Nida Khan: టీసీఎస్‌ కేసులో ట్విస్ట్‌: ‘నేను గర్భవతిని.. అరెస్ట్‌ నుంచి రక్షణ ఇవ్వండి’ - కోర్టును ఆశ్రయించిన నిదా ఖాన్

Nida Khan: నాసిక్ టాటా కన్సల్టెన్సీ సర్వీసెస్ (TCS)లో సాగుతున్న మతమార్పిడులు, మహిళా ఉద్యోగులపై వేధింపుల కేసులో కీలక పరిణామం చోటుచేసుకుంది. ఈ కేసులో ప్రధాన నిందితురాలిగా ఉన్న నిదా ఖాన్ ప్రస్తుతం పరారీలో ఉన్నట్లు పోలీసులు తెలిపారు. ఆమె ముంబైలో ఉన్నట్లు సమాచారం అందుతుండగా, అరెస్టు నుంచి తప్పించుకునేందుకు ఆమె ముందస్తు బెయిల్ కోసం నాసిక్ స్థానిక కోర్టును ఆశ్రయించింది.

ఆరోగ్య కారణాలతో బెయిల్ ప్రయత్నాలు?

నిదా ఖాన్ ప్రస్తుతం గర్భవతి అని, త్వరలోనే ఆమె తల్లి కాబోతున్నట్లు కుటుంబ సభ్యులు పేర్కొంటున్నారు. తన ఆరోగ్య పరిస్థితిని సాకుగా చూపి కోర్టులో బెయిల్ పొందేందుకు ఆమె ప్రయత్నిస్తున్నట్లు తెలుస్తోంది. అయితే, ఈ కేసును లోతుగా విచారిస్తున్న సిట్ (SIT) అధికారులు మాత్రం ఆమెను కస్టడీలోకి తీసుకునేందుకు తీవ్రంగా ప్రయత్నిస్తున్నారు.

టీసీఎస్‌లో ఏం జరిగింది? (కేసు నేపథ్యం):

టీసీఎస్ క్యాంపస్‌లో బలవంతపు మతమార్పిడులు, లైంగిక వేధింపులు జరుగుతున్నాయని ఇప్పటివరకు 9 ఫిర్యాదులు అందాయి. ఈ కేసులో పోలీసులు ఇప్పటికే ఏడుగురు ఉద్యోగులను అరెస్ట్ చేశారు. వీరిలో ఆరుగురు పురుషులు, ఒక మహిళ ఉన్నారు. 2022 ఫిబ్రవరి నుంచి 2026 వరకు ఈ అఘాయిత్యాలు కొనసాగినట్లు బాధితులు పేర్కొన్నారు. 8 మంది మహిళా ఉద్యోగులు తమను సీనియర్లు శారీరకంగా, మానసికంగా వేధించారని ఫిర్యాదు చేశారు.

బాధితులు తమ గోడును హెచ్ఆర్ మేనేజ్‌మెంట్‌కు చెప్పుకున్నా, వారు పట్టించుకోకుండా విస్మరించారని బాధితులు ఆరోపించడం గమనార్హం. మతమార్పిడి వంటి సున్నితమైన అంశం కావడంతో పోలీసులు ఈ కేసును అత్యంత సీరియస్‌గా తీసుకున్నారు. నిదా ఖాన్ దొరికితే మరిన్ని కీలక విషయాలు వెలుగులోకి వచ్చే అవకాశం ఉంది.