Pune : ఆసుపత్రిలో బాంబు.. వెయ్యి మంది పోలీసులను ముప్పుతిప్పలు పెట్టిన యువకుడు

Pune : మహారాష్ట్రలోని పుణెలో ఓ యువకుడు చేసిన పని ఇప్పుడు దేశవ్యాప్తంగా చర్చనీయాంశమైంది. తన వైద్యం కోసం డబ్బులు వసూలు చేయాలన్న పిచ్చి ఆలోచనతో ఏకంగా ఆసుపత్రిలో బాంబు పెట్టానంటూ కలకలం రేపాడు. ఈ ఒక్క దెబ్బతో దాదాపు వెయ్యి మంది పోలీసులు, బాంబు స్క్వాడ్ సభ్యులు అప్రమత్తమై నగరాన్ని జల్లెడ పట్టారు. చివరకు నిందితుడు పక్కా ప్లాన్‌తో తప్పించుకోవాలని చూసినా, అతను చేసిన ఒకే ఒక్క చిన్న పొరపాటు పోలీసులకు క్లూ ఇచ్చింది. ఫలితంగా ఉగ్రవాద వ్యతిరేక దళం (ATS) అతడిని నాగ్‌పుర్ రైల్వే స్టేషనులో పట్టుకుంది.

సోలాపుర్‌కు చెందిన శివాజీ రాథోడ్ అనే యువకుడు గత కొంతకాలంగా అనారోగ్యంతో బాధపడుతున్నాడు. తన చికిత్స కోసం సుమారు రూ.7 లక్షలు అవసరం కావడంతో, సులభంగా డబ్బు సంపాదించాలని ఒక ప్రమాదకరమైన ప్లాన్ వేశాడు. పుణెలోని హడప్‌సర్ ప్రాంతంలో ఉన్న కామధేను ఎస్టేట్ ఏరియాలోని ఒక ప్రైవేట్ ఆసుపత్రిని టార్గెట్ చేశాడు. ఆ ఆసుపత్రిలో బాంబు ఉందని బెదిరించి యాజమాన్యం నుంచి డబ్బు వసూలు చేయాలని పథకం పన్నాడు. ఇందుకోసం నిజమైన బాంబులా కనిపించేలా ఒక పరికరాన్ని తయారు చేశాడు.

శివాజీ ఒక అట్టపెట్టెను తీసుకుని అందులో ఒక డిజిటల్ క్లాక్, నాలుగు పైపులు, కొన్ని వైర్లను పెట్టి టేపుతో అతికించాడు. చూడటానికి ఇది అచ్చం బాంబులాగే ఉంది. దీన్ని తీసుకువెళ్లి ఆసుపత్రి రెండో అంతస్తులోని మరుగుదొడ్లో దాచిపెట్టాడు. బుధవారం ఆసుపత్రి సిబ్బంది ఆ అనుమానాస్పద వస్తువును గుర్తించడంతో ఒక్కసారిగా భయాందోళనలు మొదలయ్యాయి. వెంటనే రంగంలోకి దిగిన పోలీసులు ఆసుపత్రిని ఖాళీ చేయించి, బాంబు స్క్వాడ్‌ను రప్పించారు. అయితే పరీక్షించగా అది డమ్మీ బాంబు అని తేలడంతో అందరూ ఊపిరి పీల్చుకున్నారు.

బాంబు పెట్టే సమయంలో పరికరాలను అతికించడానికి వాడిన టేపు అయిపోవడంతో శివాజీ ఆసుపత్రి సమీపంలోని ఒక చిన్న దుకాణానికి వెళ్లాడు. అక్కడ టేపు కొని, నగదు ఇవ్వకుండా తన ఫోన్ నుంచి ఆన్‌లైన్ పేమెంట్ చేశాడు. నిందితుడి కోసం గాలిస్తున్న పోలీసులకు దుకాణదారుడి వద్ద ఉన్న ఈ డిజిటల్ లావాదేవీ కీలక ఆధారంగా మారింది. ఆ ఫోన్ నంబర్, ఖాతా వివరాల ఆధారంగా అతడు ఎక్కడ ఉన్నాడో కనిపెట్టారు. నాగ్‌పుర్ రైల్వే స్టేషనులో నేపాల్ పారిపోయేందుకు సిద్ధంగా ఉన్న శివాజీని పోలీసులు అదుపులోకి తీసుకున్నారు.

నిందితుడు తన సోదరి వద్దకు నేపాల్‌కు పారిపోయేందుకు ప్లాన్ చేశాడని అధికారులు వెల్లడించారు. ప్రాథమిక విచారణలో ఇతడికి ఎలాంటి ఉగ్రవాద సంస్థలతో సంబంధాలు లేవని, కేవలం డబ్బు కోసమే ఈ పని చేశాడని తేలింది. అయినప్పటికీ, ప్రజల ప్రాణాలతో చెలగాటం ఆడుతూ, ప్రభుత్వ యంత్రాంగాన్ని పరుగులు పెట్టించినందుకు అతడిపై కఠిన సెక్షన్ల కింద కేసు నమోదు చేశారు. ప్రస్తుతం పోలీసులు శివాజీని పుణె తరలించి విచారిస్తున్నారు.