Tamil Nadu: ముగిసిన తమిళ సస్పెన్స్.. టీవీకేకు వీసీకే మద్దతు..!

Tamil Nadu: తమిళనాడు రాజకీయాల్లో నెలకొన్న అనిశ్చితికి ఎండ్ కార్డ్ పడింది. టీవీకే (TVK) అధినేత విజయ్ రాష్ట్రంలో ప్రభుత్వాన్ని ఏర్పాటు చేయడానికి అవసరమైన మెజారిటీని సాధించారు. బుధవారం వీసీకే (VCK) పార్టీ అధికారికంగా విజయ్‌కు మద్దతు ప్రకటించడంతో సంఖ్యాబలం మ్యాజిక్ ఫిగర్‌ను దాటింది.

వీసీకే అధినేత తిరుమావళవన్ తమ పార్టీ మద్దతు లేఖను టీవీకే నేత ఆదవ అర్జునకు అందజేశారు. దీంతో టీవీకే కూటమి బలం 118కి చేరుకుంది. మే 4న వెలువడిన తమిళనాడు అసెంబ్లీ ఎన్నికల ఫలితాల్లో టీవీకే 107 స్థానాలతో అతిపెద్ద పార్టీగా అవతరించింది (విజయ్ రెండు చోట్లా గెలవడంతో ప్రస్తుత బలం 107). మెజారిటీకి పది స్థానాల దూరంలో నిలిచిన తరుణంలో కూటమి రాజకీయాలు ఊపందుకున్నాయి.

బలబలాలు ఇలా:

టీవీకే (TVK): 107

కాంగ్రెస్: 05

వామపక్షాలు (CPI & CPM): 04

వీసీకే (VCK): 02

మొత్తం బలం: 118

ఇప్పటికే కాంగ్రెస్ మరియు వామపక్షాలు విజయ్‌కు జై కొట్టగా, తాజాగా వీసీకే రెండు స్థానాల మద్దతు తోడవడంతో ప్రభుత్వం ఏర్పాటుకు అవసరమైన 118 స్థానాల మార్కును విజయ్ కూటమి చేరుకుంది. ఈ పరిణామంతో తమిళనాట 'విజయ్' ప్రభంజనం అధికారికంగా మొదలైనట్లయింది.

మద్దతు లేఖలు అన్నీ సిద్ధం కావడంతో విజయ్ త్వరలోనే గవర్నర్‌ను కలిసి ప్రభుత్వాన్ని ఏర్పాటు చేయడానికి అనుమతి కోరనున్నారు. దీంతో దళపతి విజయ్ తమిళనాడు తదుపరి ముఖ్యమంత్రిగా ప్రమాణస్వీకారం చేయడం కేవలం లాంఛనమే అని తెలుస్తోంది. దశాబ్దాల ద్రావిడ రాజకీయాల్లో ఒక సినీ నటుడు సొంత పార్టీ పెట్టి తొలి ప్రయత్నంలోనే అధికారంలోకి రావడం దేశవ్యాప్తంగా చర్చనీయాంశంగా మారింది.