MK Stalin: డీలిమిటేషన్‌పై స్టాలిన్ సమరశంఖం.. రేపు తమిళనాడులో నల్ల జెండాల నిరసన!

MK Stalin: నియోజకవర్గాల పునర్విభజన పేరుతో కేంద్ర ప్రభుత్వం దక్షిణాది రాష్ట్రాల గొంతు నొక్కాలని చూస్తోందని తమిళనాడు సీఎం ఎం.కె. స్టాలిన్ ధ్వజమెత్తారు. పార్లమెంటులో రేపు (ఏప్రిల్ 16) ప్రవేశపెట్టనున్న డీలిమిటేషన్ సవరణ బిల్లు-2026ను ఆయన "నల్ల చట్టం"గా అభివర్ణించారు. జనాభా ప్రాతిపదికన సీట్ల విభజన చేపడితే, జనాభాను నియంత్రించిన దక్షిణాది రాష్ట్రాలకు అది శిక్షగా మారుతుందని ఆందోళన వ్యక్తం చేశారు.

స్టాలిన్ వ్యాఖ్యల్లోని ప్రధానాంశాలు:

తమిళనాడు ప్రజల ఆకాంక్షలను మరియు దక్షిణాది రాష్ట్రాల గళాన్ని పట్టించుకోకుండా కేంద్రం మొండిగా ముందుకు వెళ్తే తీవ్ర పరిణామాలు ఎదుర్కోవాల్సి ఉంటుందని హెచ్చరించారు. ఈ విభజన వల్ల లోక్‌సభలో దక్షిణాది రాష్ట్రాల ప్రాతినిధ్యం తగ్గి, ఉత్తరాది రాష్ట్రాల ఆధిపత్యం పెరుగుతుందని, ఇది సమాఖ్య స్ఫూర్తికి విరుద్ధమని మండిపడ్డారు. కేంద్రం వైఖరికి నిరసనగా రేపు (గురువారం) తమిళనాడు వ్యాప్తంగా ఇళ్లపై, బహిరంగ ప్రదేశాల్లో నల్ల జెండాలు ఎగురవేసి తమ నిరసన తెలపాలని ప్రజలకు పిలుపునిచ్చారు. ప్రజాస్వామ్యాన్ని కాపాడుకోవడానికి దేశంలోని అన్ని విపక్ష పార్టీలు ఏకమై కేంద్రం నిర్ణయాన్ని అడ్డుకోవాలని కోరారు.

కేంద్రం ప్రతిపాదిస్తున్న మార్పులు ఏంటి?

కేంద్ర ప్రభుత్వం పార్లమెంటు ప్రత్యేక సమావేశాల్లో ప్రవేశపెట్టనున్న బిల్లు ప్రకారం.. లోక్‌సభ స్థానాల సంఖ్యను ప్రస్తుతం ఉన్న 543 నుండి 850కి పెంచే ప్రతిపాదన ఉంది. ఇందులో 815 స్థానాలు రాష్ట్రాలకు, 35 స్థానాలు కేంద్రపాలిత ప్రాంతాలకు కేటాయించనున్నారు. మహిళలకు 33% రిజర్వేషన్లు కల్పించే ప్రక్రియను కూడా ఈ పునర్విభజనతో ముడిపెట్టారు.