TVK: విజయ్ రాకపోయినా డూపులతోనే గెలిచారు.. టీవీకే వింతైన ప్రచారం

TVK: తమిళనాడు అసెంబ్లీ ఎన్నికల ఫలితాలు దేశవ్యాప్తంగా చర్చనీయాంశమయ్యాయి. స్టార్ హీరో విజయ్ తన మొదటి ప్రయత్నంలోనే ఏకంగా అధికార పీఠానికి చేరువవ్వడం వెనుక అద్భుతమైన రాజకీయ వ్యూహాలతో పాటు కొంత వినూత్నమైన ప్రచారం కూడా దాగి ఉంది. ముఖ్యంగా ముఖ్యమంత్రి ఎం.కే. స్టాలిన్‌ను ఆయన సొంత నియోజకవర్గం కొళత్తూర్ లో ఓడించిన వి.ఎస్. బాబు ఇప్పుడు టాక్ ఆఫ్ ది టౌన్ అయ్యారు.

విజయ్ రాష్ట్రవ్యాప్తంగా ఉన్న 234 నియోజకవర్గాల్లో కేవలం 40 లోపే ప్రాంతాల్లో రోడ్ షోలు నిర్వహించారు. మిగిలిన నియోజకవర్గాల్లో పార్టీని ప్రజల్లోకి తీసుకెళ్లడానికి అభ్యర్థులు వింతైన పద్ధతులను అనుసరించారు. విజయ్ స్వయంగా రాలేని చోట, ఆయనలాగే ఉండే 'విజయ్ డూపుల'ను అభ్యర్థులు ప్రచారంలోకి దించారు. ఒక్కో డూప్‌కు రోజుకు సుమారు పదివేల రూపాయల వరకు ఖర్చు చేసి, విజయ్ స్వయంగా వచ్చినట్లుగా ఓటర్లను ఆకట్టుకున్నారు. కొన్ని నియోజకవర్గాల్లో అయితే ఒక అడుగు ముందుకు వేసి, అధునాతన ఎల్ఈడి ప్రొజెక్షన్ ద్వారా విజయ్ అక్కడే నిలబడి మాట్లాడుతున్నట్లు భ్రమ కలిగించే సాంకేతికతను వాడి ఓటర్లను మంత్రముగ్ధులను చేశారు.

స్టాలిన్‌ను ఓడించిన టీవీకే అభ్యర్థి వి.ఎస్. బాబు సామాన్యుడు కాదు. 75 ఏళ్ల వయసున్న ఈయనకు రాజకీయాల్లో అపారమైన అనుభవం ఉంది. గతంలో అన్నాడీఎంకే మరియు డీఎంకే రెండు పార్టీల్లోనూ ఆయన పనిచేశారు. గతంలో ఉత్తర చెన్నై నుంచి డీఎంకే ఎమ్మెల్యేగా పనిచేసిన బాబు, ఇప్పుడు అదే డీఎంకే అధినేత స్టాలిన్‌ను ఓడించడం విశేషం. దశాబ్దాల రాజకీయ అనుభవం ఉండటంతో, విజయ్ క్రేజ్‌ను తన అనుభవంతో జోడించి స్టాలిన్ కోటను బాబు బద్ధలు కొట్టారు.

విజయ్ పార్టీ అనుసరించిన ఈ టెక్నాలజీ, డూపుల ప్రచారం మరియు వి.ఎస్. బాబు లాంటి సీనియర్ నేతల వ్యూహాలే నేడు తమిళనాడులో 'దళపతి' రాజ్యాన్ని సుస్థిరం చేశాయని రాజకీయ విశ్లేషకులు అభిప్రాయపడుతున్నారు.