Rahul Gandhi: "పోలీసులకు, లాఠీలకు భయపడొద్దు": 'చలో దిల్లీ'పై రాహుల్ గాంధీ సంచలన పిలుపు!

Rahul Gandhi: దేశంలో 'ఓటు చోరీ'కి వ్యతిరేకంగా ఇండియా (INDIA) కూటమి ప్రతిష్టాత్మకంగా తలపెట్టిన 'చలో దిల్లీ రామ్‌లీలా మార్చ్' (Chalo Delhi Ramlila March) నిర్వహణపై కాంగ్రెస్ అగ్రనేత రాహుల్ గాంధీ ఏమాత్రం వెనక్కి తగ్గడం లేదు. దీపావళి పండుగ సీజన్ వ్యాపారాలు దెబ్బతింటాయని దిల్లీ వ్యాపార సంఘాలు వేడుకుంటున్నా.. నవంబరు 1న రామ్‌లీలా మైదానంలో నిరసన ర్యాలీ నిర్వహించడానికే ఆయన మొగ్గు చూపారు. ఈ మేరకు ప్రజలందరినీ ఆహ్వానిస్తూ సోషల్ మీడియా 'ఎక్స్' (X) వేదికగా రాహుల్ సంచలన పోస్ట్ చేశారు.

"ప్రజాస్వామ్యాన్ని పరిరక్షించేందుకు, ఓటు చోరీని అడ్డుకునేందుకు, రాజ్యాంగాన్ని కాపాడుకునేందుకు ఈ మార్చ్ నిర్వహిస్తున్నాం. ఇది ఏ ఒక్క రాజకీయ పార్టీకి చెందిన ర్యాలీ కాదు" అని స్పష్టం చేశారు. ప్రధానమంత్రి నరేంద్ర మోదీ, కేంద్ర హోంమంత్రి అమిత్ షా, సీఈసీ జ్ఞానేశ్ కుమార్ విధానాలతో విసిగిపోయిన సాధారణ ప్రజలంతా ఈ నిరసనలో పాల్గొనవచ్చని పిలుపునిచ్చారు.

"పోలీసులకు, లాఠీ ఛార్జీలకు భయపడొద్దు. మాతో కలిసి అడుగులు వేయండి. రాజ్యాంగాన్ని, భారత జాతిని కాపాడుకోవడానికి కలిసి నడుద్దాం. ఇది దేశయాత్ర.. ఇది మీ యాత్ర" అని రాహుల్ రాసుకొచ్చారు.

దీపావళి సీజన్ కావడం వల్ల నవంబరు 1న చేపట్టే నిరసనల కారణంగా రామ్‌లీలా మైదానం పరిసరాల్లో దాదాపు రూ. 10,000 కోట్ల వ్యాపారంపై దెబ్బపడుతుందని 'ఛాంబర్ ఆఫ్ ట్రేడ్ అండ్ ఇండస్ట్రీ' (CTI) ఆందోళన వ్యక్తం చేస్తూ, నిరసనను నవంబరు 10కి వాయిదా వేయాలని కోరింది.

"మీ సమస్యలు మాకు అర్థమవుతున్నాయి. కానీ రోడ్లను మూసివేసి, మెట్రోలను నిలిపివేసి దేశ రాజధానిని లాక్‌డౌన్‌లో ఉంచింది ప్రభుత్వమే. ఒకవేళ దేశంలో ఓట్లే చోరీకి గురైతే.. ఇక మీ దుకాణాలు, సేవింగ్స్, పిల్లల భవిష్యత్తు ఏదీ సురక్షితంగా ఉండదు. సీఈసీ జ్ఞానేశ్ కుమార్‌ను వెంటనే తొలగించాలని ప్రధాని మోదీకి చెప్పండి.. అప్పుడు కేవలం 30 సెకన్లలోనే ఈ నిరసనలన్నీ ఆగిపోతాయి!" అని కాంగ్రెస్‌ ఎంపీ వెల్లడించిన సంగతి తెలిసిందే.