Raghav Chadha: రాఘవ్ చద్దా సంచలన నిర్ణయం: "సరైన వ్యక్తినే.. కానీ తప్పుడు పార్టీలో ఉన్నాను!

Raghav Chadha: దేశ రాజధాని రాజకీయాల్లో పెను సంచలనం నమోదైంది. ఆమ్ ఆద్మీ పార్టీ వ్యవస్థాపక సభ్యుడు, కీలక నేత రాఘవ్ చద్దా తన పదవికి రాజీనామా చేసి భారతీయ జనతా పార్టీలో చేరనున్నట్లు ప్రకటించారు. కేవలం ఆయన ఒక్కరే కాకుండా, పార్టీకి చెందిన మెజారిటీ రాజ్యసభ సభ్యులు కూడా తనతో పాటు కమలం గూటికి చేరుతున్నారని వెల్లడించడంతో ఆప్ భవిష్యత్తు ప్రశ్నార్థకంగా మారింది.

సంచలన విలేకరుల సమావేశం

ఢిల్లీలో సీనియర్ పార్లమెంట్ సభ్యులు అశోక్ మిట్టల్, సందీప్ పాఠక్‌లతో కలిసి రాఘవ్ చద్దా మీడియా ముందుకు వచ్చారు. ఈ సందర్భంగా ఆయన మాట్లాడుతూ, గత పదిహేనేళ్లుగా పార్టీ అభివృద్ధి కోసం ఎంతో కృషి చేశానని, అయితే ప్రస్తుత పరిస్థితుల్లో పార్టీ తన ఆశయాలకు దూరమైందని ఆవేదన వ్యక్తం చేశారు. ఒకప్పుడు అవినీతి నిర్మూలనే లక్ష్యంగా పుట్టిన పార్టీ, నేడు తన ప్రాథమిక సూత్రాలను వదిలివేసిందని ఆయన విమర్శించారు.

రాజ్యసభలో విలీనం దిశగా అడుగులు

ఆమ్ ఆద్మీ పార్టీకి రాజ్యసభలో మొత్తం పది మంది సభ్యులు ఉన్నారు. పార్టీ ఫిరాయింపుల నిరోధక చట్టం నుండి తప్పించుకోవాలంటే మూడింట రెండొంతుల మంది సభ్యులు కలిసి నిర్ణయం తీసుకోవాల్సి ఉంటుంది. ఇదే విషయాన్ని ప్రస్తావిస్తూ, తనతో పాటు ఏడుగురు సభ్యులు బీజేపీలో విలీనం కావడానికి సిద్ధంగా ఉన్నారని రాఘవ్ చద్దా ప్రకటించారు. ఇందులో ప్రముఖ మాజీ క్రికెటర్ హర్భజన్ సింగ్, స్వాతి మాలివాల్ వంటి కీలక నేతల పేర్లు వినిపించడం రాజకీయ వర్గాల్లో ప్రకంపనలు సృష్టిస్తోంది.

అసంతృప్తికి గల కారణాలు

గత కొంతకాలంగా పార్టీ నాయకత్వంపై రాఘవ్ చద్దా తీవ్ర అసంతృప్తితో ఉన్నట్లు సమాచారం. ఇటీవల ఆయనను రాజ్యసభలో పార్టీ ఉప నాయకుడి బాధ్యతల నుండి తొలగించి, అశోక్ మిట్టల్‌కు ఆ పదవిని కట్టబెట్టడం చద్దాకు మింగుడుపడలేదు. తాను సరైన వ్యక్తినే అయినప్పటికీ, తప్పుడు పార్టీలో ఉన్నానని గ్రహించానని, అందుకే ప్రజలకు సేవ చేసేందుకు బీజేపీని ఎంచుకుంటున్నానని ఆయన స్పష్టం చేశారు.

కేజ్రీవాల్‌కు గట్టి ఎదురుదెబ్బ

ఇప్పటికే పలు చట్టపరమైన చిక్కులు , రాజకీయ సవాళ్లను ఎదుర్కొంటున్న అరవింద్ కేజ్రీవాల్‌కు ఇది కోలుకోలేని దెబ్బ అని చెప్పవచ్చు. పార్టీలో అత్యంత నమ్మకస్తుడిగా పేరున్న రాఘవ్ చద్దా ఇలాంటి నిర్ణయం తీసుకోవడం ఆప్ ఉనికినే ప్రమాదంలో పడేసే అవకాశం ఉంది. ఈ పరిణామం ఢిల్లీ , పంజాబ్ రాజకీయాల్లో ఎలాంటి మార్పులకు దారితీస్తుందోనని విశ్లేషకులు ఆసక్తిగా గమనిస్తున్నారు.