CM Vijay: టాపర్ల మెడలో బంగారు హారం.. విజయ్ స్పెషల్ గిఫ్ట్

తమిళనాడులో 10వ, 12వ తరగతి బోర్డు పరీక్షల్లో అత్యుత్తమ ప్రతిభ కనబరిచి టాపర్లుగా నిలిచిన విద్యార్థులకు అరుదైన గౌరవం లభించింది. విద్యార్థుల ప్రతిభను ప్రోత్సహిస్తూ తమిళనాడు ముఖ్యమంత్రి విజయ్ చెన్నైలో నిర్వహించిన ప్రత్యేక కార్యక్రమంలో టాపర్లను స్వయంగా బంగారు నెక్లెస్‌లు, సర్టిఫికెట్లు , ఆర్థిక సహాయంతో ఘనంగా సత్కరించారు. 'టీవీకే విద్యా పురస్కారాల' మొదటి దశలో భాగంగా నిర్వహించిన ఈ కార్యక్రమానికి సంబంధించిన వీడియోలు ప్రస్తుతం సామాజిక మాధ్యమాల్లో వైరల్‌గా మారాయి.

విజయ్ చేతుల మీదుగా బంగారు నెక్లెస్‌లు.. విద్యార్థుల ఆనందం

ఈ కార్యక్రమంలో పురస్కారాలు అందుకున్న విద్యార్థులు తమ సంతోషాన్ని పంచుకున్నారు. తిరువన్నామలైకి చెందిన 12వ తరగతి విద్యార్థిని మోనికా 600 మార్కులకు గానూ 566 మార్కులు సాధించి ముఖ్యమంత్రి విజయ్ చేతుల మీదుగా అవార్డును అందుకోగా, కడలూరుకు చెందిన 10వ తరగతి విద్యార్థిని శ్రీనిధి 500 మార్కులకు గానూ 494 మార్కులు సాధించి సత్కారం పొందింది. ఈ గౌరవం తమకు, తమ పాఠశాలలకు ఎంతో గర్వకారణమని, రాబోయే తరాల విద్యార్థులకు ఇది ఎంతో స్ఫూర్తినిస్తుందని విద్యార్థులు తెలిపారు.

రాజకీయాల జోలికి వెళ్లొద్దు.. చదువే మీ ప్రాధాన్యం

కార్యక్రమంలో పాల్గొన్న ముఖ్యమంత్రి విజయ్ విద్యార్థులను ఉద్దేశించి పలు కీలక వ్యాఖ్యలు చేశారు. ప్రస్తుతానికి విద్యార్థులు ఎలాంటి రాజకీయాల గురించి గానీ, పార్టీల గురించి గానీ ఆలోచించాల్సిన అవసరం లేదని స్పష్టం చేశారు. కేవలం చదువుపైనే పూర్తి దృష్టి సారించి, సమాజంలో గొప్ప విజయాలు సాధించి సొంత కాళ్లపై నిలబడాలని పిలుపునిచ్చారు. భవిష్యత్తులో స్థిరపడిన తర్వాత సమాజానికి, తమిళనాడు రాష్ట్రానికి సేవ చేయాలని సూచించారు. విద్యార్థుల సంక్షేమమే తన రాజకీయ ప్రయాణానికి అసలైన చోదక శక్తి అని ఆయన పేర్కొన్నారు.

విజయం మీదే.. వెనక్కి తగ్గవద్దు

విద్యార్థులకు ధైర్యం నూరిపోస్తూ మాట్లాడిన విజయ్, సమాజంలో ముందుకు సాగుతున్నప్పుడు ప్రజలు లేదా పరిస్థితులు మీ మార్గంలో అడ్డంకులు సృష్టిస్తే, మీ విజయం అప్పటికే నిర్ణయించబడినట్లేనని వ్యాఖ్యానించారు. లక్ష్యం వైపు కష్టపడి చదివి విజయం సాధించాలని, సమాజానికి మంచి జరిగేలా పురోగమించాలని కోరారు. తమిళనాడు ముఖ్యమంత్రి హోదాలో టాపర్లకు బంగారు నెక్లెస్‌లు బహూకరించిన ఈ వినూత్న కార్యక్రమం ఇప్పుడు రాష్ట్రవ్యాప్తంగా చర్చనీయాంశంగా మారింది.