బాణసంచా గిడ్డంగిలో భారీ పేలుడు.. ఇద్దరు మృతి

రాజస్థాన్‌లోని నాగౌర్ జిల్లా పోలీస్ స్టేషన్ పరిధిలోని బద్లీ గ్రామంలో గురువారం ఒక బాణసంచా గిడ్డంగి (గోడౌన్)లో సంభవించిన ఘోర పేలుడు తీవ్ర కలకలం రేపింది. ఈ ప్రమాదంలో ఇద్దరు వ్యక్తులు అక్కడికక్కడే ప్రాణాలు కోల్పోగా, మరొకరు తీవ్రంగా గాయపడ్డారు. పేలుడు దాటికి భవనం ధ్వంసమవ్వడమే కాకుండా చుట్టుపక్కల ప్రాంతాలు తీవ్రంగా కంపించాయి.

ఎగిరిపడ్డ శరీర భాగాలు.. శిథిలమైన ఇళ్లు

పేలుడు జరిగిన సమయంలో గిడ్డంగిలో ముగ్గురు వ్యక్తులు ఉన్నారు. గన్‌పౌడర్‌కు నిప్పు అంటుకోవడంతో జరిగిన ఈ పేలుడు తీవ్రత ఎంత భయానకంగా ఉందంటే, ఆ శబ్దం కొన్ని కిలోమీటర్ల దూరం వరకు విస్ఫోటనంలా వినిపించింది. ప్రమాద ధాటికి మృతుల శరీర భాగాలు ఎగిరిపడి సమీపంలోని ఇళ్లపై పడ్డాయి. ఆ ప్రాంతంలో ఉన్న పలు ఇళ్లు కూడా పాక్షికంగా దెబ్బతిన్నాయి. సమాచారం అందుకున్న వెంటనే పోలీసులు, అగ్నిమాపక సిబ్బంది, 108 అంబులెన్స్‌లు ఘటనా స్థలానికి చేరుకున్నాయి. ఫైర్ సిబ్బంది కష్టపడి మంటలను అదుపులోకి తెచ్చారు.

బావమరుదుల దుర్మరణం.. ఆసుపత్రిలో మరొకరు

ఈ దుర్ఘటనలో మరణించిన వారిని బావమరుదులైన మహమ్మద్ అమీర్, ముజీబ్‌లుగా పోలీసులు గుర్తించారు. ప్రమాదంలో తీవ్రంగా గాయపడిన మూడో వ్యక్తిని వెంటనే నాగౌర్‌లోని జవహర్‌లాల్ నెహ్రూ (జెఎల్‌ఎన్) ప్రభుత్వ ఆసుపత్రికి తరలించి అత్యవసర చికిత్స అందిస్తున్నారు.

దర్యాప్తు చేపట్టిన అధికారులు

సంఘటనా స్థలాన్ని పరిశీలించిన నాగౌర్ తహసీల్దార్ నరసింగ్ ట్యాంక్, సర్కిల్ ఆఫీసర్ జతిన్ జైన్‌లు మాట్లాడారు. ఆ ప్రదేశంలో చాలా కాలంగా గన్‌పౌడర్, బాణసంచా నిల్వ చేస్తున్నారని, యజమానుల వద్ద దీనికి సంబంధించిన చట్టబద్ధమైన లైసెన్సులు, అవసరమైన పత్రాలు ఉన్నాయని ప్రాథమిక విచారణలో తేలిందని తెలిపారు. గన్‌పౌడర్‌కు అకస్మాత్తుగా నిప్పు అంటుకోవడమే పేలుడుకు ప్రధాన కారణమని భావిస్తున్నామని, అసలు ప్రమాదం ఎలా జరిగిందనే దానిపై పూర్తిస్థాయి దర్యాప్తు జరిపి తదుపరి వివరాలు వెల్లడిస్తామని అధికారులు స్పష్టం చేశారు.