Priyanka Gandhi: మహిళా బిల్లు వీగిపోవడం ప్రజాస్వామ్యానికి దక్కిన అతిపెద్ద విజయం!

Priyanka Gandhi: లోక్‌సభలో మహిళా రిజర్వేషన్ రాజ్యాంగ సవరణ బిల్లు ఆమోదం పొందకపోవడంపై కాంగ్రెస్ అగ్రనేత, ఎంపీ ప్రియాంక గాంధీ సంచలన వ్యాఖ్యలు చేశారు. బిల్లు వీగిపోవడాన్ని ఆమె 'ప్రజాస్వామ్యానికి దక్కిన అతిపెద్ద విజయంగా' అభివర్ణించారు. ప్రభుత్వం ప్రవేశపెట్టిన ఈ బిల్లు మహిళల సాధికారత కంటే, నియోజకవర్గాల పునర్విభజన (డీలిమిటేషన్) వంటి రాజకీయ పరమైన ప్రయోజనాల కోసమే తెచ్చారని ఆమె ఆరోపించారు.

విపక్షాలన్నీ ఏకతాటిపైకి వచ్చి ప్రభుత్వ వ్యూహాన్ని సమర్థవంతంగా తిప్పికొట్టాయని ప్రియాంక పేర్కొన్నారు. తద్వారా లోక్‌సభలో అధికార పక్షాన్ని నిలువరించగలిగామని, ఇది ప్రతిపక్షాల ఐక్యతకు నిదర్శనమని ఆమె స్పష్టం చేశారు. "ప్రభుత్వానికి ఇది ఒక చీకటి రోజు. కేంద్ర ప్రభుత్వం ప్రతిపాదించిన ఒక కీలక బిల్లు లోక్‌సభలో ఓడిపోవడం వారి వైఫల్యానికి నిదర్శనం" అని ఆమె ధ్వజమెత్తారు.

మహిళా రిజర్వేషన్ల పేరుతో ప్రభుత్వం ప్రజలను మభ్యపెట్టాలని చూస్తోందని, కానీ వారి అసలు ఉద్దేశాలను ప్రజలు గమనిస్తున్నారని ప్రియాంక వ్యాఖ్యానించారు. పార్లమెంటులో అధికార పక్షానికి ఇదొక గట్టి ఎదురుదెబ్బ అని, మహిళల హక్కుల పేరుతో సాగుతున్న 'రాజకీయ క్రీడ'కు విపక్షాలు అడ్డుకట్ట వేశాయని ఆమె పునరుద్ఘాటించారు. ఈ ఓటమి పట్ల ఎన్డీయే ప్రభుత్వం సమాధానం చెప్పాలని ఆమె డిమాండ్ చేశారు.