Praggnanandhaa Grand : చెస్‌లో ప్రజ్ఞానంద చరిత్ర.. తొలి భారత ఛాంపియన్..

Praggnanandhaa Grand : అగ్రశ్రేణి భారత చెస్ క్రీడాకారుడు రామేశ్‌బాబు ప్రజ్ఞానంద సరికొత్త చరిత్ర సృష్టించాడు. అమెరికాలోని సెయింట్ లూయిస్ వేదికగా జరిగిన ప్రతిష్టాత్మక 'గ్రాండ్ చెస్ టూర్' (Grand Chess Tour 2026) ఫైనల్లో ఫాబియానో కరూనాను ఓడించి, ఈ టైటిల్ గెలుచుకున్న తొలి భారతీయ చెస్ క్రీడాకారుడిగా సరికొత్త రికార్డు నెలకొల్పాడు. క్లాసికల్, ర్యాపిడ్ , బ్లిట్జ్ అనే మూడు ఫార్మాట్లలో సాగిన ఈ ఉత్కంఠభరిత పోరులో 21 ఏళ్ల ప్రజ్ఞానంద అద్భుతమైన పునరాగమనం చేసి 15-13 పాయింట్ల తేడాతో విజయాన్ని అందుకున్నాడు.

ఓటమి అంచుల నుంచి సంచలన పునరాగమనం

ఫైనల్ మ్యాచ్ ఆరంభంలో ప్రజ్ఞానందకు గట్టి ఎదురుదెబ్బ తగిలింది. క్లాసికల్ ఫార్మాట్‌లో కరూనా చేతిలో 3-9 తేడాతో వెనుకబడ్డాడు. అయితే ఏమాత్రం సైలెంట్ అవ్వకుండా, ఆ తర్వాత జరిగిన ర్యాపిడ్ సెక్షన్‌లో చెలరేగిపోయి ఏకంగా 8-0తో విజయం సాధించి స్కోరును సమం చేశాడు. ఇక ఆఖరిగా జరిగిన నిర్ణయాత్మక బ్లిట్జ్ వర్షన్‌లో ఇరువురు ఆటగాళ్లు 4-4తో హోరాహోరీగా పోరాడటంతో, ఓవరాల్‌గా 15-13 పాయింట్ల తేడాతో ప్రజ్ఞానంద అగ్రస్థానాన్ని కైవసం చేసుకున్నాడు. ఈ టోర్నీ నియమాల ప్రకారం క్లాసికల్ గెలిస్తే 6 పాయింట్లు, ర్యాపిడ్‌లో విజయం సాధిస్తే 4 పాయింట్లు, బ్లిట్జ్‌లో గెలిస్తే 2 పాయింట్లు లభిస్తాయి.

రూ. 1.90 కోట్ల భారీ ప్రైజ్ మనీ

గ్రాండ్ చెస్ టూర్ 2026 టైటిల్ గెలుచుకోవడం ద్వారా చెన్నైకి చెందిన ఈ యంగ్ స్టార్ ఏకంగా $200,000 (సుమారు రూ. 1.90 కోట్లు) ప్రైజ్ మనీని సొంతం చేసుకున్నాడు. రన్నరప్‌గా నిలిచిన కరూనాకు $125,000 లభించాయి. ఇక మూడో స్థానం కోసం జరిగిన ప్లేఆఫ్ మ్యాచ్‌లో జర్మనీకి చెందిన విన్సెంట్ కీమర్‌పై విజయం సాధించిన అమెరికా ఆటగాడు వెస్లీ సో $75,000 పొందగా, నాల్గో స్థానంలో నిలిచిన కీమర్ $50,000 అందుకున్నాడు.

టోర్నీ ప్రయాణం , భవిష్యత్ అవకాశాలు

రెగ్యులర్ సీజన్ ముగిసేసరికి టోర్నీలోనే నంబర్-1 సీడ్‌గా నిలిచిన ప్రజ్ఞానంద, నాకౌట్ రౌండ్ సెమీఫైనల్లో 19-9 తేడాతో విన్సెంట్ కీమర్‌ను చిత్తు చేసి ఫైనల్‌కు చేరాడు. ఆగస్టు 21 నుండి 28 వరకు జరిగిన ఈ గ్రాండ్ ఫినాలేలో అగ్రస్థానం సాధించడంతో పాటు, ప్రజ్ఞానందతో సహా మొదటి మూడు స్థానాల్లో నిలిచిన ఆటగాళ్లకు 2027 గ్రాండ్ చెస్ టూర్‌కు నేరుగా అర్హత (ఆహ్వానం) లభించింది. 2018లో కేవలం 13 ఏళ్ల వయసులోనే గ్రాండ్‌మాస్టర్‌గా మారిన ప్రజ్ఞానంద, ప్రస్తుతం 2750 రేటింగ్‌తో ఫిడే (FIDE) క్లాసికల్ ర్యాంకింగ్స్‌లో ప్రపంచ 12వ స్థానంలో కొనసాగుతున్నాడు. అదానీ గ్రూప్ మద్దతుతో ముందుకు సాగుతున్న ఈ యంగ్ ఛాంపియన్ విజయం పట్ల దేశవ్యాప్తంగా ప్రశంసలు వెల్లువెత్తుతున్నాయి.