POCSO Case: వీరమణిపై మరో పోక్సో కేసు నమోదు.. 2004 నాటి విద్యార్థిని ఆత్మహత్య కేసులో సంచలనం!

POCSO Case: తమిళనాడులో సంచలనం సృష్టిస్తున్న గ్రానైట్ వ్యాపారి ఆర్.వీరమణి (84) ఉదంతంలో దర్యాప్తు ముమ్మరమైంది. మైనర్ బాలికలపై లైంగిక వేధింపుల ఆరోపణలపై ఏర్పాటైన ప్రత్యేక దర్యాప్తు బృందం (SIT) తాజాగా ఆయనపై మూడో పోక్సో (POCSO) కేసు నమోదు చేసింది. 2004లో అనుమానాస్పద రీతిలో ఆత్మహత్య చేసుకున్న క్లాస్ 11 విద్యార్థిని మృతికి సంబంధించిన కేసును సిట్ అధికారులు తిరగరాశారు.

మృతిచెందిన విద్యార్థినికి చదువు కోసం వీరమణి ఆర్థిక సాయం అందించారని, 2004లో తన కూతురుని చెన్నైలోని తన అతిథి గృహానికి (గెస్ట్ హౌస్) ఆహ్వానించి వీరమణి లైంగిక వేధింపులకు గురిచేశారని బాలిక తల్లి సెప్టెంబర్ 28న సిట్ అధికారుల ఎదుట వాంగ్మూలం ఇచ్చారు. గెస్ట్ హౌస్ నుండి వచ్చిన తర్వాత తీవ్ర మనోవేదనకు గురైన బాలిక ఆత్మహత్య చేసుకున్నట్లు ఆమె తల్లి ఫిర్యాదులో పేర్కొన్నారు.

వీరమణి ప్రమేయంపై వచ్చిన ఒక టెక్స్ట్ మెసేజ్ ఆధారంగా సిట్ అధికారులు దర్యాప్తు ప్రారంభించి బాధితురాలి కుటుంబాన్ని గుర్తించారు. అయితే 2004 నాటి ఒరిజినల్ రికార్డులు 2017 జల్లికట్టు ఆందోళనల సమయంలో పోలీస్ స్టేషన్‌లో జరిగిన అగ్నిప్రమాదంలో దగ్ధమైనట్లు సిట్ గుర్తించింది. బాధితురాలి కుటుంబానికి రెండు సార్లు రూ. 1 లక్ష చొప్పున చెల్లించారన్న ఆరోపణలపై కూడా పోలీసులు విచారణ జరుపుతున్నారు.

వీరమణి ఖాతా నుండి సహ నిందితురాలు శాంతి ఖాతాకు రూ. 24.63 కోట్లు బదిలీ అయినట్లు, అందులో రూ. 2 కోట్లు శాంతి భర్త మహేంద్ర సింహన్ ఖాతాకు వెళ్లినట్లు పోలీసులు గుర్తించారు.

ఈ కేసుకు సంబంధించి ఎలాంటి సమాచారం లేదా ఆధారాలు ఉన్నా ప్రజలు 9345319676 నంబర్‌కు ఫోన్ లేదా వాట్సాప్ ద్వారా సంప్రదించాలని, సమాచారమిచ్చిన వారి వివరాలు గోప్యంగా ఉంచుతామని చెన్నై పోలీసులు తెలిపారు. ఇదిలా అయితే, ఆగస్టు 29 నుండి జ్యుడీషియల్ కస్టడీలో ఉన్న వీరమణి రిమాండ్‌ను కోర్టు అక్టోబర్ 9 వరకు పొడిగించింది. నేషనల్ కమిషన్ ఫర్ ప్రొటెక్షన్ ఆఫ్ చైల్డ్ రైట్స్ (NCPCR) కూడా ఈ ఘటనపై సుమోటోగా స్పందించి, త్వరలో చెన్నైలో విచారణ చేపట్టనుంది.