CM Vijay : అసెంబ్లీ చారిత్రక తీర్మానం.. ఇకపై అన్ని అధికారిక వేడుకల్లో 'తమిళ్ తాయ్ వాజ్తు'..

తమిళనాడు శాసనసభ సోమవారం ఒక కీలకమైన చారిత్రక తీర్మానాన్ని ఏకగ్రీవంగా ఆమోదించింది. రాష్ట్రంలో నిర్వహించే అన్ని రకాల ప్రభుత్వ అధికారిక కార్యక్రమాలు, పాఠశాలలు, కళాశాలలు, విశ్వవిద్యాలయాలు , ప్రభుత్వ రంగ సంస్థల వేడుకల ప్రారంభంలో రాష్ట్ర గీతం 'తమిళ్ తాయ్ వాజ్తు' (తమిళ ప్రార్థనా గీతం)ను తప్పనిసరిగా ఆలపించాలని ఈ తీర్మానం స్పష్టం చేస్తోంది. సీఎం జోసెఫ్ విజయ్ ఈ తీర్మానాన్ని సభలో ప్రవేశపెడుతూ, రాష్ట్ర భాషా , సాంస్కృతిక హక్కుల విషయంలో తమ ప్రభుత్వం ఎంతమాత్రం రాజీపడదని, మాతృభాషా పరిరక్షణకు కట్టుబడి ఉంటామని ఘంటాపథంగా స్పష్టం చేశారు.

తమిళం మా ఆత్మగౌరవం.. జీవనాడి: సీఎం విజయ్

తీర్మానాన్ని సభ ముందుంచుతూ ముఖ్యమంత్రి విజయ్ అత్యంత ఉద్వేగభరితంగా ప్రసంగించారు. "తమిళం అనేది కేవలం ఒక భాష మాత్రమే కాదు, అది మా ప్రాణం, మా భావోద్వేగం , మా అస్తిత్వానికి ప్రతీక" అని వ్యాఖ్యానించారు. కన్నతల్లిని ఎంత పవిత్రంగా భావిస్తామో, మాతృభాషను కూడా అంతే పవిత్రంగా చూసుకోవాలని పేర్కొన్నారు. రాష్ట్ర గీతాన్ని ఆలపించడం అనేది రాజ్యాంగ వ్యవస్థకు గానీ, దేశ సమైక్యతకు గానీ ఎంతమాత్రం వ్యతిరేకం కాదని, నిజానికి ఇది భిన్నత్వంలో ఏకత్వం అనే భారతీయ నమూనా అత్యున్నత సూత్రానికి ప్రత్యక్ష నిదర్శనమని వివరించారు.

రాష్ట్రంలో జరిగే అధికారిక వేడుకల్లో తమ రాష్ట్ర గీతానికి మొదటి ప్రాధాన్యత ఇచ్చే పూర్తి హక్కు తమిళనాడుకు ఉందని స్పష్టం చేస్తూ, తమిళ గీత గౌరవానికి తమ టివికె (TVK) ప్రభుత్వం కట్టుబడి ఉంటుందని తేల్చిచెప్పారు. తమిళ భాషలో ఒక గొప్ప శక్తీ, ఆత్మగౌరవం దాగి ఉన్నాయని, తమిళ గుర్తింపు ప్రస్తావనకు వచ్చినప్పుడల్లా రాష్ట్ర ప్రజలందరూ ఏకమవుతారని సీఎం విజయ్ ఈ సందర్భంగా గుర్తుచేశారు.

కేంద్రం సలహా.. విరుచుకుపడ్డ వివాద నేపథ్యం

అధికారిక కార్యక్రమాల్లో జాతీయ గీతానికి ముందు 'వందేమాతరం'ను తప్పనిసరిగా ప్లే చేయాలంటూ కేంద్ర హోంశాఖ ఇటీవల రాష్ట్రాలకు, కేంద్రపాలిత ప్రాంతాలకు పంపిన సలహాల నేపథ్యం, ఆ తదనంతర వివాదాల క్రమంలోనే ఈ అసెంబ్లీ తీర్మానం తీవ్ర ప్రాధాన్యం సంతరించుకుంది. 1891లో మనోన్మణీయం సుందరనార్ రాసిన ప్రసిద్ధ 'మనోన్మణీయం' నాటకం నుంచి తీసుకున్న ఈ గీతాన్ని 1970 నవంబర్ 23 నుంచే అధికారిక కార్యక్రమాల ప్రారంభంలో పాడాలని నిబంధన ఉందని అసెంబ్లీ గుర్తుచేసింది. ఆ తర్వాత 2021 డిసెంబర్ 12న దీనిని తమిళనాడు అధికారిక రాష్ట్ర గీతంగా గుర్తిస్తూ ఆదేశాలు ఇచ్చారు.

ఈ నేపథ్యాన్ని ప్రస్తావిస్తూ సభాపతి జేసీడీ ప్రభాకర్ మాట్లాడుతూ, 1970 నుంచి ఈ ఆచారం అమల్లో ఉన్నప్పటికీ, 1991లో అప్పటి ముఖ్యమంత్రి జయలలిత శాసనసభ సమావేశాల ప్రారంభంలో కూడా ఈ గీతాన్ని ఆలపించే సాంప్రదాయాన్ని తీసుకొచ్చారని తెలిపారు. ఈ తీర్మానాన్ని అమలు చేయడానికి ఎవరి ప్రత్యేక అనుమతులూ అవసరం లేదని స్పీకర్ స్పష్టం చేశారు.

ఏకగ్రీవంగా మద్దతు తెలిపిన అన్ని పార్టీలు

ఈ తీర్మానానికి సభలోని అధికార, ప్రతిపక్షాలకు చెందిన అన్ని రాజకీయ పక్షాలు ఏకగ్రీవంగా మద్దతు తెలిపాయి. ప్రతిపక్ష డీఎంకేతో పాటు అన్నాడీఎంకే (AIADMK) నేత ఎడప్పాడి కె. పళనిస్వామి మాట్లాడుతూ, మాతృభాషకు గౌరవం ఇవ్వడం ఎవరికీ వ్యతిరేకం కాదని, తమిళ భాషా ఆత్మగౌరవ పోరాటంలో రాజకీయ విభేదాలు పక్కనబెట్టి కలసికట్టుగా నిలుస్తామని స్పష్టం చేశారు.

వీటితో పాటు కాంగ్రెస్, పీఎంకే, సీపీఐ, సీపీఎం, వీసీకే, ఐయూఎంఎల్ పార్టీల సభ్యులు కూడా ఈ తీర్మానాన్ని పూర్తిగా సమర్థించారు. కేంద్ర ప్రభుత్వం రాష్ట్రాల భావోద్వేగాలతో ఆడుకోకూడదని సీపీఐ ఎమ్మెల్యే మారిముత్తు వ్యాఖ్యానించగా, రాష్ట్ర గీతానికి సంబంధించిన స్పష్టమైన హక్కులను కాపాడుకోవడానికి చట్టపరమైన నిబంధనలను మరింత బలోపేతం చేయాలని ఇతర సభ్యులు కోరారు.