Traffic E-Challans: పెండింగ్ చలాన్లపై సుప్రీంకోర్టు సీరియస్.. ఈ సేవలపై ప్రభావం!

Traffic E-Challans: ట్రాఫిక్ నిబంధనలు ఉల్లంఘించినప్పుడు విధించే ఈ-చలాన్లను చాలామంది వెంటనే చెల్లించకుండా పెండింగ్‌లో ఉంచుతుంటారు. అయితే ఇకపై అలా చేస్తే ఇబ్బందులు తప్పకపోవచ్చు. పెండింగ్‌లో ఉన్న ట్రాఫిక్ చలాన్లను తప్పనిసరిగా వసూలు చేయాలని సుప్రీంకోర్టు రాష్ట్రాలు, కేంద్ర పాలిత ప్రాంతాలను ఆదేశించింది.

వాహనానికి చలాన్ జారీ చేయడంతో ప్రక్రియ పూర్తయినట్లు కాదని, దానికి సంబంధించిన జరిమానాను కూడా తప్పనిసరిగా వసూలు చేయాలని కోర్టు స్పష్టం చేసింది. దేశవ్యాప్తంగా భారీ మొత్తంలో ట్రాఫిక్ జరిమానాలు వసూలు కాకుండా పెండింగ్‌లో ఉన్న నేపథ్యంలో సుప్రీంకోర్టు ఈ ఆదేశాలు జారీ చేసింది.

రూ.49 వేల కోట్లకు పైగా పెండింగ్ చలాన్లు

కోర్టుకు సమర్పించిన వివరాల ప్రకారం దేశవ్యాప్తంగా సుమారు రూ.49,194 కోట్లకు పైగా ఈ-చలాన్లు పెండింగ్‌లో ఉన్నాయి. ఇందులో ఇప్పటివరకు దాదాపు రూ.26,175 కోట్లను అధికారులు వసూలు చేశారు. ఇంకా భారీ మొత్తంలో జరిమానాలు పెండింగ్‌లో ఉండటంతో మిగిలిన మొత్తాన్ని కూడా వసూలు చేసేందుకు కఠిన చర్యలు తీసుకోవాలని సుప్రీంకోర్టు సూచించింది.

వాహన సేవలపై ప్రభావం

పెండింగ్ చలాన్లను చెల్లించకుండా అలాగే ఉంచితే వాహనానికి సంబంధించిన పలు సేవలు పొందడంలో ఇబ్బందులు ఎదురయ్యే అవకాశం ఉంది. ముఖ్యంగా వాహనం రిజిస్ట్రేషన్ సర్టిఫికెట్ (RC) రెన్యువల్, డూప్లికేట్ RC జారీ, వాహన యజమాని చిరునామా మార్పు వంటి సేవలను నిలిపివేయవచ్చు.

అలాగే వాహనానికి ఫిట్‌నెస్ సర్టిఫికెట్ జారీ చేసే విషయంలోనూ ప్రభావం పడే అవకాశం ఉంది. పదేపదే ట్రాఫిక్ నిబంధనలు ఉల్లంఘిస్తూ చలాన్లు చెల్లించకుండా ఉంటే డ్రైవింగ్ లైసెన్స్‌పై కూడా చర్యలు తీసుకునే అవకాశం ఉందని తెలుస్తోంది.

చలాన్లను నిర్లక్ష్యం చేయొద్దు

ఇప్పటివరకు పెండింగ్ చలాన్లను తర్వాత చెల్లించవచ్చనే ఉద్దేశంతో వదిలేసిన వాహనదారులు ఇకపై మరింత జాగ్రత్తగా ఉండాల్సి ఉంటుంది. చలాన్ బకాయిలను పెంచుకుంటూ పోతే భవిష్యత్తులో వాహనానికి సంబంధించిన కీలక సేవలు పొందడంలో సమస్యలు ఎదురయ్యే అవకాశం ఉండటంతో, పెండింగ్ జరిమానాలను సకాలంలో చెల్లించడం మంచిదని అధికారులు సూచిస్తున్నారు.