ సమావేశంలో వాణిజ్య పరమైన సవాళ్లు, సుంకాల అంశాలపై చర్చించే అవకాశం ఉన్నట్లు రాజకీయ విశ్లేషకులు భావిస్తున్నారు.