Rahul Gandhi: ఆర్థిక సునామీ రాబోతోంది.. కేంద్రం ఎమర్జెన్సీ విధించినా ఆశ్చర్యం లేదు

Rahul Gandhi: దేశంలో త్వరలోనే ఒక పెద్ద ‘ఆర్థిక సునామీ’ రాబోతోందని, ప్రభుత్వ కీలక వ్యవస్థల్లో అంతర్గతంగా అసంతృప్తి తీవ్రస్థాయిలో పెరుగుతోందని కాంగ్రెస్ అగ్రనేత రాహుల్ గాంధీ చేసిన వ్యాఖ్యలు జాతీయ రాజకీయాల్లో తీవ్ర దుమారం రేపుతున్నాయి. మున్ముందు దేశంలో ప్రజా వ్యతిరేకతను అణచి వేయడానికి కేంద్రంలోని మోదీ ప్రభుత్వం అవసరమైతే ఎమర్జెన్సీని (Emergency) విధించినా ఆశ్చర్యపోనక్కర్లేదంటూ రాహుల్ గాంధీ విమర్శలు గుప్పించారు. అయితే, ఈ వ్యాఖ్యలపై భారతీయ జనతా పార్టీ (BJP) నుండి అంతే తీవ్రమైన స్పందన వచ్చింది. రాహుల్ గాంధీ ప్రజల్లో లేనిపోని భయాలు సృష్టిస్తున్నారంటూ బీజేపీ ఐటీ సెల్ కన్వీనర్ అమిత్ మాలవీయ సోషల్ మీడియా వేదికగా చురకలు అంటించారు.

రాహుల్ గాంధీ చేసిన ఆరోపణలను తిప్పికొడుతూ అమిత్ మాలవీయ ‘ఎక్స్’ (X) లో ఒక సుదీర్ఘమైన పోస్ట్ పెట్టారు. కాంగ్రెస్ పార్టీ ఎప్పుడూ దేశంలో వినాశనాన్ని సృష్టించడానికే చూస్తుందని, కానీ భాజపా దేశాన్ని దృఢంగా ముందుకు తీసుకెళ్తోందని స్పష్టం చేశారు.

"రాహుల్ గాంధీ చెప్తున్న దానికి, దేశంలోని వాస్తవ పరిస్థితులకు అస్సలు సంబంధమే లేదు. అసలైన ఆర్థిక సునామీ 2011 నుండి 2013 మధ్య కాంగ్రెస్ (UPA) హయాంలోనే వచ్చింది. ఆ సమయంలో భారత రూపాయి విలువ ఏకంగా 36 శాతం కుంగిపోయింది. దేశ విదేశీ మారకద్రవ్య నిల్వలు (Forex Reserves) 294 బిలియన్ డాలర్ల నుండి 256 బిలియన్ డాలర్లకు పడిపోయాయి. అప్పట్లో ద్రవ్యోల్బణం (ఇన్‌ఫ్లేషన్) దేశాన్ని ఎలా పీడించిందో అందరికీ తెలుసు. నాడు కాంగ్రెస్ తీసుకున్న నిర్ణయాలు దేశాన్ని తీవ్రంగా బలహీనపరిచాయి" అని మాలవీయ గుర్తు చేశారు.

ప్రస్తుతం ప్రపంచవ్యాప్తంగా అనేక ఆర్థిక సవాళ్లు, షాక్‌లు ఎదురవుతున్నప్పటికీ.. భారతదేశం నిస్సహాయంగా ఏమీ లేదని, గత దశాబ్ద కాలంలో మోదీ ప్రభుత్వం ఆర్థిక వ్యవస్థను ఎంతో బలోపేతం చేసిందని మాలవీయ వివరించారు. దేశం దృఢంగా ముందుకు వెళ్తోందనడానికి ఆయన క్రింది పాయింట్లను ఉదాహరణగా చూపారు:

దేశంలో విద్యుత్ వినియోగం, సరికొత్త వాహనాల విక్రయాలు (Vehicle Sales) నిరంతరం పెరుగుతున్నాయి. ఈవే బిల్ (e-Way Bill) జనరేషన్‌లో భారీ వృద్ధి కనిపిస్తోంది. దేశంలో ద్రవ్యోల్బణం పూర్తిగా అదుపులో ఉంది. భవిష్యత్తు అవసరాలకు సరిపడా ఆహార ధాన్యాల నిల్వలు, పటిష్టమైన విదేశీ మారకద్రవ్య నిల్వలు భారత్ వద్ద సిద్ధంగా ఉన్నాయి.

గత కొన్నేళ్లుగా ప్రపంచాన్ని కుదిపేసిన కొవిడ్ మహమ్మారి, రష్యా-ఉక్రెయిన్ యుద్ధం, అంతర్జాతీయంగా ముడిచమురు (Crude Oil) ధరల హెచ్చుతగ్గులు, గ్లోబల్ సప్లై చైన్ అంతరాయాలు మరియు పశ్చిమాసియాలో చోటుచేసుకుంటున్న ఉద్రిక్తతలు వంటి ఎన్నో అంతర్జాతీయ షాక్‌లు తగిలినా తట్టుకొనేలా మోదీ ప్రభుత్వం దేశాన్ని తీర్చిదిద్దిందని మాలవీయ పేర్కొన్నారు. "ప్రజలను భయపెట్టి రాజకీయాలు చేయడం మానుకోండి" అంటూ రాహుల్ గాంధీ వ్యాఖ్యలపై ఆయన తీవ్రస్థాయిలో విరుచుకుపడ్డారు.