Samrat Choudhary: బిహార్ సీఎంగా సమ్రాట్ చౌధరి ప్రమాణస్వీకారం..!

Samrat Choudhary: బిహార్ రాజకీయాల్లో నూతన అధ్యాయం మొదలైంది. బీజేపీ సీనియర్ నేత సమ్రాట్ చౌధరి బిహార్ 21వ ముఖ్యమంత్రిగా ఈరోజు ప్రమాణస్వీకారం చేశారు. రాజ్‌భవన్‌లో జరిగిన వేడుకలో గవర్నర్ సయ్యద్ అతా హస్నైన్ ఆయనతో పదవీ ప్రమాణం చేయించారు.

బిహార్‌లో భారతీయ జనతా పార్టీ (BJP) తరపున ముఖ్యమంత్రి పదవిని చేపట్టిన మొట్టమొదటి నాయకుడిగా సమ్రాట్ చౌధరి రికార్డు సృష్టించారు. ఇప్పటివరకు కూటమిలో జూనియర్ భాగస్వామిగా లేదా ఉపముఖ్యమంత్రి పదవులకే పరిమితమైన బీజేపీ, తొలిసారిగా ముఖ్యమంత్రి పీఠాన్ని దక్కించుకుంది.

జేడీ(యూ) అధినేత నీతీష్ కుమార్ రాజ్యసభకు ఎన్నిక కావడంతో మంగళవారం తన సీఎం పదవికి రాజీనామా చేశారు. సమ్రాట్ చౌధరితో పాటు బిజేంద్ర ప్రసాద్ యాదవ్, విజయ్ కుమార్ చౌధరిలు ఉప ముఖ్యమంత్రులుగా బాధ్యతలు స్వీకరించారు.

సీఎంగా బాధ్యతలు చేపట్టిన సమ్రాట్ చౌధరికి మాజీ ముఖ్యమంత్రి నీతీష్ కుమార్ అభినందనలు తెలిపారు. కొత్త ప్రభుత్వానికి తన పూర్తి సహకారం ఉంటుందని 'ఎక్స్' వేదికగా ప్రకటించారు.