Supreme Court: నీట్ విద్యార్థులకు సుప్రీంకోర్టు సంచలన తీర్పు.. ఆందోళనకారులపై కేసులన్నీ రద్దు

Supreme Court: నీట్-యూజీ (NEET-UG) 2026 ప్రశ్నపత్రం లీకేజీ వ్యవహారం దేశవ్యాప్తంగా సంచలనం సృష్టించిన నేపథ్యంలో, ఆందోళనలు నిర్వహించిన విద్యార్థులు, యువతకు సుప్రీంకోర్టు ఊరటనిచ్చింది. కాక్రోచ్ జనతా పార్టీ (CJP) ఆధ్వర్యంలో జరిగిన నిరసనల్లో పాల్గొన్న వారిపై దేశవ్యాప్తంగా నమోదైన ఎఫ్‌ఐఆర్‌లను రద్దు చేస్తూ సర్వోన్నత న్యాయస్థానం మంగళవారం కీలక ఉత్తర్వులు జారీ చేసింది. రాజ్యాంగంలోని ఆర్టికల్ 142 కల్పించిన ప్రత్యేక అధికారాలను ఉపయోగించి ఈ నిర్ణయం తీసుకున్నట్లు కోర్టు తెలిపింది.

భారత ప్రధాన న్యాయమూర్తి (CJI) సూర్యకాంత్ నేతృత్వంలోని జస్టిస్ జాయ్‌మాల్య బాగ్చి, జస్టిస్ వి.మోహనలతో కూడిన త్రిసభ్య ధర్మాసనం ఈ పిటిషన్‌ను విచారించింది. విద్యార్థుల భవిష్యత్తు, ప్రజా ప్రయోజనాలను దృష్టిలో ఉంచుకుని ఈ కేసులను మూసివేయాలని కేంద్ర ప్రభుత్వం, ఢిల్లీ పోలీసులు సహా పలు రాష్ట్ర ప్రభుత్వాలు కోర్టును అభ్యర్థించాయి. వారి విజ్ఞప్తిని అంగీకరించిన ధర్మాసనం, ఎఫ్‌ఐఆర్‌లపై ఎలాంటి దర్యాప్తు జరపరాదని స్పష్టం చేసింది. అంతేకాకుండా, ఈ నిరసనలకు సంబంధించి భవిష్యత్తులో కొత్తగా ఎలాంటి ఎఫ్‌ఐఆర్‌లు నమోదు చేయరాదని ఆదేశించింది.

జులై 20 నుంచి 25 మధ్య ఢిల్లీలోని జంతర్ మంతర్ కేంద్రంగా, అలాగే మహారాష్ట్ర, బిహార్, అసోం, పశ్చిమ బెంగాల్ తదితర రాష్ట్రాల్లో నీట్ పేపర్ లీక్‌కు వ్యతిరేకంగా నిరసనలు హోరెత్తాయి. ఈ ఆందోళనల సమయంలో జరిగిన ఘర్షణల్లో కొందరు పోలీసులు గాయపడ్డారు. ఈ నేపథ్యంలో, తీవ్రమైన నేర చరిత్ర ఉన్నట్లు ఢిల్లీ పోలీసులు గుర్తించిన సుమారు 2,873 మందిపై ఈ ఆదేశాలు వర్తించవని కోర్టు స్పష్టం చేసింది. ఆస్తి నష్టం లేదా శారీరక దాడులకు పాల్పడిన వారిపై పరిమితమైన ఎఫ్‌ఐఆర్‌లతో విచారణ జరపవచ్చని పేర్కొంది. సుప్రీంకోర్టు తీర్పు వెలువడిన వెంటనే, సెప్టెంబర్ 5న ఢిల్లీలో తలపెట్టిన తమ నిరసన కార్యక్రమాన్ని విరమించుకుంటున్నట్లు CJP ప్రకటించింది.

తన ముందున్న ఏ కేసులోనైనా 'సంపూర్ణ న్యాయం' చేయడానికి సుప్రీంకోర్టుకు రాజ్యాంగంలోని ఆర్టికల్ 142 అపారమైన ప్రత్యేక అధికారాలను ఇస్తుంది. గతంలో అయోధ్య తీర్పు, భోపాల్ గ్యాస్ దుర్ఘటన వంటి చారిత్రాత్మక కేసుల్లోనూ సర్వోన్నత న్యాయస్థానం ఈ ఆర్టికల్‌ను ఉపయోగించడం గమనార్హం.