Rajya Sabha Elections 2026: రాజ్యసభ ఎన్నికల షెడ్యూల్ విడుదల: జూన్ 18న పోలింగ్.. ఏపీలో 4 స్థానాలకు ఎన్నికలు

Rajya Sabha Elections 2026: దేశంలో రాజ్యసభ ఎన్నికల నగారా మోగింది. రాబోయే జూన్, జులై నెలల్లో మొత్తం 24 మంది రాజ్యసభ సభ్యుల పదవీకాలం ముగియనుండటంతో.. ఖాళీ కాబోయే ఆయా స్థానాలకు కేంద్ర ఎన్నికల సంఘం (ECI) ఎన్నికల షెడ్యూల్‌ను విడుదల చేసింది. 10 రాష్ట్రాల పరిధిలోని ఈ 24 రాజ్యసభ స్థానాలకు జూన్ 18న పోలింగ్ నిర్వహించనున్నట్లు ఈసీ ప్రకటించింది.

ఎన్నికల పూర్తి షెడ్యూల్ వివరాలు:

జూన్ 1: ఎన్నికల నోటిఫికేషన్ విడుదల

జూన్ 8: నామినేషన్ల దాఖలుకు చివరి తేదీ

జూన్ 9: నామినేషన్ల పరిశీలన

జూన్ 11: నామినేషన్ల ఉపసంహరణకు గడువు

జూన్ 18: ఉదయం నుంచి పోలింగ్.. అదే రోజు సాయంత్రం 5 గంటల నుంచి ఓట్ల లెక్కింపు

జూన్ 20: లోగా ఎన్నికల ప్రక్రియ పూర్తి కానుంది.

ఆంధ్రప్రదేశ్‌లో నాలుగు స్థానాలకు ఎన్నిక:

తెలుగు రాష్ట్రమైన ఆంధ్రప్రదేశ్ నుంచి ప్రాతినిధ్యం వహిస్తున్న నలుగురు రాజ్యసభ సభ్యుల పదవీకాలం ఈ ఏడాది జూన్ 26తో ముగియనుంది. వైఎస్సార్ కాంగ్రెస్ పార్టీ (YCP) తరపున ప్రాతినిధ్యం వహిస్తున్న పిల్లి సుభాష్ చంద్రబోస్, ఆళ్ల అయోధ్య రామిరెడ్డి, పరిమళ్ నత్వానీలతో పాటు సానా సతీష్‌ల పదవీకాలం పూర్తి కానుండటంతో ఏపీలోని ఈ నాలుగు స్థానాలకు కూడా జూన్ 18నే పోలింగ్ జరగనుంది. ఈ ఎన్నికల నోటిఫికేషన్ వెలువడనుండటంతో అటు ఢిల్లీతో పాటు ఇటు ఏపీ రాజకీయాల్లోనూ అప్పుడే సందడి మొదలైంది.