Piyush Goyal: "మీ వెన్నంటి భారత్ ఉంది": అమెరికాలోని ప్రవాస భారతీయులకు కేంద్ర మంత్రి పీయూష్ గోయల్ భరోసా!

Piyush Goyal: ప్రపంచంలో ఏ మూలన ఉన్నా, ఎలాంటి కష్టాల్లో చిక్కుకున్నా ప్రవాస భారతీయులకు తమ దేశం ఎప్పుడూ అండగా నిలుస్తుందని కేంద్ర వాణిజ్య, పరిశ్రమల శాఖ మంత్రి పీయూష్ గోయల్ స్పష్టం చేశారు. "మీ వెన్నంటి భారత్ ఉంది" అంటూ అమెరికాలోని ప్రవాస భారతీయులకు ఆయన భరోసానిచ్చారు.

గాంధీ జయంతి సందర్భంగా అమెరికాలో పర్యటించిన ఆయన.. షికాగో సమీపంలోని స్కోకీలో ఏర్పాటు చేసిన మహాత్మా గాంధీ స్మారక విగ్రహానికి ఘనంగా నివాళులర్పించారు. అనంతరం అక్కడి ప్రవాస భారతీయులతో ముచ్చటించారు. గతంలో యెమెన్, ఉక్రెయిన్ సంక్షోభాల సమయంలో విదేశాల్లో ఉన్న భారతీయులను రక్షించేందుకు ప్రభుత్వం చేపట్టిన సహాయక చర్యలను ఆయన ఈ సందర్భంగా గుర్తుచేశారు. "మీరు ఏ దేశంలో, ఏ పరిస్థితుల్లో ఉన్నా మీ మాతృభూమి మీకు అండగా ఉంటుంది. మీ కుటుంబాలకు, మీ పిల్లలకు తోడుగా నిలుస్తుంది" అని భరోసానిచ్చారు.

అమెరికా, భారత్ దేశాల మధ్య ప్రవాస భారతీయులు ఒక జీవ వారధిలాంటి వారని పీయూష్ గోయల్ అభివర్ణించారు. "మీలో ప్రతి ఒక్కరూ అమెరికాలో భారతదేశపు బ్రాండ్ అంబాసిడర్లు, రాయబారులే" అని కొనియాడారు. ప్రవాస భారతీయులు తాము ఉంటున్న దేశానికి (అమెరికాకు) నిజాయతీగా, నిబద్ధతతో సేవ చేయాలని సూచించారు. అదే సమయంలో, తమ మాతృభూమిని, ఇక్కడి సంస్కృతిని తమ హృదయంలో పదిలంగా ఉంచుకోవాలని పిలుపునిచ్చారు.

ఈ పర్యటనలో భాగంగా ఆయన చారిత్రాత్మక ప్రాధాన్యత ఉన్న ప్రదేశాలను సందర్శించారు. 1893లో స్వామి వివేకానంద ప్రపంచ ప్రఖ్యాత చరిత్రాత్మక ప్రసంగం చేసిన షికాగోలోని ఫుల్లర్టన్ హాల్‌ను (Fullerton Hall) సందర్శించి నివాళులు అర్పించారు.