Nida Khan: పోలీసుల కళ్లు గప్పి నిదా ఖాన్ పరారీ.. భర్త క్లూ ఇచ్చినా దొరకని నిందితురాలు!

Nida Khan: టీసీఎస్ నాసిక్ యూనిట్‌లో లైంగిక వేధింపులు, బలవంతపు మతమార్పిడి ఆరోపణలు ఎదుర్కొంటున్న ప్రధాన నిందితురాలు నిదా ఖాన్ ఆచూకీ వ్యవహారం ఇప్పుడు పోలీసులకు సవాలుగా మారింది. పోలీసుల కళ్లు గప్పి ఆమె పదే పదే తప్పించుకుంటుండటంతో ఈ కేసులో ఉత్కంఠ నెలకొంది.

భర్త క్లూ ఇచ్చినా.. చేజారిన నిందితురాలు:

ఈ కేసు దర్యాప్తులో భాగంగా పోలీసులు నిదా ఖాన్ భర్తను అదుపులోకి తీసుకుని విచారించగా, ఆయన పోలీసులకు సహకరించారు. ఆమె ఎక్కడ తలదాచుకుందో ఖచ్చితమైన సమాచారం అందించారు. ఆ లొకేషన్ ఆధారంగా పోలీసులు మెరుపు దాడి చేసినప్పటికీ, ఫలితం లేకుండా పోయింది. పోలీసులు వస్తున్నారనే విషయాన్ని ముందే పసిగట్టిన నిదా ఖాన్, వారు వెళ్లే లోపే అక్కడి నుంచి పరారైంది. పోలీసులు చేరుకునే సరికి ఆ ఇంటికి తాళం వేసి ఉండటంతో అధికారులు షాక్‌కు గురయ్యారు.

తీవ్రమైన ఆరోపణలు - ముమ్మర గాలింపు:

టీసీఎస్‌లో పనిచేసిన సమయంలో నిదా ఖాన్.. మహిళా ఉద్యోగుల పట్ల అత్యంత దారుణంగా వ్యవహరించిందని పోలీసుల విచారణలో వెల్లడైంది. టీమ్ లీడర్ల లైంగిక వేధింపులపై బాధితులు మొరపెట్టుకున్నా పట్టించుకోకపోగా, నిందితులకు అండగా నిలిచినట్లు ఆరోపణలు ఉన్నాయి. అంతేకాకుండా, బాధితులను లక్ష్యంగా చేసుకుని మతం మారాలంటూ ఒత్తిడి తెచ్చినట్లు 9 ఎఫ్‌ఐఆర్‌లలో పేర్కొన్నారు.

ప్రస్తుతం నిదా ఖాన్ తన ఫోన్‌ను స్విచ్ ఆఫ్ చేసి అజ్ఞాతంలోకి వెళ్లడంతో, ఆమె కోసం ప్రత్యేక బృందాలను రంగంలోకి దించారు. ఆమెకు ఎవరైనా ఆశ్రయం కల్పిస్తున్నారా అనే కోణంలో దర్యాప్తు చేస్తూ, పొరుగు రాష్ట్రాల్లోనూ గాలింపు చర్యలు ముమ్మరం చేశారు.