Operation Sindoor : పహల్గామ్ దాడికి పక్కా ప్రతీకారం.. ఆపరేషన్ సింధూర్ సక్సెస్‌పై ప్రధాని మోదీ భావోద్వేగ ట్వీట్

Operation Sindoor : భారత సైనిక పరాక్రమానికి నిదర్శనంగా నిలిచిన ఆపరేషన్ సింధూర్ జరిగి నేటికి ఏడాది పూర్తయింది. ఈ సందర్భాన్ని పురస్కరించుకుని ప్రధానమంత్రి నరేంద్ర మోదీ తన సోషల్ మీడియా వేదికగా భారత జవాన్లకు ఘన నివాళులర్పించారు. గతేడాది పహల్గామ్ ఉగ్రదాడికి ప్రతీకారంగా చేపట్టిన ఈ మెరుపు దాడులు శత్రువుల గుండెల్లో వణుకు పుట్టించాయి. నేడు ఈ చారిత్రాత్మక విజయానికి ఒక ఏడాది పూర్తయిన తరుణంలో ప్రధాని మోదీ తన X ప్రొఫైల్ పిక్చర్‌ను మార్చి దేశభక్తిని చాటుకున్నారు.

ఆపరేషన్ సింధూర్ నేపథ్యం

సరిగ్గా ఏడాది క్రితం అంటే మే 7, 2025న భారత సైన్యం ఆపరేషన్ సింధూర్‎ను అత్యంత రహస్యంగా, సమర్థవంతంగా నిర్వహించింది. ఏప్రిల్ 22న పహల్గామ్‌లో జరిగిన ఉగ్రదాడిలో 26 మంది అమాయక పర్యాటకులు ప్రాణాలు కోల్పోయారు. ఈ క్రూరమైన చర్యకు ప్రతీకారంగా భారత ప్రభుత్వం ఉగ్రవాద స్థావరాలను తుడిచిపెట్టాలని నిర్ణయించింది. ఈ నేపథ్యంలో సరిహద్దు దాటి వెళ్లిన మన వాయుసేన, సైనిక దళాలు పాక్ ఆక్రమిత కాశ్మీర్ మరియు పాకిస్థాన్‌లోని సుమారు 9 ఉగ్రవాద శిబిరాలపై మెరుపు దాడులు చేశాయి.

100 మంది ఉగ్రవాదులు హతం

ఈ ఆపరేషన్ ద్వారా జైష్-ఏ-మహమ్మద్ ప్రధాన కార్యాలయం ఉన్న బహవల్పూర్, లష్కరే తోయిబా స్థావరం మురిద్కే వంటి కీలక ప్రాంతాల్లో భారత్ వైమానిక దాడులు జరిపింది. ఈ మెరుపు దాడుల్లో సుమారు 100 మందికి పైగా ఉగ్రవాదులు మరణించినట్లు సమాచారం. ముజఫరాబాద్, కోట్లీ, భింబర్ వంటి ప్రాంతాల్లో ఉన్న ఉగ్రవాద మౌలిక సదుపాయాలను భారత సైన్యం ధ్వంసం చేసింది. ఇది భారతదేశం న్యూ నార్మల్ పాలసీని ప్రపంచానికి చాటిచెప్పింది. అంటే, భారత్ ఎప్పుడూ ఉగ్రవాదాన్ని ఉపేక్షించదని, అవసరమైతే శత్రువు అడ్డాలోకి వెళ్లి మరీ కొడుతుందని ఈ ఆపరేషన్ నిరూపించింది.

ప్రధాని మోదీ సందేశం

ఆపరేషన్ సింధూర్ వార్షికోత్సవం సందర్భంగా ప్రధాని మోదీ ట్వీట్ చేస్తూ.. "ఏడాది క్రితం మన సాయుధ దళాలు అసమానమైన ధైర్యం, ఖచ్చితత్వం, సంకల్పాన్ని ప్రదర్శించాయి. పహల్గామ్‌లో అమాయక భారతీయులపై దాడి చేసిన వారికి తగిన బుద్ధి చెప్పారు. మన జవాన్ల శౌర్యానికి యావత్ దేశం సెల్యూట్ చేస్తోంది" అని పేర్కొన్నారు. ఉగ్రవాదానికి మద్దతు ఇచ్చే వ్యవస్థను పూర్తిగా నాశనం చేసే వరకు భారత్ విశ్రమించదని ఆయన స్పష్టం చేశారు. రక్షణ రంగంలో భారత్ సాధిస్తున్న స్వయం సమృద్ధి వల్ల మన భద్రత మరింత పటిష్టమైందని ఆయన కొనియాడారు.

Operation Sindoor
Justice served.
Precise in action, eternal in memory—Operation Sindoor continues.
India forgets nothing-India forgives nothing.#operation #Sindoor #operationsindoor #IAF @PMOIndia@rajnathsingh@DefenceMinIndia@SpokespersonMoD@HQ_IDS_India@adgpi… pic.twitter.com/GWvnY9Udjl

— Indian Air Force (@IAF_MCC) May 6, 2026

భారత సైన్యం జస్టిస్ సర్వ్డ్ వీడియో

ఈ ప్రత్యేక సందర్భాన్ని పురస్కరించుకుని భారత సైన్యం కూడా ఒక ప్రత్యేక వీడియోను విడుదల చేసింది. ఆపరేషన్ సింధూర్ అనేది కేవలం ఒక సైనిక చర్య మాత్రమే కాదని, అది భారతదేశ సార్వభౌమత్వానికి, న్యాయానికి ప్రతీక అని సైన్యం పేర్కొంది. సోషల్ మీడియాలో #JusticeServed అనే హ్యాష్ ట్యాగ్‌తో షేర్ చేసిన ఈ వీడియో ప్రస్తుతం వైరల్ అవుతోంది. పహల్గామ్ బాధితుల కుటుంబాలకు న్యాయం జరిగిందని, ఉగ్రవాదాన్ని వేళ్లతో సహా పెకిలించే వరకు పోరాటం కొనసాగుతుందని సైన్యం ఈ వీడియో ద్వారా చాటిచెప్పింది.