Prakash Raj: కర్ణాటకలో ప్రకాశ్ రాజ్‌కు నిరసన సెగ.. 'గో బ్యాక్' అంటూ ఆందోళనలు!

Prakash Raj: కర్ణాటక విద్యావర్ధక సంఘం 50వ వార్షికోత్సవాల ముగింపు సదస్సుకు ముఖ్య అతిథిగా విచ్చేసిన ప్రముఖ బహుభాషా నటుడు ప్రకాశ్ రాజ్ కు వ్యతిరేకంగా కొన్ని హిందూ, బీజేపీ అనుబంధ సంఘాలు ఆందోళనకు దిగాయి. ఈ కార్యక్రమం వద్ద తీవ్ర ఉద్రిక్తత చోటుచేసుకుంది.

"నటుడు ప్రకాశ్ రాజ్‌కు వ్యతిరేకంగా 'గో బ్యాక్' నినాదాలు చేయగా, మరోవైపు ఆయనకు మద్దతుగా కొందరు నినాదాలు చేశారు. ఈ ఉద్రిక్తత నడుమ పోలీసులు రంగప్రవేశం చేసి ఆందోళనకారులను అదుపులోకి తీసుకున్నారు."

బీజేపీకి చెందిన సవితా అమరశెట్టి, రాహుల్ మల్లిగవాడ నేతృత్వంలోని ప్రతినిధులు, పలు సంఘాల కార్యకర్తలు ప్రకాశ్ రాజ్‌కు వ్యతిరేకంగా ‘గో బ్యాక్ ప్రకాశ్ రాజ్’ అంటూ నినాదాలు చేశారు. అదే సమయంలో ప్రకాశ్ రాజ్‌కు మద్దతుగా మరికొందరు ‘ప్రకాశ్ రాజ్‌కు స్వాగతం’ అంటూ ప్లకార్డులతో నినాదాలు చేయడంతో అక్కడ గందరగోళం వాతావరణం నెలకొంది.

విద్యావర్ధక సంఘం వేదిక ముందు ఏర్పాటు చేసిన నటుడు ప్రకాశ్ రాజ్ ఫ్లెక్సీ బ్యానర్‌కు వ్యతిరేక వర్గం వారు మసి పూసి, దాన్ని చించివేశారు.

పరిస్థితి చేయి దాటకుండా ఉండేందుకు వెంటనే అప్రమత్తమైన పోలీసులు, నటునికి వ్యతిరేకంగా నినాదాలు చేసిన ఆందోళనకారులను బలవంతంగా వాహనంలోకి ఎక్కించి అక్కడి నుంచి తరలించారు.

కార్యక్రమం విజయవంతంగా ముగిసిన అనంతరం, ఎలాంటి అవాంఛనీయ సంఘటనలు జరగకుండా పోలీసులు భారీ భద్రతా నడుమ ప్రకాశ్ రాజ్‌ను సురక్షితంగా అక్కడి నుంచి తరలించారు.