Supreme Court: న్యాయ వ్యవస్థకు ఏఐ హాలూసినేషన్స్ పెద్ద ముప్పు.. సుప్రీంకోర్టు సంచలన తీర్పు!

Supreme Court: న్యాయ ప్రక్రియలో కృత్రిమ మేధ (Artificial Intelligence - AI) దుర్వినియోగం కావడంపై భారత సర్వోన్నత న్యాయస్థానం తీవ్ర ఆందోళన వ్యక్తం చేసింది. సరైన ధ్రువీకరణ లేని, ఏఐ టూల్స్ ద్వారా సృష్టించబడిన కల్పిత సమాచారం న్యాయ వ్యవస్థ సమగ్రతను తీవ్రంగా దెబ్బతీస్తుందని సుప్రీం కోర్టు హెచ్చరించింది. కోర్టుల్లో ఏఐ వినియోగాన్ని నియంత్రించాల్సిన అవసరం ఎంతైనా ఉందని స్పష్టం చేస్తూ.. దీనిపై సమగ్ర పరిశీలన జరిపి, మార్గదర్శకాలను రూపొందించేందుకు ఒక ఉన్నత స్థాయి కమిటీని ఏర్పాటు చేయాలని బార్ కౌన్సిల్ ఆఫ్ ఇండియా (BCI)ను ఆదేశించింది.

ఎస్సెల్ ఇన్‌ఫ్రా ప్రాజెక్ట్స్ దివాలా (Insolvency) కేసులో నేషనల్ కంపెనీ లా ట్రిబ్యునల్ (NCLT) ఇచ్చిన తీర్పుపై జస్టిస్ పీఎస్ నరసింహ, జస్టిస్ ఆలోక్ అరాధేలతో కూడిన సుప్రీం ధర్మాసనం తీవ్రంగా స్పందించింది. ఈ కేసు విచారణలో ఎన్‌సీఎల్‌టీ తన తీర్పు కోసం ఉనికిలోనే లేని, పూర్తిగా నకిలీ పూర్వ తీర్పులను (Legal Precedents) ప్రస్తావించినట్లు ధర్మాసనం గుర్తించింది. ఆర్టిఫిషియల్ ఇంటెలిజెన్స్ (AI) టూల్స్ వాడటం వల్ల సృష్టించబడిన ఈ తప్పుడు సమాచారాన్ని నిజమైన తీర్పులుగా భ్రమించి ట్రిబ్యునల్ ఈ పెద్ద తప్పు చేసిందని సుప్రీంకోర్టు స్పష్టం చేసింది.

"నిజానికి లేని ఒక పూర్వ తీర్పును ఏఐ సాయంతో కల్పించి, దాని ఆధారంగా కోర్టులు తీర్పులు ఇవ్వడం న్యాయ ప్రక్రియకు అత్యంత హానికరం. ఇలాంటి కల్పిత, నకిలీ సమాచారాన్ని న్యాయస్థానాల్లో ప్రస్తావించడంపై మేము 'జీరో టాలరెన్స్' (సహించేది లేదు) విధానాన్ని అవలంబిస్తున్నాం. న్యాయవాదులు, ట్రిబ్యునళ్లు ధ్రువీకరణ లేకుండా ఏఐ తీర్పులను వాడటం తీవ్రమైన లోపం." అని ధర్మాసనం మండిపడింది.

ఇలాంటి నకిలీ లేదా ఏఐ భ్రమలతో కూడిన సమాచారం ఆధారంగా ఇచ్చిన ఏ జడ్జిమెంట్ అయినా చట్టం దృష్టిలో నిలబడదని సుప్రీంకోర్టు తేల్చి చెప్పింది. ఈ కారణంగానే ఎన్‌సీఎల్‌టీ గతంలో ఇచ్చిన తీర్పును పూర్తిగా పక్కన పెడుతున్నట్లు (రద్దు చేస్తున్నట్లు) ప్రకటించింది. రానున్న రోజుల్లో న్యాయవాదులు, న్యాయమూర్తులు ఏఐ సాంకేతికతను కేవలం పరిశోధనలకు మాత్రమే సహాయకారిగా వాడుకోవాలని, సరైన ధ్రువీకరణ లేకుండా రూపొందించే ఈ ఏఐ తీర్పులపై కఠినంగా వ్యవహరించాలని దేశంలోని అన్ని న్యాయస్థానాలకు సర్వోన్నత న్యాయస్థానం సూచించింది.