Uttarakhand: డ్రగ్స్ మాఫియాపై మహిళల యుద్ధం.. అర్ధరాత్రి చేతుల్లో కర్రలతో కాపలా!

Uttarakhand: యువతను పట్టి పీడిస్తున్న మాదకద్రవ్యాల మహమ్మారి పట్టణాల నుంచి గ్రామాలకూ పాకింది. ఈ పరిస్థితిని చూసి సహించలేని ఉత్తరాఖండ్‌లోని దేహ్రాదూన్ సమీప ముస్సోరి రోడ్డులోని థానీ గ్రామ మహిళలు స్వయంగా రంగంలోకి దిగారు. తమ పిల్లలను ఈ వ్యసనం బారిన పడకుండా కాపాడుకునేందుకు వినూత్నంగా పోరాటం ప్రారంభించారు.

దాదాపు 350 కుటుంబాలు ఉన్న ఈ గ్రామంలో గత ఏడేళ్లుగా బయటి వ్యక్తులు, విద్యార్థులు రాత్రి వేళల్లో వాహనాలపై వచ్చి డ్రగ్స్ కొనుగోలు చేస్తున్నారు. పోలీసులకు విన్నవించినా ఫలితం లేకపోవడంతో, ఊళ్లోని 30 మందికి పైగా మహిళలు ఒక గ్రూపుగా ఏర్పడ్డారు. సాయంత్రం 5 గంటల నుంచి అర్ధరాత్రి వరకు చేతుల్లో కర్రలు, టార్చ్‌లైట్లు, సెల్‌ఫోన్లతో వీధుల్లో పహారా కాస్తూ డ్రగ్స్ విక్రేతలకు సింహస్వప్నంగా మారారు.